ZALEN August 7, 2023: Vawiin khan ZPM chhung inkhawm hun an hmang a a, he huna thusawitu ZPM Secretary General PC Vanlalruata chuan, “ZPM hian kum ruk hmel kan hmu ve dawn ta a, he pawl dintirh atanga vawiin thlengin Pathian kaihruainaah kan lawm takzet a ni,” tiin August 24, 2023-ah Campaign Kick-Off, Vanapa Hall-ah neih a nih tur thu a sawi.

PC Vanlalruata chuan, “August 15, 2017 khan pawl hrang hrang infinkhawmin ZPM din a ni a, tunah hian kum 6-na kan hmang mek chauh a ni. Kum 2018-ah MLA Election kan hmachhawn a, bial riat laiah hnehna kan chang a, bial riatah pahnihna kan ni bawk. Ke kan chhep tan dawn chauh a, kan Leader ber chu “A ZPM em mai’” tiin MLA atanga ban a ni ta mauh mai a, rilru a mangang hle. Engtia kal zel tur nge ni ang tih ngaihtuahin lu a hai hle a. Kan hruaituten ruahmanna an han siam a, Bye Election kan hmachhawn ta a ni. Serchip bial mipuite leh Pathian hnathawh vangin kan Leader chu hneh taka thlan tlin a ni leh ta a, Pathianin thil ropui tak min tihsak tih loh rual a ni lo,” a ti. 

ZPM Secretary General chuan, “Lunglei Municipal Council thlannaah result lawmawm tak mai, State danga kan hriat ngai loh kan nei a, Chief Minister bial Zemabawk Local Council thlannaah hneh taka thlan tlin kan lo ni leh ta bawk a, Pathian hnathawh kan chan hi a ropui takzet a ni. Chapo thei erawh kan ni lo a, inngaitlawm takin hma lam kan pan zel a tul a. Kan hruaituten kum 2023 inthlan awm turah candidate an han ruahman a, mi tha tak, ruat awm tak tak zingah seat chang ta lo mi thahnem tak an awm a, kan party min han chhuahsan ta hial pawh an awm a, a pawi hle a ni. Chutianga harsatna hrang hrang kan tawk chung pawhin nitin ZPM hian hmasawnna duhawm tak kan hmu zel. ZPM-a sawrkar ngei theihna tura bei turin Zoram mipuite ka sawm che u a, party mi te pawh lo chiai mai lova thahnemngai leh zuala tan la turin kan inchah a ni,” a ti bawk.