A umtu zawk ni chungin Serkawnin nilaini zan Ather Pro Volleyball League-ah set thum set hnihin Bungkawn an hneh a, pathumna ni chungin league an khar.

LPS Arena, Falkland-ah set khatna an hloh hnuah set hnih set khatin Serkawn hniam zui leh mah se Elisian Medai chuan team an fuih phur a, 13-15, 16-14, 11-15, 15-6, 15-13-in Bungkawn lakah an chak.

Hmeichhe team pangain vawi li theuh khel kim chiahin league zawh fel a ni a, an khelh hnuhnun vawi thumah Serkawn chak vekin point 11 an hmu a, palinaah Bungkawn awmin point 10 an thawk chhuak a ni.

Elisian chuan vawi thum chiah tisualin point 20 a hmu a, a vawi hnih nan Kuriz Player of the Match lawmman dawngin a kawppui captain R Laltleipuii'n vawi 12 a vaw tla a, point sarih a hloh.

Bungkawn tan F Lalparmawii'n point 16 hlawh chhuakin point ruk a paih a, Lalpekhlui'n tum 13 hlap tlain 10 a hloh ve thung. A tir lamah fuh takin an inkawp a, set khatnaah 12-8-in an sang.

A hnung atangin Elisian chuan a hlap tla a, 12-11-in Serkawnin an hnaih hman. Mahse, Peki'n a vuak tlak hnuah point hniha inthlau chungin set an la. F-i'n a hlap tlak hnuah set la zawn thei turin 12-9-in Bungkawn an sang leh.

Peki'n tisualin Bungkawnin point an hloh zawn a, Elisian chuan point hmu zawn ve thungin 13-12-in Serkawnin an lehpel. A hnuah Peki leh F-i'n an vaw tla zawn ve leh a, 14-13-in Aizawl team an sang ve thung.

2022 best spiker Elisian-i'n Serkawn hruai kirin a hlap tla a, Peki'n nam kai loin 15-14-in Bungkawn an hniam a, ho taka point an hloh zui avangin Lunglei team-in set hnihna an la a ni.

Set thumnaah Peki a langsar a, F-i'n awmze neiin point a thawk chhuak bawk nen Bungkawn kir lehin inkhel an thunun hle. Mahse, Serkawnin chak duhna an nei tih lantir thar lehin set linaah 10-5-in hma an hruai let.

Bungkawn player-te an tlo tawk lo va, lehlamin thahrui an nei tha a, phur nei tel bawkin chiang takin set lina an la a; set ngana pawh Lunglei team-in thunun zuiin 9-1-in hma an hruai.

Tawn hriat ngah zawk Bungkawnin bei letin F'i, Chinlunkimi leh Rody Lalzuiliani'n point hmu zawnin 12-11-in an hnaih hman na a, Kimi'n a vuak sual hnuah lehlam tan kawng hawngin Tleipuii'n point a hmu zui a, 14-11-in Serkawn an sang.

Bungkawnin tum hnih dang mah se 14-13-a nih laiin Kimi'n a vaw kai lo. Serkawnin hlim takin hun tawp an hmang a, semifinal-ah league-a an hneh loh awm chhun Diakkawn nen an inhmachhawn ang.

Vawi li an khelhah tum hnih chakin vawi hnih tho Bungkawn an tlawm a, semifinal-ah champion lai leh league-a sang ber Luangmual nen an intawng dawn a ni.

STATS

SERKAWN

Elisian Medai : point hmuh 20, point hloh 3

R Laltleipuii : point hmuh 12, point hloh 7

Evelyn Malsawmtluangi : point hmuh 1, point hloh 2

Elina B Lalenkawli : point hmuh 2, point hloh 0

Vanlalremruati : point hmuh 1, point hloh 3

BUNGKAWN

F Lalparmawii : point hmuh 16, point hloh 6

Lalpekhlui : point hmuh 13, point hloh 10

Chinlunkimi : point hmuh 8, point hloh 11

Rody Lalzuiliani : point hmuh 5, point hloh 3

RK Lalfakmawii : point hmuh 2, point hloh 1

POINT TABLE

LUANGMUAL : Play 4, Won 3, Loss 1, Point 14

DIAKKAWN : Play 4, Won 2, Loss 2, Point 13

SERKAWN : Play 4, Won 3, Loss 1, Point 11

BUNGKAWN : Play 4, Won 2, Loss 2, Point 10

DURTLANG : Play 4, Won 0, Loss 4, Point 2