Aizawl January 21, 2024 : Police officer chawl tawh (retire), sawrkar motor kawl zui leh police kawl (chhawr) zui chungchangah sawrkarin hma a la a, “Heng hi thil dik lo leh pawm theih loh a ni,” tiin Home Commissioner order-ah tar lan a ni.

Home Commissioner H. Lalengmawia’n tun hnai khan police officer, an pension tawh hnua sawrkar atanga mihring tha chakna, sawrkar motor etc, hman chhunzawm chungchangah thupek (order) chhuahin, “Service atanga an retire veleh heng hamthatna an dawn hi an hnukdawk vek tur a ni,” tih a tar lang.

Thupek chhuahah chuan police officer retire tawh mi thenkhatten an pension tawh hnuah pawh sawrkar motor leh driver etc., te mi mal hamthat nan an hmang chhunzawm tih sawrkarin a hria tih tar langin, “He thil hi dik lo leh pawm theih loh a ni a, sawrkarin a la urhsun hle,” a ti.

Zawm nghal tura tar lante - police officer service-a awm laia hamthatna hrang hrang - heng mi mal ina awmtir te, motor leh driver te, mi mal security etc, te a rang thei ang berin service atanga an retire veleh an hnukdawk tur a ni. Police officer-te hnenah state security review commitee remtihna la hmasa lovin PSO pek tur a ni lo.

DGP, Mizoram chu a hnuaia officer-te laka khauh taka order kengkawh nghal tur a hriattir a ni bawk.