Aizawl December 2, 2022: PC Party President Vanlalruata chuan vawiin khan an party Office, Treasury Square ah chanchinbu mite kawmna an nei a, awmze nei-a khuahkhirhna hnuaiah PC Party  chuan Zu tha zawrh ngai an tih thu a sawi. Ruata chuan, ''Zu hi fak leh sawi mawi chi a ni lo a, khuahkhirh ngai a ni a. Zu chhia phei chu hlauhawm tak a ni a, tih bo ngai a ni," a ti a.

PC President chuan, "Mizoramah zu chhia a tam hle niin a lang. Thalai leh la valai tak tak mu hlum tam tak hi zu chhia an in thu sawi tel a nih deuh zel avangin zu chhia in avanga thi an tam hle niin a lang. Hei hi ngaihthah chi a ni lo va,  rang taka zirchian leh hmalak ngai a ni. Zu chhia tibo tur hian khuahkhirhna felfai leh endikna rintlak zu tha siam a ngai a ni," a ti bawk.

Ruata chuan, Mizoram hi India rama chhiah hmu tlem ber state kan ni a. Zu chhiah pawh kan hmu tlem hle a, chutihlaiin zu khap bur anga kan insawi lai hian tun hnai kum 30 chhung hian kum tin zu chhiah kan hmu ziah a. Hetiang hian a vaibelchhe bî a kan zu chhiah hmuh leh hmuh tum dan a ni.

2013 - 14 ( RE) 250 
2014 - 15 (Actual)270
2015 - 16 (RE) 39. 42
2016 - 17 (Actual).70. 68
2017 - 18 (Actual) 64.96
2018 - 19 (Actual) 63.91
2019 - 20 (Actual) 2. 55
2020 - 21 (Actual) 0. 85
2021 - 22 (RE) 0. 70
2022 - 23 (RE) 0. 79

Zu chhiah chungchang sawi belhin Ruata chuan, ''India sawrkar atanga kan pawisa dawnah hian zu chhiah a tel kum tin bawk," tiin Pu Ruata chuan, ''Kan dinhmun dik tak en in kan ramah hian Dan hnuaiah PC Party chuan  Zu  ṭha siam leh zawrh a ṭul kan ti takzet a ni," tih thu uar takin Press mite hmaah a sawi a ni.