Aizawl December 1, 2022: Vawiin khan Provisional Employees' (PE) Association of Mizoram, PHED Branch General Assembly vawi 1-na chu Multipurpose Cultural Complex, Berawtlang-ah Deputy Chief Minister Tawnluia chuan khuallian niin a hmanpui a, kum khatah an hlawh 4% increment pek leh thildang te duanchhuah thar a nih thu a sawi. 

Khuallian Tawnluia chuan, "Muster Roll kan tih thin kha tun sawrkar hmalakna in Provisional Employee tia vuahin kal dan thar leh mumal zawk duan a ni a. Kan hun tha zawng zawng sawrkar tana hmang ten sawrkar-ah regularisation an nih theihnan dan thar, post vacant awma an ngheh theihnan dan thar hrang hrang - kum 7 hnua vacant post-a awm seniority behchhana regular theihna dan te, regular te hlawhzat atanga 50% fix pek te, Casual leave chungchang te, regular post sawrkar-in a lak apianga provisional employees tan 35% reservation te, kum khat-ah hlawh 4% increment te leh thildang te duanchhuah thar a ni," a ti. 

Dy, Chief Minister Tawnluia chuan sawrkarin hetiang taka a hnathawkte a ngaihsak angin thawktute chu an kuta hna tla te hun bi nei leh thahnemngai taka thawk zel turin a chah a, Tui enkawltu bik an nihnaah an mawh a san hle thu leh rinawmna leh inpekna nena mipuite rawngbawl zel turin Provisional Emplotees te a sawm bawk. 

Provisional Employees PHED-ah tam berin mi 2010 an awm mek a, General Assembly-ah hian District hrang hrang atangin member te an kalkhawm a ni.