ZALEN, Nov. 7, 2024: KTP member-te malzaia an intihsiakna, Praise On 2024 Top 10 chu Ningani zan atang hian intihsiak tan a ni dawn a, lengkhawm hlain an intihsiak tel ang.

Synod Information & Publicity Department (Synfo) leh Central Kristian Thalai Pawl (CKTP) tangdun buatsaih, Praise On Top 10 intihsiak hi Centenary Hall, Dawrpui Kohhran, Aizawlah neih tur niin zan hnih a awh ang a, a zan hnuhnung zawkah result an puang nghal ang a, Top 5 thlan a ni ang.

Top 10-a tlingte hi zan hmasa zawkah lengkhawm hla hmangin an intihsiak dawn a, hla hi thlan sa panga awmin an sak tur an pawt dawn a ni.

Zan hnihna erawh anmahni hla duhthlan hmangin an intihsiak ve thung dawn a, an zai zawng zawng hi live music-a rem vek tur a ni ang.

Intihsiakna hmachhawn tur hian zaithiamte pawhin musician tura ruatte ngawrh taka inbuatsaihna an kalpui a. Musician turte hi Madawnga (bassist), George (keyboardist), Moses (guitarist), Elvis (keyboardist) leh Victor (drummer) te an ni.

Praise On 2024 hi district hrang hrangah audition round neih hmasak niin a tlingte chu October 14-16, 2024 chhung khan Saron Veng Kohhran, Aizawlah intihsiakin heta tang hian Top 30 thlan an ni.

Saron Vengah vek hian Top 30 intihsiakna chu October 24-25, 2024 chhung khan neih chhunzawm niin sound track hmangin an zai a, Top 10 thlan chhuah an ni.

Kumin Praise On-ah hian pakhatna lawmman Rs. 1,20,000; pahnihna Rs. 70,000 leh pathumna Rs. 50,000 niin, Top 5 chinin Rs. 15,000 an dawng ang a, Top 10-a tling dangten Rs. 10,000 theuh an dawng bawk ang.

Praise On 2024 Top 10:

1. C. Lalthanmawii, Luangmual West Branch

2. Lalruatsangi, Sihphir Branch

3. Lalthlanawma, Ramnhlun Branch

4. Maria Lalmuanpuii, Chhiahtlang Bazar Veng Branch

5. P. Vanlalhriatpuia, Chaltlang South Branch

6. Ramdingliani, Bethlehem Branch

7. Sailokima, Kulikawn Branch

8. Saizampuii, Tuikual North Branch

9. Samuel Lalmuanchhana, Armed Veng Branch

10. Zaithanmawii, Kolasib Vengthar Branch