Aizawl : MPCC Media chuan nimina thuchhuah an siamah Ni 22.10.2021 (Zirtawpni) khan Chief Minister Zoramthanga’n MNF kum 60 tlin lawmna inkhawm Vanapa hall-ah thusawiin, Pastor-te chu zu zawrh sawimawi thin niin a sawi. Hetianga dawt hmanga intih hminghliau tum hi Pathian Kohhran rawngbawltu Pastor-te leh Kohhran diriamna leh zah lohna nasa takah Congress party chuan a ngai, tih an tarlang. 

MPCC chuan, “Ram leh hnam thatna leh hmasawnna tak tak duh vang ni lo, lalna leh thuneihna chan tum ve avang ringawta Kohhran zahawmna tihminghliau zawnga political party thenkhatin Pathian Kohhranho hmanruaa an hmang duh hi Congress party chuan pawi a ti tak zet a, an beisei ang lalna leh thuneihna chan loh avanga chhuanlam atan Kohhran rawngbawltu Pastor-te zu zawrh sawimawi thin anga puh duh khawp Kristian state-in chief minister kan nei hi Congress party chuan vanduai thlak a ti tak meuh a ni,” an ti.

MPF meuhin thuthar thehdarhtute hmaah thuneihna beisei vang ringawta Kohhran zahawmna leh ropuina tihminghliau zawnga che an awm thu an sawi a ngai ta mai hi a pawiin an zahawm takzet a. Chutiang thil pawi tak a thlen hnua Pathian Kohhran rawngbawltu Pastor-te zu zawrh sawi mawi thin anga chief minister meuhin a puh leh ta zel mai chu pawi an tih thu leh tun hnuah Kohhranin a khak ngai khawp leh Pathian rawngbawltute zahawmna tihminghliau zawnga che tawh lo turin heng political party te leh CM chu an ngen.