Aizawl January 19, 2024 : Congress party chuan Friday Political Session an hmang a, MPCC Sr. Vice President Lal Thanzara chuan thu sawiin, “Politic hi tihfuh tum tan ni lo, ram leh hnam vei mite tana khelh chi a ni. Tihfuh tum te chu party hrang hrangah an zuang lawr dun dun a, ram leh hnam tan an chhenfakawm loh a ni. Kan sawrkar loh vanga party danga awm kual te kha a malsawm lo a, nghet takin i Congress ang u," a ti.

Patea chuan, "ZPM ten MLA thahnem tak neiin rorelna an chang a, mipui in enchhin an duh a, tunah hian kan enchhin chho mek a ni. Chuvangin Congress party mi leh sa te pawn he enchhinna hi hmang tangkai turin ka duh che u a ni. Kan sawrkar loh avangin zam mai lo ila, hmalam pan nan i hman ang u. Pathian hun ruatah Congress Party hi ram hruai turin min ruat rih lo tih pawm ila, i zam lo ang u. Keini chu Pathian zai ngai, Pathian hruaiin kan kal ang," a ti.

Congress Sr. Vice President chuan, “ZPM sawrkar kan hrawn mek hi kal dik an tum hle a, chutih laiin hun kal tawhah Valupa Council thu an zawm loh dan te ngaihtuahin an kal dik a rinawm lemloh a ni. Inthlanah khan BJP pawisa an hmang tih te sawi a awm a, an hman leh hman loh chu kan hre chho zel dawn a ni. Chuvangin an kal dan hi ngun takin kan thlir zel dawn a ni” a ti.

Lal Thanzara chuan, "Mizoramah pawh Congress party hian Mizoram tana rohlu tam tak dintu kan ni a, Hydel Project tam tak kan din te, Lengpui Airport te kan siam a, Medical College thlengin kan din a, mi hian an hre duh anih chuan hmasawnna tamtak kan thlen a ni," a ti bawk.