Aizawl: April 1, 2021 atanga hman tan turin Mizorama power hman man chu 20.68%-in tihsan a ni a. Tun dinhmuna power unit khat hman man chawhrual chu Rs. 5.56 a ni a, tariff tharah chuan power unit khat hman man chawhrual chu Rs. 6.71 a ni dawn a ni. 

Manipur leh Mizorama êng chhit man bithliahtu, Joint Electricity Regulatory Commission (JERC) chuan êng chhit man thar tur chungchangah hian March 19, 2021 khan Aijal Club-ah public hearing neiin êng chhit man chungchanga Power & Electricity Department rawtna leh mipui sawiselna awm ang angte an ngaithla a. P&E department hian power hman man hi 41.92%-a tihsan an rawt a, P&E department rawtna ang hi chuan tlang ta se êng hman man hi chawhrualin unit khat Rs. 8.26 a ni ang. Public hearing-ah hian tariff thar chungchang ziaka sawiselna hi ZPM party chiahin an thlen a. Anni bakah hian power hman man tihsan chu mipuite tan phurrit a nih thu Central YMA President Vanlalruata leh consumer activist Lallunghnema ten an sawi bawk.

Power & Electricity Department hian kum 2021-2022 chhunga inrelbawlna senso (ARR) atan vaibelchhe 659.58 phalsak turin JERC hi an dil a; mahse, JERC chuan ARR atan hian vaibelchhe 478.11 a remtihsak a ni. Commission-in ARR a bituksak avang hian P&E dept.chuan êng pek nan hian unit khat zelah Rs. 8.23 a mamawh a, sawrkarin subsidy a pek dawn avangin tlawm zawkin mipui hnenah êng a pe chhuak thei dawn a. Sawrkar chuan subsidy hi unit khat zelah Rs.1.52 a pe dawn a ni.

Kum 2021-22 financial year chhung hian Mizoramin êng (power) 546.69 million unit (MU) hmang tura beisei a ni a, heta tang hian revenue vaibelchhe 366.87 an hmuh beisei a ni a. Mizoram chhunga hman bak, phai lama hralh tura beisei chu 78.29 MU a niin phai lama hralhna atanga sum hmuh beisei chu vaibelchhe 28.28 a ni.

Sawrkar laipui chuan ni 31.12.2020 khan dan thar ‘Electricity (Rights of Consumer) Rules, 2020’ ti chhuakin hemi dan thar ang hian smart meter emaw pre paid meter hmang lo tan chuan connection thar pek tawh loh tur a ni a. Tuna kan hman mek degital meter pawh hi smart meter/ pre paid meter a thlak vek tur a ni. Smart meter-ah chuan consumer in awm hmun atangin a hman zat leh bill a chawi zat tur a hre thei tawh dawn a. Meter reader te pawhin consumer-te ina kal kher lovin an hman zat leh chawi zat tur an hre thei dawn a ni.

JERC chuan Mizoram power hman man thar hriattirna hi Zirtawpni khan an tichhuak a ni.