Aizawl September 9, 2023 : Comptroller and Auditor General of India chuan Kolasib, Mamit leh Champhai district a Polytechnic din chungchangah Mizoram sawrkar in thawktu tur a lak loh avanging vaibelchhe 24 zet a luangral niin a tarlang.

August ni 23,2023 a Comptroller and Auditor General of India report, Assembly house a pharh takin a tarlan danin Ministry of Human Resource Development, Higher Education Department chuan polytechnic la awm lohna district pathum Kolasib, Champhai leh Mamit district a polytechnic pakhat theuh dinna turin December 2008 atanga August 2009 inkar khan vaibelchhe 36.90 a ruahman a. Polytechnic pakhat din nan hian vaibelchhe 12.30 zel ruahman a niin vaibelchhe 8 hi a building sakna (civil works) atan a niin a dang vaibelchhe 4.30 hi lehkhabu leh hmanraw leina tur atan a ni. Polytechnic hian a tum ber chu Civil, Electrical, Mechanical Engineering, Computer Science and Engineering ah te thiamna zirtir a ni.

Director, Higher & Technical Education chhinchhiah danin polytechnic sakna tura ruahman vbc. 36.90 atang hian sawrkar laipui chuan vbc. 33.27 chu a pe chhuak a. August 2010 atanga October 2011 inkar chhung khan Mizoram PWD hnenah Polytechnic building sakna atan vaibelchhe 24 pek chhuah a ni a, a la bang vaibelchhe 9.27 erawh zirna hmanrua, khawl leh lehkhabu leina atan Finance Department chuan an la kawl a ni. Building sa tura ruat PWD hian April 2013 atanga June 2016 inkar chhung khan vbc.24 hmang hian building sak hna hi an thawk a ni.

Audit report tarlan danin heng Polytechnic te hnathawk theia siam tur chuan thawktu lak a ngai a, polytechnic thar 3 a hnathawk tur mi 113 la tur hian March 2018 khan Council of Ministers meeting ah thlen a ni a. A hnu June 2018 ah polytechnic pakhata thawktu mi 6 zel awm turin post 18 siam dilna thlen leh a ni, hei pawh hi  tih hlawhtlin a ni ta lo a. State sawrkarin polytechnic thawktu tur a dah theih loh vang hian awmze awm lovin vbc.24 chu hmanral a ni tih a tarlang.

CAG report chuan Mamit polytechnic building thenkhat chu Jawahar Navodaya Vidyalaya school atan hman niin an sawi a. Champhai polytechnic chu tui herh hawna leh eng pekna vuah a ni lo tih a tarlang a. Hei bakah rukru ten thil an rukbo bakah bungraw thenkhat chu a chhia niin a sawi a. Kolasib polytechnic ah pawh tui leh eng pek a ni lo niin a tarlang bawk a ni.