Tata Yodha 4x4 LPS Pro Fight tel tum tan form pek chhuah mek a ni a, boxer mi 140 chuangin an tel tur an tichiang tawh a, August ni 20 thleng hawn a ni ang. August 31 khian R Dengthuama Indoor Stadium, Mualpui-ah tan a ni ang. 

Ningani thlenga form theh lut tawh boxer 143 zingah Mizoram district hrang hrang atanga title chuh tum bakah, a duh apiang tel theih a nih angin thenawm Assam leh Manipur state atanga tel tum an awm bawk.

Thil kalphung pangngai angin a dawn hnaiah tel tum an pung tura ngaih a ni. Pro Fight hnuhnung ber 2019 khan Mizoram aṭangin champion lai nen boxer 194 an tel a, Arunachal Pradesh, Meghalaya, Manipur, Assam leh Sikkim atangin sawm bik 12 nen India hmar chhak state paruk atangin weight hrang pangaah boxer 206-in title an inchuh a ni.

Pro Fight tharah hian weight panga tho ni mah se tel an tam thin loh avangin middle leh lightheavy paih a ni a, Mizo tamna feather leh welter telh ni ve thungin champion-in Rs 50,000 ṭheuh an dawng dawn a, lawmman pawisa fai Rs 5,50,000 sem chhuah a ni ang.

Covid-19 leng avangin kum hnih chhung mumal takin infiamna kalpui theih a ni lo va, kum thum chuang hnuah Pro Fight chhunzawm leh tura tih a nih rualin Mizo boxer-te inhnek theihna tur leh tihhmasawnna tura ruahman a ni tih Organising Committee chuan an sawi.

August 31-ah R Dengthuama Indoor Stadium, Mualpuiah tan a ni dawn a, zanah vek inhnek huaihawt tura tih niin inhnek zan apiangin GIG Motors Fighter of the Night lawmman tha tawk tak sem a ni ang.

KT Enterprise chuan championship chhunga boxer tha ber hnenah lawmman hlu tham tak a pe dawn a, boxer mi mal lawmman dang leh referee leh judge tha ber lawmman a tum vek dawn bawk a ni.

RC Shirt House chuan official-te thawmhnaw tumsakin official shirt sponsor a ni leh dawn bawk a. Boxer-ten hma an sawn theihna tura Mizo sumdawngte inhawnna avangin Organising Committee a lawm hle a ni.