Aizawl July 11, 2024: Union Home Minister Amit Shah chuan tukin dar 9 khan Chief Minister Lalduhoma chu telephone in a rawn bia a. Assam Rifle sawn chhuahna tur Memorandum of Understanding, hun engemaw chen Home Ministry in an kawl tawh chu hapta khat chhunga tihfel a tum thu a rawn hrilh.

Chief Minister Delhi zin lai khan Union Home Minister hi a zin chhuah lai a lo nih ve avangin an inhmu hman lova. Chuvang chuan lehkhain Cyclone Remal chhawmdawlna te, Raltlan chhawmdawlna te leh Assam Rifle sawnchhuah thute hi Home Minister-ah hian a thehlut a. Union Home Minister hian heng lehkha te a hmuh ve leh Chief Minister hi a rawn be nghal a ni.

Remal chhawmdawlna leh raltlan tanpuina te hi an rawn pe chhuak dawn tih a rawn hrilh a. Assam Rifle sawnchhuahna tura Mizoram sawrkar, Assam Rifle leh Central sawrkar te inremna Memorandum of Understanding, hun engemawchen Home Ministry in an kawl tawh chu tun dinhmuna mutan nia a ngaih thu Chief Minister hian a lo sawi a. Union Home Minister Amit Shah hian kar khat chhunga he MoU hi lo chinfel a tum tur thu a hrilh a ni.