Aizawl May 20, 2024 : Health Minister Lalrinpuii chuan mipui huapzo tur Universal Health Care Scheme an buaipui mek tih a sawi a, upa leh rualbanlo te tana awlsam zawka Civil Hospital Aizawl-ah a hranpa counter siam sak an ni tih a sawi a, mipui tan hriselna lamah hma nasa taka lak a nih thu a sawi.

Vawiina ZPM Party office-ah chhung inkhawmn-ah Health Minister chuan, “Health Care Scheme hi nasa taka zirchian ngai a nih avangin uluk takin vawi tam official-te nen sawiho a ni a, tunah hian mipui huapzo Universal Health Care Scheme hi a taka kalpui a nih theih nan hma kan la mek a ni. He Health Care Scheme-ah hian Cheng nuai 5 (nga) thleng pawisa pek ngai lovin Damdawi In-ah kan in enkawl thei dawn a ni,” a ti.

Kum upa lam tana an hmalakna sawiin Lalrinpuii chuan, “Kan hmachhawp Tar pension cheng sangkhata tih punte, upa leh rualbanlote tana awlsam zawka Civil Hospital-a an inentir theih nan a hranpa counter siam a nih bakah anni bik tan hian Card eng siam sak a ni. Chu mai bakah Rualbanlote tan awlsam zawka office dawr theihna buaipui mek a ni bawk," a ti.

Health minister chuan, “Ruihhlo hian kan ram hi nasa takin min run a, Chuvangin hemi kawngah hian nasa takin hmalak kan tum a, Mizoram chhunga Kohhran hrang hrangte, NGOs leh Department thenkhat Official te nen engtinnge heng ruihhlo ngaite leh ruihlo bawiha tangte hi kan enkawl ang tih kan ngaihtuah a ni. Chuvangin heng harsatnate hi sutkiana a awm theih nan, theihtawpa tawngtaina nen kan beih a ngai a ni,” a ti bawk.