Aizawl June 2, 2024 : Mizoram Pradesh Congress Committee chuan, “Kan police mi 1,047 zetin vote an thlak phalsak ni lova, an Democratic Right, ‘Right to Vote’ palzut sak an ni ta mai hi a pawi tak zet a. Hemi chungchangah hian a mawhphurtu bul ber chu tuna kan hrawn mek ZPM sawrkar hi a ni,” an ti.

Nimin khan Aizawl Press Club-ah chanchinbumite kawmin MPCC Legal Department chairman TT Zothansanga chuan, “Election duty tura Mizoram pawna thawn chhuah kan police 1,047 laiin vote an thlak ve thei dawn lo a ni tih kan hriat veleh Chief Electoral Officer, Mizoram hnenah lehkha ziakin kan police-ten vote an thlak ve ngei theih nana hma la vat turin kan ngen a. Amaherawhchu, Election Commission of India-in Rule 18A of Conduct of Election Rules ang baka special arrangement siam a rem tih loh avanga kan police-ten vote an thlak nana hma an lak theih loh thu chhanna kan hmuh avangin kan lung a awi lo hle a ni,” a ti.

“ZPM sawrkar hian kan police-te chanvo, ‘Right to Vote’ hi ngaihpawimawh sak ni se chu Rule 18A anga vote an thlaktir phawt hnuah state pawna duty turin an tir chhuak mai tur a ni a. ECI emaw, home ministry emaw thu a nih avang ngawta mipuite chanvo namnul a thil tih hi state puitling tih dan tur a ni lo a. Kan police-te chanvo humhimsak duh lo leh humhimsak tura thu dik tan ngam lo ZPM sawrkar hi kan dem a ni,” a ti.

TT Zothansanga chuan police vote thlak theih loh thu-ah hian Gauhati High Court-ah an kal tih sawiin vanduaithlak takin high court-in an ngennate a tihhlawhtlinsak thei lo niin a sawi a. All party-in police-ten vote an neih nana lehkha an thehluhah ruling party ber an tel lo chu mak an tih thu a sawi bawk.