Mizoram Boxing Association (MIZBA) leh LPS Vision buatsaih LPS Pro Fight chua tluang taka khelh chhunzawm zel a ni a, Hawla Indoor Stadium, Republic Vengthlanga khelh mekah hian player hriat hlawh sa te an la inlan lo chungin mipui lamin an hlut sawt hle a, a zan telin entu pawh an pung zel. He intihsiakna hi ni 49 awh tur niin kar khatah zan nga intihsiakna hi neih a ni a, zan khatah hian bout 10 te awmin Mizoram hmun hrang hranga atangin player an fuankhawm a, tunah rih chuan thingtlang lam player tha tak tak an awm laiin a tam zawk chuan round sang zawk an paltlang zo lo. Zirtawp zan inhnek bikah, Lightflyweight-ah inhnek tum nga awmin, Armed Veng South boxer Malsawm-kima, Joe Zosangliana (Dinthar), K Vanlalduata (Ngopa), Jerry Lalrinpuia (Govt Complex) leh S Lalrindika (Ramthar)-ten an tumpui theuh an hneh a ni. Inhnek hmasa berah Sawmkima'n a hmachhawn Zuangtui tlangval B Lalhmunsiama hneh takin a thunun a, thiamna a nei tha zawk tih lantirin round thum a la fai vek a, unanimous decision hmangin 30-27, 30-27, 30-26 in Hmunsiama a hneh. Dinthar tlangval Joe Zosangliana leh Eddie Zoramhmangaihsanga (Chhipphir)-te an inbei tawk hle thung a, judge pahnih point pekah Zosangliana sang zawkin pakhatin Chhipphir tlangval a chaktir a, split decision-in Zosangliana a tlang hram. Boxer pahnihte hi mikhual tak ni lo mah se, thiamna tha tak an lantir tam lo ve ve a, an inhnek tam lo viau bawk. Round thum an inbeih zawh hnuin 28-29, 29-28, 29-28 in Dinthar boxer a chungnung hret a ni. Ngopa tlangval Duata'n Dinthar boxer dang Lalremruata a hneh viau thung a, round tin la vekin unanimous decision-in a chak. A tir atangin veikhawr Duata hian a nawr char char a, Remruata nen an inhnek tawn nasa hle a, Duata hian tharum a neih chhawrin a vai fuh tam zawk bawk a, 30-26, 30-27, 30-27 in a tlang. Govt Complex fighter Jerry Lalrinpuia pawhin unanimous decision-in Lalhmahruaia (Saitual) a hneh bawk. A tir lamah an inbeitawkin chungnung awm lovin an innuai tawk hle a, Veikhawr Rinpuia'n round khatna tawp lam atangin a dinhmun a siam tha a, a tawp thlengin Hmahruaia lakah a inhnek a thunun thei a, 30-29, 30-27, 29-28 in a chak a ni. Mipui lawm hlawh tak Lalrindika'n a khingpui Muanzova (Sesih) lakah round thum la vekin unanimous decision-in a chak. Ramthar Veng boxer che vel hian hall chhunga mipui a tihlim hle a, Muanzova'n nghet tha takin bei let mah se 30-23, 30-27, 30-27 in a chak. Zuanzang tak Rindika hi hruihrual chhuat kil tinah tlan kualin inveng mang lovin a khel na a, a khat tawkin rang takin Muanzova a hnek fuh thin a, mipui chawh phur nan a kotlanga awmte a kutin a hui pah bawk a, Sesih tlangval Muanzova'n thapuiin nuai chiam mah se Rindika khelh dan tibuai tur khawpin a inlan zo lo a ni. Bantam -ah inhnek vawi thum awm tura ruahman a nih laiin Rohmingliana (Saron Veng) chuan hahdam takin hnehna a chang a, Lalvenhima (Tuithiang) a inlan loh avangin inkhel hah lovin a chak. K Lalruatfela (Lawngtlai III) leh B Lallawmkima (ITI Veng) chuan second round an lut bawk a ni. Ruatfela'n round hnihnaah C Lalthlamuana (Saikhamakawn) hnek tluin, Pro Fight kal meka knockout hmanga chak hmasa ber dawttu a ni a, a tir lamah tawn hriat tlachham Thlamuana'n nawr hneh viau mah se round khatna an zawh hnu atangin a talbuai. Round hmasa ber an tan phat atangin Saikhamakawn tlangval Thlamuana'n a bawh nghal a, Ruatfela insiam remin round tawp lam atangin awmze neiin a kuttum a hmang thei. Round hnihna atangin Lawngtlai boxer a chungnung lehzual a, a ding lamin chiang zetin a hnek fuh a, Thlamuana talbuaiin a lu a hai hle a, referee K Laldawngliana chuan vawi riat a chhiar hnuah Saikhamakawn boxer-in bei zui leh mah se, ngai a awh lo va, a lu a la hai hle. Hetih lai hian Ruatfela'n nawr nghalin chiang zetin a hnek leh a, chhuatah Thlamuana tluin referee-in inhnek a titawp a, pawn lam atangin towel an vawm lut bawk a ni. ITI boxer Lawmkima'n tha takin a beihpui Zakhuma (Keifang) a thunun bawk a, unanimous decision hmangin 30-24, 30-26, 30-25 in a chak. Hall bul hnaia awm ITI mipui thahnem takin a hmunah Lawmkima thlawpin, an veng mipuite beiseina tihlawhtlingin Zakhuma hmaa Lawmkima a inlan a, tawn hriat nei tam lo Keifang tlangval lakah boxer tha zawk a ni tih lantirin judge pathum point pekah round tin a la vek a ni. Light-ah ST Vanlalchhuanga'n unanimous decision hmangin R Dengthanga (Zanlawn) a hneh a, he inhnek hian boruak a siamin zirtawp zana mipui lawm hlawh ber a ni. Hruihrual chhunga lut ngai lo Dengthanga'n theihtawpin tharum nen Chhunga bei tluan mah se thiamna leh theihna a tlakchham tuarin round tinah Chhuanga a chak vek a, 30-27, 30-27, 30-27 in a tlang. Round hmasa ber a zawh hnuah Zanlawn boxer-in a thutna haiin Chhuanga thutna turah a thut khalh a, heta tang hian mipui thawm a tha hle a, an inhnek chhung zawngin thiamna tha tak hmuh tur awm lo mah se tharumin an innuai nasa a, round thumnaah phei chuan Dengthanga'n vawi thum ngawt Lawngtlai tlangval a nawr tlu a, boxing mai ni lovin boxer pahnihte an inchai pah nghal a, an che vel entulamin an lawm hle. Middle-ah Pro Fight khel tawh Lalrinzuala (Buarpui) chuan H Lalnunfela (Mamit Lungsir) lakah hnehna chang hramin, split decision-in 30-28, 30-27, 28-29 in a tlang. Pian tha tak Rinzuala hian round hmasa ber thununin a hnek chhuak tha hle a, round hnihna erawh Nunfela insiam remin Buarpui boxer-in na tak a nawr laiin tha takin a chhang let thei. Mahse, tharum nei tha Rinzuala'n round hnuhnung lamah a dinhmun a siam tha leh a, second round a inhlangkai.