LPS Arena, Falkland-ah Huntharin team thawh hona tha tak an lantir a, league-a an intawn tum ang bawkin semifinal-ah set an hloh lo va, 25-22, 25-23, 26-24-in an chak.

2019 champion Chhinga Vengin set hnihnaah 21-19-in hma an hruai hman a, set thumna la thei turin 22-18-in an kalsan bawk. Mahse, boruak sangah harsatna an tawk a, libero Lalhmingsanga che tha hle chungin an fei tawk lo va, Yougank Baliyan a mal tan nasa hle.

2017 leh 2018 champion Hunthar tan Anurag Rawat chuan vawi 23 vaw tlain point kua a hloh a, Fabian Lallunghnema'n vawi nga tisual chungin point 15 a thawk chhuak a, inbeihna tak takah an rin tlak.

Pro Volleyball chanchina team hlawhtling ber Huntharin kum zawnin final an lut a, nikuma an hneh loh Thutak Nunpuitu Team leh Tuichangral inkhel chak zawk nen zirtawpni zanah champion nih an inchuh ang.

Spikers tan Yougank chuan point 34 hmuin 11 a hloh a, mi malin che tha fal hle mah se a team-te set a lakpui zo lo va; amah thlawp thei ber Lalramhluna'n set hnihna atangin a khel a, tum riat hlap tlain vawi thum a tisual.

League-a an inkhelh tum aiin Chhinga Vengin hma an sawn na a, tawn hriat tlachham Mizo player-ten vuak tlak an harsat avangin awmzia a nei tham lo. Yougank a rim hle a, set khatna bikah point 11 a hmuh laiin a tanpui zinga amah hnaih ber Thangzika Pautu chuan point hnih a hmu.

Inrintawkna sang tak nen Huntharin bul an tan a, setter Remsangzuala'n ball sem rualin Lalnunfela'n a vuak tlak rualin 16-11-in set khatnaah an sang a; lehlamin an hnaih zo lo.

Set hnihnaah Chhinga Vengin na zawkin an nawr let a, 16-16 a nih hnuah an kalsan. Yougank chuan a vanglai hmangin a elpui Anurag aiin a langsar a, a hmaa ball chhuak hlap tla zelin 21-19-in Spikers an sang.

Huntharin an paukhauh zawk tih lantirin Fabian-a'n a vuaktlak hnuah Chhinga Veng spiker Ramhluna hlap an dansak a, an nih rual. A hnuah 23-23 a nih laiin Ramhluna'n a service sual a, Anurag chuan set an lak zawn theihna hun tha tihlawhtlingin sang tak atangin a vaw tla.

Chhinga Vengin tan hmun siam thar lehin set thumna la thei turin beiseiawm takin an khel a, Anurag leh Wilson Lalremruata'n an vuak sual zawn hnuah 22-18-in an sang.

Mahse, hun pawimawhah talbuai lehin Yougank tih loh player dangin vuak tlak an harsat a, Hunthar tan Fabian-a'n a hlap tlak hnuah Anurag chuan point thum hmu zawnin 22-22-in an nih rual.

23-22-in Chhinga Veng sang leh mah se Huntharin net chung atangin Yougank-a vuak an dansak a, inhnehtawk taka 24-24 a nih hnuah Yougank-a hlap dansak lehin Anurag chuan dan theih lohin a vaw tla ve thung a ni.

Hunthar player-ten ngampa takin an khel tluan thei a, C Lalhriatpuia'n tum kua vaw tlain point li a hloh a, Nunfela'n vaw khat chiah tisualin point ruk a hmu a, team tichak theiin an khel.

STATS

HUNTHAR

Anurag Rawat : point hmuh 23, point hloh 9

Fabian Lallunghnema : point hmuh 15, point hloh 5

C Lalhriatpuia : point hmuh 9, point hloh 4

Lalnunfela : point hmuh 6, point hloh 1

Wilson Lalremruata : point hmuh 5, point hloh 2

Remsangzuala (setter) : point hmuh 1, point hloh 1

CHHINGA VENG SPIKERS

Yougank Baliyan : point hmuh 34, point hloh 11

Lalramhluna : point hmuh 8, point hloh 3

Lalneihpuia Hrahsel : point hmuh 6, point hloh 5

Lalchungnunga : point hmuh 4, point hloh 2

Thangzika Pautu : point hmuh 2, point hloh 0

Lalrinhlua : point hmuh 1, point hloh 0

David Lalramhmachhuana (setter) : point hmuh 2, point hloh 2

FIXTURE - SEMIFINAL

May 28, thawhlehni 8:00pm :

TUICHANGRAL V THUTAK NUNPUITU TEAM (mipa)

FINAL

May 30, ningani 8:00pm :

LUANGMUAL V DIAKKAWN (hmeichhia)

Mipa final ticket man Rs 100, hall a leng bak luhtir an ni dawn lo.