Aizawl: Youth Adventure Club, Govt. Lawngtlai College leh Chhimtuipui Wildlife Division, Lawngtlai tangkawp chuan April 15-17,2021 chhung khan Phawngpui National Park-ah Cleanliness Drive Cum Trekking an buatsaih. 

He hunah hian Youth Adventure Club, Govt. Lawngtlai College zirlai mi 20 vel leh Phawngpui Range hnuai staff te an thawk chhuak.

Zirlai naupangte hian Thaltlang atanga ke-a kalin tlang sang ber thleng an lawn a, bawlhhlawh an hmuh apiang chhar faiin Forest Department in bawlhhlawh paihna hmun a siamah an paih a ni. Phawngpui National Park tlawhtute zingah thil eina kawr leh tui bottle ruak paih mai mai an awm thin chu pawi an tiin, Phawngpui tlang mawina leh Pathian kutchhuak tihhmelhemna niin, chutiang ti tawh lo turin Youth Adventure Club chuan Phawngpui National Park tlawhtute an ngen a ni.

Plastic bungrua chu nungcha te tan a hlauhawm bakah, environment tichhetu a nih avangin Phawngpui National Park tlawhtute chuan Forest Department-in a paihna hmun tura an ruahmanah chauh paih thin turin Phawngpui National Park tlawhtute an ngen bawk a ni.