Aizawl August 26, 2024 : Vawiin khan ZPM Party Office ah chhung inkhawm hun hman a ni a, thusawitu Mizoram State Planning Board Vice Chairman Dr. Kenneth Chawngliana  chuan, Party pahnih an thawh dun reng rengin pakhat zawk an ral fo thin niin a sawi.

Dr. Kenneth Chawngliana chuan, “Kan ram kalphung leh hruaitu hmasate rorel danah mipui phunnawina a tam tak em avangin ZPM Party a lo ding ta a. Chona nasa tak hmachhawnin Kalphung thar mipui Sawrkar tiin mahni inhalralin kan rawn pen chhuak ta a ni. Mipuite pawhin kalphung thar hmuh hi kan lo chak ta hle mai a, Sawrkarna hial min pe ta a. Kalphung thara hma kan lak mek lai hian hun engemaw chen chu mipuite pawh chhel taka kan awm a ngai hle," a ti.

"Dam lo damna turin damdawi kha kan in barh a ngai thin. Chu damdawi chuan hna a thawh hunah chuan damlovin damna a lo chang dawn a ni. Kalphung hlui leh kalphung thar inthlak mek hi mipuite pawhin kan hrethiam tan viauin ka hria a, zirtirtu transfer leh sawrkar hmalakna dangahte pawh mipuiin min thlawp ta hle a, kan ram tana tha tur a ni tih hriain zirtirtu transfer-te pawhin lungawi takin kan ram tan tiin an hna an zawm mek a ni. Party pahnih an thawh dun reng rengin pakhat zawk an ral fo thin a, eptu party lian tang dunin party naupang te an beihrawn ta hi thil thar a ni lova, tun hma politics a thil lo thleng fo tawh a ni,” a ti bawk.