ZALEN August 17, 2023 : Mizoram Secular Alliance chuan Kum 2014-a BJP-in Central-a thuneihna a chan atang khan hnam tenau leh Kristian te an chep a, Kristian te nghaisakna leh tihduhdahna a thleng chamchi an ti. BJP chu Kristiante hnawk titu-ah an puh a, a thawhpui party te pawh Inthlan-ah hnawl ngam turin mipui an ngen.

Mizoram Congress, PC party leh ZNP te inthlunzawmna Mizoram Secular Alliance chuan BJP sawrkarna hnuaiah Kristiante an him lo tiin, "Kan biak In an hal a, inkhawm thei lo turin Kristian te an rikrap a, Chanchintha hriltute chu an man a, mirethei te hnena ei tur an pek leh an tanpuiin, tihluihnain Kristian-ah thlem luh an tum an ti a. Case an filed a, kan Missionary te manin taninah an khung thin a, kan chep em em a ni," an ti.

Party pathum thawkho te chuan October 2022 khan RSS-a hotu lu ber Mohan Bhagwat chuan, “India hi Hindu ram a ni tawp mai a ni, sawi buai theih a ni lo,” tiin a sawi a. Modi-a sorkar hian RSS thil tum Hindu lalram din turin chakna thahrui an nei tha tawk tih a chiang a ni, an ti.

Secular Alliance te chuan BJP-in India ram pumpuia dan pakhat Uniform Civil Code (UCC) hman a duh a, chutianga ti thei tur chuan hma a la chho mek an ti a, Nikum 2022 December khan UCC Bill hi Private Member’s Resolution-in BJP MP Kirodi Lal Meena chuan Rajya Sabha-ah a pu lut a, pass pui tawh a ni. UCC hman lohna turin BJP paihthla thei tur Party tangrual pawl vote a ngai niin an sawi.

Congress leh a thawhpui te chuan Congress Sorkar Indira Gandhi kaihhruai chuan kum 1976 khan, 42nd Amendment hmangin, India Constitution innghahna ber, Preamble-ah ‘Secular’ tih a dah chu tunah chuan chhuan tawlawl ber a ni an ti.  Chu amendment chu paih tumin BJP hian nasa takin tan an la ta a, amendment hmang vekin paih theih a ni tih an hria a, chumi dang tur chuan tanho a ngai an ti.

Secular Alliance chuan 'Secular' tih paih turin Parliament-ah BJP-in MP an ngah tawk a. An mamawh chu State sorkar, BJP sorkarna State 15 aia tlem lo a ni. Chumi nei tling tur chuan an tang nasa tiin, "An MP te chakna hmanga Parliament-a Amendment hmanga sakhaw zalenna secular tih an paih dawn hian BJP lalna State 15 aia tlem lovin an lo pawmpui a ngai a, pawmpui tur BJP lalna state an awm chuan sakhaw zalenna chu kan chan dawn tihna a ni. Tunah hian BJP lalna State 11-a awm mek a ni. Hetiang hi thil awm dan anih avangin Mizo mipui, Kristian tha tak takte hi tangkhawm ila, kan Kristianna hnawk titu BJP leh a thawhpui Party te hi Election-ah i a hnawl ngam ang u," an ti.