Aizawl: Mizorama dawnfawh (watermelon) thar hnem ber, Lamzawl khua kuthnathawktute dawnfawh thar chu a hralhna lamah harsatna an tawh mek avangin political party pakhatin leisak tumin an dawr mek nia thudawn a ni. Tun dinhmunah Lamzawl khuaa dawnfawh thartute hian anmahni inbuaipui vekin Mizoram hmun hrang hrangah an zuar kual mek.

Watermelon society, Lamzawl hruaitute hnen atanga ZALEN thudawn danin, an dawnfawh tharte chu hralhna an hriat mai loh vangin tun thlengin pum 15,000 chuang a chhia tih report an dawng tawh a. A hmunah kg. 1  Rs. 20-25 a an pe thei chung pawhin kharchhawnsaktu tur an nei lo. Hengte avang hian an hralhna atanga pek leh turin a ba a lirthei hmang te pawh an awm  a, Aizawl bakah, Mizoram hmun hrang hrangah an zuar kual mek a ni.

Watermelon society, Lamzawl hruaitute chuan political party pakhatin leisak tuma an dawr mek thu an sawi a, an leisak ngei dawn em tih erawh thuchiang an la hriat rih loh thu an sawi. Hetianga an dawnfawh tharchhuah hralhna tur hre lo a an awm nachhan chu state pawn/rampawn atanga dawnfawh chawk luh a tam vang tih ZALEN an lo hrilh tawh.

“Kan Dawnfawh thar atangin cheng nuai 200 bawr vel lei pha turah kan inchhut a; mahse, tunah chuan a ngaihna a awm tawh lo, a chhe tawhho ringawt pawh cheng tam man a tling tawh,” Watermelon society, Lamzawl hruaitute chuan an ti.