Aizawl; Nimin khan Aizawla chanchinbumi thenkhat chuan National Highway No. 6 siam mek an tlawh a. National Highway Infrastructure Development Corporation Ltd.-in kawng an sial mekah Saitual DC chuan leivung paihna tura ruat ‘spoil bank’ ni lova an paih avangin environment a chhe nasa tih press mite a hrilh.

Kawng laih mek tuartu pa pakhat chuan a eizawnna thin chu kawng laih vangin a chhe vek niin a sawi a. “Chakai leh sangha ka manna thin lui chu leivungin a hnawh vek a. Kan leilet tui lakna pawh leivungin a hnawh avangin buh pawh kan ching thei tawh lo a ni,” a ti a. Kawng laitute hian an ram an tihchhiatna man pawh an la pe lo niin a sawi bawk.

Press mite hian Saitual DC VL Hruaizela Khiangte pawh an kawm bawk a. DC chuan leivung paihna tura ruat ‘spoil bank’ ni lova an paih avangin environment a chhe nasa tih press mite a hrilh a, “Km 2 dan velah spoil bank hi kan ruahman vek chungin kawng laitute hian an remchanna hmun hmunah an paih mai niin a lang a. Spoil bank pawh hi a dawlna fel tak retaining wall siam tur a nih laiin an siam lo a, hei hian nasa takin thil a tichhia a, sawiselna pawh a tam hle a. NHIDCL hian an hnuaia contractor-te hi an control lo niin kan hria a ni,” a ti.

DC chuan contractor-te kawng laih dan a dik loh avangin mi pahnihin nunna an chân tawh niin a sawi bawk.

Thuthar lakhawmtute hian Zemabawk dai atanga Keifang thleng kalin NHIDCL-te kawng laih mek hi chipchiar takin an tlawh a. Leivung paihna tur hmun bik ruahman tur a nih laiin kawng laitute hian an remchanna hmun apiangah leivung hi an paih niin an hria a. Hei hian thing leh mau tam tak a tihchhiat mai bakah luite tam tak a hnawh bawk.

ZALEN thudawn danin NHIDCL hian Mizoram chhungah project 27 khawih mekin kawng km 736.36-a thui an lai mek a. Project an thawhna atana sum ruahman zat hi Rs. vbc 14,944,829 a ni.