Aizawl : Mizoram tlangsang ber Phawngpui tlang leh a chhehvel ram chu ala kang chu vawiin thleng hian a la kang chhunzawm zel a, Lawngtlai lam atanga thu lakna Chhawkhlei Times chuan India National Park ni pha kang chhunzawm zel thelh nan hian a thelh tur thlawhna an beisei thu an tarlang.

    Phawngpui National Park kang mei hi nilaini atang khan a bawr ram kan nasat avangin theihtawp a ven a ni a, Lungpher South ram atanga kangmei chhuak atangin a la kang chhunzawm zel a, nizan khan South Lungpher mitlawmngai YLA leh Forest Staff ten tlaivara an buaipui hnu pawhin kangmei chhuahna lai hi awihpang leh kham khawkrawk hmun anih avangin tun hun thleng hian ala kang chho mek zel.

    Tun hnaia Mizoram hmun hrang hranga kangmei chhuak ah Mizoram tlangsang ber leh National Park Phawngpui tlang bul ṭhut vel ramte pawh akang nasa hle a, Phawngpui tlang (Farpak) hnuai Sangau ram chhung pawh akang nasa hle. Sangau-II VC leh YLA te chuan theihtawp chhuahin nithum leh zan 2 zet kangmei chhuak hi an thelh tawh a, an ṭhelh mit vek tawh a an ngaih laiin Nilaini tlai lam khan Sangau-II YLA park leh MIMIR Project (Project cost 1 core) hnathawhna thlang atangin kangmei hi a rawn chhuak leh a, nizan thleng hian kang mei chhuak hi a nasat avangin Sangau-II YLA leh VC te chuan an la ṭhelh chhunzawm zel a ni.

    Niaini vek khan Sangau Sub Division huam chhung a South Lungpher ram chhung, Phawngpui tlangsang ber hnuai Ailian lui hnar lam atangin kangmei hi a chhuak leh a, Phawngpui tlang sangber lai bul hnai lawk  leh National Park huam chin kang thlengin Phawngpui National Park area hi a kang mek. Kangmei chhuak hi Forest Deptt. Staff te leh South Lungpher YLA leh VC ten ṭhelhin an buaipui mek a ni. 

    Phawngpuitlang lawn chhohna Farpak hnuai Sangau ram pawh zan thum na atan nizan thleng khan Sangau VC te leh YLA mi tlawmngai ten theihtawp leh tlaivara an ṭhelh hnu pawhin kangmei hi ala reh thei lova vawiin tlai dar 1:00 pm vel aṭang khan Sangau nula leh tlangvalte in aukhawmin kang ṭhelh turin Phawngpuitlang kawng Farpak hnuai a Sangau-II ram kang mek hi an ṭhelh chhunzawm zel a ni.