Pakistan sawkarain darkar 60 dawn an hren hnuah Indian Air Force pilot Wing Commander Abhinandan Varthaman chuan Zirtawpni zan dar 9.25 khan, India leh Pakistan inrina Wagah-Attari border chu kânin nimin zing dar 12:23 khan New Delhi thlenpui a ni.
Wing Commander Abhinandan Varthaman hi Zirtawpni zan khan ropui takin ram pahnih inrinaah lo hmuah a ni a, ani hi Pakistan awp chin Kashmir-ah February 27 khan a thlawhna MIG-21 chu Pakistan F-16 a um laiin kah thlak niin, man zui nghal a ni. India sawrkar chuan Abhinandan hi IAF special aircraft hmangin hruai haw a dil a, ni khat zet tihkhawtlai a nih hnuah Wagah-Attari kaltlang hian ramri an rawn kântir ta zawk a ni
Abhinandan hi a chhungte bakah IAF officer thenkhat ten an lo hmuak a, Pakistan sawrkar thuam lei saka inthuamin, ramri-ah hian Islamabad lama India thlawhna sipai aiawh Group Captain Joy Thomas Kurien leh Pakistan Foreign Office lama an director chuan an rawn hlan a, airport-ah hruai nghal niin IAF Embraer jet hmangin New Delhi-ah phurh chhoh nghal a ni.
Abhinandan hian Lahore-a Pakistan ISI-te thil neih chu a fak hle niin sawi a ni. Indian official te thung chuan vauna leh hnuaichhiahna hnuaia awm a nih avanga sawi mai a nih thu an sawi a, Pakistan PM Imran Khan-a’n inremna kawng a zawnna kawngah chhuah tura a tih chuan nghawng a neih phah an ti bawk. Senior official pakhat chuan hetiang zawnga Pakistan lamin thu an sawitir hi, “Geneva Convention palzutna nasa tak a ni,” tiin, Pakistan media ten he video an nei mai thei chu dik a tih loh thu a sawi.
India Ministry of external affairs chuan Pakistan foreign ministry hnenah aircraft hmanga phurh luh an dil a, Lahore leh Islamabad a remchang zawkah thlawhna tirh an dil a; mahse, Pakistan lam hian a remti lo.
IAF pilot hi man a nih tlaiah Lahore-a hruai nghal niin, ISI hmunpuiah hian hun engemaw chen kawl a ni a, he hmun hi Pakistan thuneituten a thusawi an record sakna hmun pawh a ni. India official-te chuan he video hi nasa taka siam that niin an sawi. Abhinandan hi ziakin a thusawi pawh hi dah tir niin an sawi a, hei vang hian India pawh a rawn luh tlai phah niin ngaih a ni.
India sawrkar chuan mi tam tak hmuh theiha Pakistan-in Abhinandan an chhuah tir chu a dem a, India chuan hei hi a tir atanga a duh loh a nih avangin thlawhna hmanga phurh haw hi an duh. Air Vice Marshal RGK Kapoor chua, “Wing Commander Abhinandan Varthaman hi nih phung pangai tur angin min hlan lo. Medical check-up tluantling nen endik nghal a ni ang, a chhan chu thlawhna atanga inperhchhuak a nih avangin a taksaah harsatna a nei ngei dawn. IAF chu ani kan neih let leh avang hian kan lawm,” a ti.

Wg Cdr Abhinandan Varthaman-a tih hmasak tur

1. Wg Cdr Abhinandan Varthaman hi Integrated Check Post atanga hlan a nih hnuah Indian Air Force Intelligence Unit lamah hruai tlang nghal a ni.
2. A taksa mai bakah a rilru lamah harsatna a nei em tih hriatna turin medical exam a tih ngei a ngai dawn.
3. Pakistan sipai lam hian a taksaah phum ruk an nei em tih hriatna turin amah hi ‘scan’ vek tur a ni.
4. A rilru lam a fel tawk em tih chian turin (psychological examination) a paltlang ngei a ngai dawn a, dinhmun chhe tak hnuaiah hmelma te awp rama tla lut a nih avangin eng harsatna nge a tawrh tih hriat a ngai a ni.
5. IAF pilot hi Intelligence Bureau leh Research and Analysis Wing (R&AW) chuan zawhna an zawt mai thei bawk.
6. Hemi hnu hian IAF lam chuan debriefing an neih pui ngei dawn. Hetah hian Indian Air Force-a officer senior te a hmachhawn ang a, man anih chhunga a thil tawn hrang hrang atangin hriat tur pawimawh bakah lehlamin an lo dawnsawn dan kimchang te hriat an tum dawn a ni. Hemi tih zawh a nih hnu hian Air Force lam hian Wing Cdr Abhinandan hi thlawhna khalh leh turin a ‘fit’ tawk em tih thutlukna an siam ang.