Aizawl January 23, 2023: Vawiin khan PC Party chuan an office-ah an President Vanlalruata hovin Party Office bungrua enfiahna leh senghawina neiin emergency meeting an nei nghal a, Mizorama BJP thang chho zel dan chah tul an tih thu an sawi a, an president chuan BJP do puiah party, pawl leh mipuite a sawm.

PC Party chuan an thupui, "Kan Ram, Kan Hnam, Kan Sakhua a him tur a ni," tih nena enkawpin Mizorama BJP party thang chho zel chu dan chah tul an ti. President Vanlalruata chuan, “BJP hi political party pakhat a ni a, party a nihna-ah sawichhiat emaw sawihnawm bik tur a ni lo a, sawrkarna an chan naah pawh hmalakna-ah pawh thil tha tam tak an ti. Chutihlaiin an hmalakna leh thil tum thenkhat hi Mizoram, Mizo hnam leh kan Kristianna tan a tha lo a. Hei hi Mizo ten kan do let a ngai a ni," a ti

Ruata chuan ''BJP hi Mizoramah an thang lian chho ve mek a - MLA leh VC te an neih mai bakah Autonomous District Council lamah an insawhnghet chak hle tih kan hre vek a. Chuvang chuan, kan ram, kan hnam leh kan sakhaw himna atan an thanglian zel tur hi dan a ngai kan ti a. Tanrual pui atan political party leh pawl dang zawng zawng leh mitin kan sawm a ni. Kan ram, kan hnam leh kan sakhaw himna atan i tangrual ang u” a ti. 

Party Elected OB te chuan hemi atan hian hma lak tura relin hmalak dan tur Committee in a rel zui dawn a ni.