Philippines chhim lamah Pathianni tuk khan Catholic Mass neih laiin thil puakah mi pali an thi a, mi dang eng emaw zatin hliam an tuar bawk.

An rama Muslim cheng an tamna ber khawpui, Marawi-a Mindanao State University gymnasium-a inkhawm laiin he thil hi a thleng a ni.

Mi 42-in hliam tenau an tuar a, thuneitute chuan ‘boruak an thunun tawh’ tih an sawi.

Kum 2017 khan Marawi-ah hian sorkar sipai leh hel pawl, Islamic State nena inzawm nia hriatte chu thla nga zet an lo indo tawh.

Pathianni tuka bomb puak pawh hi Daulah Islamiyah-Maute Group tih a nih a rinawm thu he lai bial police commander, Brig Gen Allan Nobleza chuan a sawi.

Gen Nobleza chuan Zirtawpnia an khaw dai, Datu Hoffer Ampatuan khuaa hel an beihnaah 11 an that tih a sawi a, Pathiannia beihna pawh hi an phuba lakna a ni thei tih a sawi.

President Ferdinand Marcos Jr chuan he thil thleng hi ‘ngaihtuahna fim nei lo chetna, nunrawnna ralthlak’ tiin a sawi a, ‘ram pawn leh firfiakte chet thawhna’ tiin a sawi bawk a. A sawi zui thui lo thung.

Mipuite chiai lo turin a ngen a. “Rawng taka chete hi chhui chhuaha an chungah dikna hlen chhuah a ni ang,” a ti.

Chhui tawhna chinah chuan grenade emaw, improvised bomb emaw hman niin thuneitute chuan an sawi.

Tual chhung thuneituten a puah hnua thil awm dan social media-a an tar lanah chuan MSU gymnasium-a thutthlengte chu a darh nasa hle tih a lang a. A chhuah tih loh a building dang erawh a chhe nasa lem lo niin a lang.

A bil hnai damdawi ina hliam tuar lakte chu pem tenau leh kak vel an ni hlawm tih thlalakah hian a lang a. Provincial Governor Mamintal Adiong Jr chuan hliam tuar zinga tam zawk chu an ina inenkawl zui tura hawtir an nih thu a sawi.

Philippines-ah hian Pathianniah hian inkhawm hi ni dang aiin an tam zawk ziah a, tun tum phei chu Catholic Kohhranten Krismas hma chawlhkar li awma an hman tan thin, Advent an tanna a ni bawk.

Philippines-ah hian mi cheng maktaduai 113 zinga 80% dawn hi Catholic an ni a, sikul gymnasium leh bazarpuia Sunday Mass neih hi an tih fo a ni a, biak in nei lem lote phei chuan an hmang deuh vek zawk.

An rama university lian ber zinga mi, MSU chuan an hmuna thil thleng chu pawi an ti a, tharum thawhna rawng tak chu an dem tih an sawi.

“Khawthlang nunah tharum thawhna hian hmun a chang lo va, MSU ang zirna in sangah phei chuan hnawl a ni,” an ti.

“An hun harsa tawh mekah hian Kristiante leh a tuartute lamah kan tang tlat a ni,” an ti bawk.

University hian campus-ah security staff tam zawk an dah a, hriattirna a awm leh hma chu zirna pawh an chawlhsan rih dawn tih an sawi.

Mindanao hi Philippines-a sakhaw zuitu tlem, Muslim tamna bial a ni a, kum tam tak chhung chu helna leh uchuak taka tharum nena chetnain a tuam tawh hmun a ni thung.

Kum 2012 khan Manila leh an rama Muslim hel pawl lian ber chuan Mindanao chu autonomous region-a awm turin inremna an siam a, kum 2022 khan regional assembly inthlan hmasa ber pawh an nei tawh a. Heti chung hian tharum thawhna hi a la reh fel thei meuh lo a ni.