Mizoram Super League Play in game khatnaah chu ni 4, July thawhtanni zanin dar 8:30 khan khelh tan a ni a, league-a pathumna Mission veng Hotshots chu pali-na Tuikual South ten point 10-in an hneh. 

Play In khel tur hian league-a point hmu sang team li an lut chho a, anni pali hian final lut tur an zawng leh dawn a ni. Play In kalphungah hian pali-na Tuikual South hi chak mah se semi-final lut turin game hnih khelh an la hmabak a, chuvangin pathumna Hotshots lam pawhin lehthal turin chance khat dang an la nei a ni.

Tuikual South lam hi game hnihnaah an chak leh a nih chuan semi-final-ah Zarkawt BCA emaw Khatla TBL chak lo zawk an tum leh ang a, an chak chuan final an lut ang. Play In Game-2 na hi July ni 5, thawhlehni zan dar 8:30-ah pakhatna Zarkawt BCA leh pahnihna Khatla TBL ten an khel ang a, Zarkawt BCA an chak chuan final an lut nghal ang.  

Inkhelh tan tirh atangin inkhel a hmuhnawm nghal a, zan dang zawng aiin Hotshots an hot thei lo. Fans nei tha Tuikual South lamin a ngaite bawkin au phurtu fans an ngah leh a, tin semi-final lut turin an tan chak ngei a ngaih bawk avangin inthlahdah thei an ni lo. Team hnih ten theih tawp an chhuahin an khel tih a hriat a, quarter khatna hian Mission veng lamin 21-20 in hma an hruai. Second quarter-ah Tuikual South lamin point hnihin an rawn lehthal ve thung. First-half khelh zawh a nihin Mission Veng Hotshots lamin point 39 hmuin Tuikual South lamin point 40 an hmu thung.

Chawlhlawk an zova, third quarter khelh chhunzawm a ni. Tuikual South lamin game thununin point 24-17 zetin hma an hruai. Quarter hnuhnung berah team pahnih ten point an score thei a, Tuikual South lamin 30-28 a hmahruai lehin huntawp dar a rik meuh chuan 94-84 in Tuikual lamin hma an lo hruai hma.    

Tuikual South tan an foreign player Darrell Bowie a chetha hle a, point 37 leh rebound 20 a nei a, Mizo player zingah Dennis Lalmuanpuia'n point 18 leh rebound 15 neiin double double a nei Lalnunpuia'n point 21 a nei bawk.

Mission Veng Hotshots tan foreign player Joshua Aaron Keyes chuan point 31 thawk chhuakin a thian te atangin Lalrozama point 25 leh Eddie Zaithanmawia'n point 11 an thawkchhuak bawk.

                                     TT Prd 1 Prd 2 Prd 3 Prd 4
Mission Veng Hotshots  84    21    18   17   28
Tuikual South                94    20    20   24   30

Players Statistics

MISSION VENG HOT SHOTS
Joshua Aaron Keyes - 31 pts - 14 rebounds - 7 assists - 4 steals.
Lalrozama - 25 pts - 4 rebounds - 1 block - 2 assists - 1 steal.
Eddie Zaithanmawia - 11 pts - 7 rebounds - 3 assists - 1 steal.

TUIKUAL SOUTH BC
Darrell Bowie - 37 pts - 20 rebounds - 8 assists - 2 steals.
Lalnunpuia - 21 pts - 2 rebounds - 1 assist - 3 steals.
Dennis Lalmuanpuia - 18 pts - 15 rebounds - 1 block - 4 assists - 1 steal.