Aizawl: Mizoram Journalists’ Association hruaitute chuan tunhnaia Mizoram rawn tlawhtu Union DoNER Minister Dr. Jitendra Singh leh BJP President Pu Amit Shah te hmu in chanchinbumi te chenna tur ‘Press Enclave’ a hma an lak mek chu NEC emaw DoNER emaw, a theih theih dana ti hlawhtlinsak turin hmaichhanah an titi pui a, an puihna ngenin anni chuan puih an inhuam thuin an chhang a ni. Press Enclave hi Mizoram sawrkar chuan a tak a chan theih nan Planning kutah a dah tawh thu MJA hruaitute chuan an sawi bawk. Press Enclave chungchangah hian MJA hruaitute thu thlen hi Union DoNER Minister chuan a dawhkan a thlen hunah lo enzui a tum thu a sawi a. BJP President Amit Shah pawhin MJA President Vanlalrema Vantawl hnenah a puih tur thu sawiin, “Theihtawp ka chhuah ang a, DoNER Minister Dr. Jitendra hnenah project chu keimah ngeiin ka pe anga theihtawpin ka lo sawi bawk ang," tiin a lo thlah a. Hei vang hian an chungah MJA General Headquarters chuan rinna leh beiseina sang tak a nei a. Press Enclave hi a hlawhtlin ngei a ring tlat a ni. MJA chuan Doner Minister leh BJP President te chu ipte chei leh Mizo kutchhuak dang te inngaihhrui nan an hlan bawk.