31, December; Kum 600 chhunga Pope atanga bang awmchhun Pope Emeritus, Benedict XVI chu Inrinni chawhma khan Vatican-ah a thi tih an thupuangtu Matteo Bruni chuan a sawi.

"Hreh tak chungin Pope Benedict XVI chu kum 95 mi niin Mater Ecclesiae Monastery, Vatican-ah a thi a ni," tiin Bruni chuan a sawi a ni.

German mi Joseph Ratzinger tia piang Pope Benedict XVI hi February 2013 khan bang mahse Vatican-ah a awm zui reng a, a hriselna tlahniamin Nilaini khan a hniam zuala, Pope Francis chuan tawngtaipui turin thu a chhuah hial a ni.

A ban hnu khan Vatican chhungah hian Pope Benedict hi awm zuiin Pope pahnih Vatican-a a ruala an khawsak vawi khatna a ni nghe nghe a. A taksa leh rilru lamah harsatna a tawh avangin khawvel pum huapa Catholic hotu ber a nihna chu 2013 khan a lo chawlhsan tawh a, Pope Francis hian a thlak ta a ni. 

Pope Benedict-a vui hi Vatican-ah a nih rin a ni a, Pope Francis-an a kaihhruai beisei a ni.

April ni 16, 1927, Bavaria-a  piang Benedict kha theologian thiam tak niin a hunlai khan puithiamte'n naupang an khuaikhem thuthang vangin Vatican chuan sawisel a hlawh phah hle a, khami hun chhung khan hruaitu ni zo lo tia puhna  Benedict hian a tawk nasa hle. 

Kum 2005 khan Pope John Paul II chu Pope anga thlakin khatih lai khan kum 78 mi a ni tawh a bawk a ni.