Khawvel-ah hian footballer tha tak tak an lo piang chhuak tawh a, chung zingah chuan ropui bik mi tlem te khawvel-in football a hmelhriat chhunga hming dai tawh lo tur mi tlem te an awm a, chung zinga ropui bik mi panga chu kan han tar lang dawn a ni.    

5. Johan Cryuff (Netherlands) 
Johan Cryuff hi mimal angin Barcelona leh Ajax tana hming chher hle mahse international trophy pakhatmah a chawi lo thung. Cryuff hian Ajax-a a khelh laiin Eredivisie title pariat zet a chawi a, heng zinga pathum chu European Cup an ni nghe nghe. Game 287 a khelhah goal 194 thunin assist 140 a nei a ni. 

Ajax atangin Barcelona lama a kal hnuah pawh Cryuff hian La Liga title leh Copa del Rey te a chawi chhawk leh zak zak a, Blaugrana tan game176 khelin goal 59 a thun. A hun tawp lamah Ajax hmelma hlun Feyenoord tan khelin Eredivisie title a chawi leh bawk. Ballon d'Or award tum thum a dawng a ni. 

Oranje hi kum 1974 khan FIFA World Cup-ah final a luh pui a, Franz Beckenbauer-a ho West Germany an hneh zo ta lo. Heti chung hian Cryuff hi tournament best player-ah thlangin Golden Ball a dawng nghe nghe. 

Rinus Michels leh Cryuff te inkawp kha tunlai football khawvel-a passing leh possession kawng sial hmasatu nia ngaih an ni a, Pep Guardiola leh Lionel Messi te pahnih Barcelona lama an ropuina kha Cryuff-a philosophy hrin chhuah nia ngaih a ni. Tunlai football khelh dan kalhmang hi Johan Cryuff-a ngaihtuah chhuah deuh vek niin an sawi. 

4. Pele (Brazil) 
Pele hi khawvel fooballer tha ber anga sawi fo thin a ni. Pele hi chanchinbu lar Time magazine-in kum zabi 20-na chhunga khawvel mipawimawh 100 a thlan chhuah zingah a lang phak. Hei hian football mai nilo sport tan hrim hrim Pele-a pawimawh zia a lai lang chiang hle awm e. 

Pele larna leh ropuina tizual em emtu pakhat chu kum 1958, 1962 leh 1970-ah te a ram Brazil FIFA World Cup chawipui theitu a ni hi a ni. Football trophy ngaihhlut ber world cup-ah hian player naran anga inlan a ni satliah lova, tun thlenga world cup nomawi chawi thei player naupang ber niin an champion kum khan Best Young Player-ah thlan a ni 1970 khan Golden Ball a dawng bawk.  

Pele-a hnu hian Brazil hian player talent nei tha tak tak a neih nual tawh a, chung zingah chuan Neymar leh Ronaldo Nazario te pawh an awm, mahse Pele-a anga goal thun thei an la awm lo. A ram tan goal 77 zet a thun a ni. Brazilian legend hi he list-a awm zinga Europe top league lama khel miahlo awmchhun a ni bawk.  

Pele hian football a khelh chhungin inelna hrang hrangah goal 1281 a thun. Pele hian Santos-a a khelh chhung khan Copa Libertadores title tum hnih, Campeonato Brasilerio Serie A title paruk leh Intercontinental Cup tum hnih lain goal 643 a thun a ni. Brazilian legend Pele hi Argentina legend Diego Maradona nen FIFA Player of the Century atan thlan dun an ni. 

3. Diego Maradona
Diego Maradona kum 100 chhunga footballer ropui ber pahnih zinga pakhat zawk hian huhang a ngah ang bawkin chanchin a ngah a, kum 16 a tlin hma deuhin Argentinos Juniors a zawm a, kum nga chhung khelin goal 115 a thun. A hnuah a khelh chakna ber Boca Juniors-ah lutin league title a chawipui nghal thei.

Maradona hi Boca Junior-ah a cham rei lo, European club lamin an ngaihven thuai a, kum 1982 khan Barcelona chuan a hunlai a world record ni turin £5 million zetin an lei chhuak. 

Maradona hi Barca player Santiago Bernabeu-a standing ovation an pek hmasak ber niin Barcelona chakna goal a thun zawhah Real Madrid fans ten ding chunga kut bengin an lawmpui a ni. 

Khawvel barakhaihin a vanglai takin Maradona hian Italy club naran ve tak Napoli a zawm a, he club-ah hian captain niin an club tana a hmasa ber turin 86’-87’ season khan Serie A title a chawipui a, 1987 Copa Italia leh 1989 UEFA Cup, 89’-90’-ah  Serie A title a lakpui leh bawk. Manglam pawha an man phak loh hlawhtlinna Maradona zara an han chang mawlh mawlh mai chu Naples lamah chuan Pathian tenau ang hial a zah leh chawimawi a hlawh ta. Napoli-ah hian game 257 khelin goal 115 leh assist 58 a nei a ni. 

2. Cristiano Ronaldo (Portugal) 
Kum 37 mi Cristiano Ronaldo hi football chanchina goal thuntu ropui ber a ni a, a la thun chho mek zel bawk. 

2003-a Manchester United-a bul a rawn tan khan kum 18 mi chauh a ni a, khami atang khan kum 20 chhung zet chu level sang berah a la inlan chho char char thei a, a kalna apiangah goal a thun a, record a siam zut mai a ni. 
 Los Blancos tan hian game 438 a inlanin goal 450 teh meuh a thun a, assist 132 a nei bawk. Club tana goal thun tam ber nihna a hauh mek.

Portuguese superstar hi European club te football inelna sang leh hautak ber Champions League chanchina player ropui ber a ni. Goal 141 thun tawhin goal thun tam ber a ni a, assist ngah ber niin 42 a nei bawk.  

Cristiano Ronaldo hi international goal khungtu ropui ber niin game 189-ah goal 117 zet a thun tawh a, a ram hi Euro 2016 a chawipui tawh bawk. 

Ronaldo hian Ballon d'Or tum nga, FIFA World Player of the Year tum 3 leh UEFA Player of the Year tum 3 nihna a hauh a, Pichichi trophy thum 3 a chawi a, European Golden Boot tum 4 a dawng bawk.

1. Lionel Messi, ( Argentina) 
Lionel Messi hian mimal chawimawina sang bera ngaih Ballon d'Or award tum 7 dawng tawhin amah hnaih ber tu Ronaldo aiin pahnihin a la tam zawk. 

Little magician an tih mai thin Messi hian Barcelona-ah kum 2004 khan bul tanin kum 17 chhung zet hun a hmang a,hemi chhung hian Barca record ropui tam tak a siam hman a ni. Barca tan hian tum 778 khelin goal 672 thunin assist 305 a nei hman. A record atang ringawt pawh hian Messi hi Barcelona leh La Liga history-a player ropui ber a ni tiin a sawi ngam awm e.