Aizawl September 13, 2022 : Sawrkar laipui flagship programme kalpui mekah India ram puma Electric eng chhit man chawi dan tur hi pek lawk (pre-paid system)-a leh vek tura ruahman a ni. Mizoram chhunga consumer meter zawng zawng pawh pre-paid smart meter-a thlak vek turin hma lak mek a ni a, ruahmanna ang hi chuan Bill ba nei chu chawp leh chilhin tih thim nghal a ni dawn a ni.

Vawiin khan Mizoram Sawrkar Power and Electricity Department-a Engineer te tan hemi chungchang zirhona National Power Training Institute buatsaih a ni. Mizoram chuan he metering scheme kalpuina tur hian Ministry of Power atangin cheng vaibelchhe 173.63 sanction a hmu tawh a ni.

Internet Service provider te angin DBFOOT (Design Build Finance Operate Own and Transfer) model hmangin Advance Metering Infrastructure Service Provider pakhat P&E Department hian a ruai ang a. Anni hian Pre-paid-a eng chhit man top-up mai theihna tur thil tul an ngaihtuah dawn a ni. Smart meter hman tan a nih hunah control centre atangin meter disconnect leh reconnect a tih theih tawh ang. Bill ba chu chawp leh chilhin a hmuna kal kher ngai lovin tih thim nghal theih a ni dawn a ni. Consumer-in a hman tawk te te in a eng chhit man zat tur thla khatah vawi 2 emaw vawi 3 te pawh a top up theih tawh dawn a, thla tawpah a hlawma pek theih a ni tawh lo ang.

Smart meter prepaid mode kalpui a nih hunah meter reading lak atanga bill siam thlengin mihring an inrawlh thei tawh dawn lo a, bill siam sual lakah thui tak a veng thei tura beisei a ni. Mobile apps hmangin electric eng chhit man pek lawk tawh tur a ni dawn a ni.