- Vanhnuailiana, Ph - 9862482761

He kan rama politics kan hriat tanna leh he tawngkam lo pianna chu kum 1946-a lo piang ‘Mizo Union’ party a lo din tan atang khan niin a hriat theih a. Politics tih tawngkam hi Zopa (thingtlangpa) hriat dan tlangpuiah chuan political party tihna a ni ber a. Chu hriatna dan chu tun thleng pawh hian mimir thinlungah hian a la cheng niin kan boruakah hian a lang.

Pathianin lei leh van a siam hnu - nungcha leh thing leh mau te chena tha taka enkawl tura Evi leh Adama te hnena mawhphurhna Pathianin a lo dah kha politics intanna chu a ni a. He tawngkam khat ‘POLITICS’ tih hi chu Greek philosopher Plato-a (BC 428/427-BC 348/347) rawn sawichhuah a ni a. Plato-a hi Aristotle-a te nena Grik zirtirtu ropui Socrates-a hnuaia inzir an ni. Tichuan politics awmze bul chu a fiah thei mai awm e.

Zofaten politics awmze hre lova kan kalpui hun chhung hi kum 78 (sawmsarih leh pariat) lai a lo ni ta a. Vawiin (vawiin ni ni lovin) thleng hian political party-a hruaitu leh inti senior pui pui zingah politics awmzia hre lo ni mai awma langa mahni tana hlawkpui tuma phe phe; politics hi a khelha khelh, tang tang awma beih chi nia ngai tlat kan la tam mai hi a vanduaithlak hle a ni.

Politics hi infiamna thil a ni lo a, ram leh hnam leh sakhua leh thilsiam dang te nena him leh zalen taka kan chen tlan theihna tura Pathianin min pek a ni. Pathian tel lovin engmah kan ti thei lo a. Kan rama politics buaipuitu zinga a tam zawk hian Pathian thu hi chu an dah pawn lang thin hlein a hriat hi a pawi em em a ni.

Hebrai bung 4:12-13-ah chuan hetiangin kan hmu, “Pathian thu hi a nung a, thil a ti thei a, khandaih hriam tawn eng ang ai pawhin a hriam a, nunna leh thlarau, ruhtuah leh thling phel hrang thei khawp hialin a chhun thei a, thinlunga ngaihtuah leh tum te hi a hre nghal thei a ni. Thilsiam ama mithmuha lang lo reng reng a awm lo; kan chanchin kan thlenna tura mithmuhah chuan, engkim saruak leh inhawng sain a awm zawk a ni,” tih kan hmu.

Zofate hian kan pi leh pu atanga Pathian kan hriat lohna leh, Pathian kan zawn danah, a tlawn a tlawn zawng leh inthawi zawnga kan lo kalna leh; khua leh khua mihring nun inlaksak an lo chinna avanga, hmun him zawka ngaia tlang sang lama kan lo chen thinna hian tunlai khawvel hunah hmasawnna lamah min hnukhniam thui hle.

Khawvela hnam changkang zawk te kan en chuan, hmun hniam lamah inbengbelin hmun sang lam atangin englai pawha an mamawh tui thianghlim te, thing leh mau te awlsam leh hahdam zawkin an la thei a ni.

Politics chuan hmasawnna tha zawk te, nun changkanna leh awlsamna tha zawk te a keng a. Hnam changkang zawk te remchanna ang hmang ve thei lova kan khawsak dan phung hian politics hriatna leh zirna lama kan hniam zia pawh a tilang chiang hle.

   Tum khat chu, pa pakhat, political party lian ni thin Mizo Union party mi titi ka ngaihthla a, a thu bul tan nana a kamchhuak hmasaah chuan, “Kan rama politics a lo chhuah tirh lai khan...” tih tawngkam a hmang a. Thu a han sawi zui zel atang chuan political party hi a politics lai ber niin a ngai tih a hriat theih a. Khawi khawi emawa inhmuhkhawmnaa titihonaah hian a chunga ka han sawi pa anga politics nihna leh awmzia man lo, zopa fing tak tak hi kan awm thei dawn a lo niin a lang.

   Heng atang hian politics awmzia tak tak chu a hriatfiah theih ang a. Chutihlai vek chuan politics tuipui tam takin politics awmzia an hriat loh dan pawh a hriatfiah theih bawk a. Politics awmzia kan hriat loh hi kan ram leh mipui hmasawnna daltu lian tak a ni a. Chhiartu ten politics awmzia tak tak kan hriat phah a, hma kan sawn phah theih ka beisei.