Aizawl November 30, 2022 : School Education Minister Lalchhandama Ralte chuan vawiin khan MBSE Conference Hall, Chaltlang-ah MBSE buatsaih Pawl-10 Science leh Mathematics Zirlaibu Mizo tawnga ziak a tlangzarh a, beiseina sang tak leh nghakhlel taka thlir Class-10 Science leh Mathematics zirlaibu Mizo tawnga a chhuak chu lawmawm a tih thu a sawi. 

Khuallian Lalchhandama Ralte chuan, "Beiseina sang tak leh nghakhlel taka thlir Class-10 Science leh Mathematics zirlaibu Mizo tawnga a chhuak hi a lawmawm. Mizo zirlai tam takin Science leh Mathematics an huphurh thin bik chhan chu tawng an hriatthiam tawk loh vang niin, a nihna bulthum an man tawk loh vang a ni," a ti. Mizo tawnga chhawpchhuah a ni chu zirlai tam tak ten subject 2-te chu an ngam sawt ang a, tlangnel sawtin, an tui phah dawn a ti. 
Minister chuan hmasawnna hnukpui hi Science leh Mathematics-ah a innghat lian a, ram changkang leh lehkhathiam ram ten an ngaih pawihmawh a ni, tiin Mizo tawng zirlaibu chu naupang te hriatthiamna tak tak neih tir tu a ni ngei dawn tih a sawi.

Minister hian MBSE-a thawkte inpekna ropui a tih thu a sawi a, Mizo version chiah chhuak thei rih mah se, Mizo leh English Bu (Bilingual Textbook) chu nakum Academic Session-ah a chhuah hman a nih tur thu a sawi. Mizoram ah hian zirlai huang (Syllabus) te hi a te bik lo a, Quality Education-ah a zahpuiawm lo hle a ni a ti. Inchawimawi leh inlawmpuina kawngah Mizo te harh a hun tawh tih sawiin Chhantea chuan, "MBSE kaihhruaina hnuaiah Mizoram chu 2020 atangin Covid hripui karah offline in a hun takah exam tha taka buatsaih thei an ni a, Kohhran, NGOs, Local council leh Mizo mipuite thawhhona rah a ni," a ti. 

Minister chuan kalkhawmte chu Mizo hnam chawisanna kawngah leh tawng humna kawngah tan la chhunzawm zel turin a fuih a. Hnam tana mellung pawimawh tak phochhuah a nih rual hian thangthar te ngaituahna thar leh fim tak nena kaihhruaina kawngah thawkho zel turin kalkhawmte a chah bawk a ni.

Khualzawhawm School Education Secretary Dr. Lalzirmawia Chhangte, IAS pawhin thu sawiin, "Mizo tawnga lehlin kawnga inpe leh mithiamte zarah ram tan hmasawnna ropui tak a ni. NEP-2020 in a ngaihpawih em em pianpui tawnga zir theih tur lehkhabu a chhuak chu hnam tan rotling a ni a. Mizo tawng bu hian Zirlaite a sawt zawng leh tangkaipui tur zawnga chhawpchhuah sak dawn bakah Mizo tawng tih hausakna a ni. Hnam leh tawng hi kalkawp tlat a nih avangin hnam humhim nan pawh he zirlaibu hi a pawimawh hle a ni," a ti.