Aizawl: Mizoram Police chuan kum 2019 chhung khan thubuai 2884 an ziak lut a. Thubuai ziah luh zingah hian rukruk thubuai a tam bera, tualthah leh pawngsual case ziahluh in hniam lam a pan hret hret bawk.

Mizoram Police chhinchhiah danin nikum chhunga thubuai an ziah luh 2884 hi kumdang aiin a tam a, kum 2010 tih lohah chuan kum 10 kalta chhunga thubuai ziah luh tam ber kum a ni. Nikum chhunga thubuai ziah luh 2884 zinga 2380 hi IPC hnuaia ziah luh a niin a dang 504 hi non IPC (Local and Special Law) hnuaia ziah luh a ni.

IPC hnuaia thubuai ziahluh 2380 zing ah hian rukruk thubuai chu a tam lawr lak a, rukruk thubuai hi 1061 ziah luh niin hei hi IPC hnuaia thubuai ziah luh zawng zawng atanga chhutin 44.57% a tling a ni. Rukruk thubuai dawtah hian in/mi rawk (burglary) chu a sang leh a, in/mi rawk thubuai hi 643 ziahluh a ni.

IPC hnuaia thubuai ziah luh zingah hian tualthah thubuai leh pawngsual thubuai ziah luh chu kumdang aiin a tlem a. Nikum chhung hian tualthah thubuai 22 ziahluh a ni a, hei hi kum 10 kalta chhunga tualthah thubuai ziah luh tlem ber dawttu a ni a, kum 2017 khan tualthah thubuai hi 20 ziah luh a ni a, kum dangah chuan 22 ai hian an tam vek a ni.

Nikum chhunga thubuai ziah luh langsar zingah pawngsual thubuai 43 ziah luh a ni a, tualthah tum thubuai (attempt to murder) 14 ziahluh a nih bakah thihna thleng lirthei chetsualna (road accident fatal) tum 44 leh thihna thleng lo lirthei chetsualna tum 16 a thleng bawk a ni.

IPC hnuaiah hian tualthah thubuai hi a tlem chho hret hret a, kum 2010-ah 46, 2011-ah 27, 2012-ah 28, 2013-ah 27, 2014-ah 45, 2015-ah 36, 2016-ah 28, 2017-ah 20, 2018-ah 27 leh 2019-ah 22 te ziah luh a ni a. Pawngsual thubuai ziah luh pawhin tlem lam a pan chho a, kum 2010-ah case 93 ziahluh a ni a, 2011-ah 77, 2012-ah 102, 2013-ah 88, 2014-ah 125, 2015 ah 59, 2016-ah 26, 2017-ah 25, 2018-ah 53 leh 2019-ah 43 te ziah luh a ni.

IPC hnuaiah hian kum tin rukruk thubuai chu ziahluh tam ber a ni zel a, in/mi rawk thubuaiin a dawt zel thin. Non IPC ah hian kum tin zu khap bawhchhiatna leh ND&PS Act thubuai chu ziahluh tam ber an ni thin bawk.

Non IPC hnuaia thubuai ziah luh 504 zingah hian zu khapna dan bawhchhiatna thubuai ziah luh a tam ber a, case 217 ziah luh niin hei hi non IPC hnuaia thubuai ziah luh zawng zawng atanga chhutin 43.05% a tling a. ND&PS Act bawhchhiatna chu a dawttu niin hemi hnuaiah hian thubuai 159 ziah luh a ni bawk.

Non IPC hnuaia thubuai ziah luh langsar dangte chu Arms act-ah 9, foreigner act ah 9, explosive act 8 leh IT Act 6 te an ni bawk a ni.