ZALEN, June 02, 2026: Mizoram Rural Bank Pro Volleyball League hmeichhe team inelnaah Tuichangralin tha takin bul an tan a, an intawn hnuhnun ber aia awlsam zawk set thum faiin Chhinga Veng Spikers an hneh.

Pro Volleyball League-a la tel ngai lo hmeichhe team pali an inel a, chutih laiin Pro Division season hawnna tournament, nikum September khan final-ah set thum set khata Chhinga Veng hnehin Tuichangral an champion. 

Hmel thar zingah tun season-a hnuhma nei lian ber an nih avangin Tuichangralin rin an hlawh phah a; Spikers nen intawng leh nghalin inhnehtawk viau mah se inpumkhat leh inrem khawm fuh zawk an nihna an chhawr a, season hawnna tournament-a player tha ber, Remlalnghaki’n a khelh that chhunzawmin vawi 27 a vaw tla a, point riat paih tel mah se Kuriz Player of the Match lawmman a dawng.

Bungkawn player hlun leh setter tawn hriat nei, Melody Lallawmkimi’n tha takin Remremi leh player dang tan ball a siamsak laiin Chhinga Vengin Mizo spiker tha ber pawl, Elisian Medai kawl mah se ball a hmuh that loh avangin tum 14 hlap tlain point nga a hloh a; ball vuakah Tuichangral an chungnun zawk bakah Spikers-in kut dik zawk zawngin setter pahnih, F Lallianchhungi leh Lalkhumtiri Renthlei an inhman chhawk a, a tawp thlengin team nghet an nei thei lo.

Tuichangral tan 2024 Pro Volleyball best spiker ni tawh, Lalramliani’n vawi khat chiah tisualin point 16 a hmu bawk a, lehlam vuak dangtu ber ni telin Chhinga Veng rinrawl, Elisiani aiin hnuhma a nei tha zawk a, Remremi nen hnehna kawngah Tuichangral an hruai.

Elisian tih loha Chhinga Veng tana thawh hlawk, Zonunpuii’n vawi kua hlap tlain point thum a hloh a, mi mala che tha ve ve khaikhinin Tuichangral an sang.

Inkhel an tan rualin Remremi a langsar a, dan theih loha a vuak tlak laiin a elpui, Elisian chuan lang thama hlap tlak nei mang lovin set khatna a hmang zo va. Remremi’n a vuak tlak hnuah Melody-i service an la thei lo zui a, 24-14-in Tuichangral an sang a, Chhinga Vengin eng emaw chen dangin point sarih an hmuh zawn hnuah Dawrpui Vengthar nula, Remremi’n set an lakna point a vaw tla.

Set hnihnaah pawh Tuichangralin hma an hruai zui leh a, a tawp lamah Chhinga Vengin nawr let lehin 18-22-a hniam zawk an nih hnuah Zonuni leh Kimkimi ten hlap tlain Elisiani’n point a hmu zawn bawk a, 24-24 ni chhovin an deuce a. Hun pawimawhah Tuichangral tan Rami’n point hnih hmu zawna a vuak tlak hnuah Elisiani a dang zui bawk.

Set thumna tawp lam thlengin Remremi leh Rami ten hmun pawimawh luahin 18-12-in Tuichangral an sang a, Spikers tan a hma zawng aia hriamin Elisiani’n a khel thei a, set lak theih inbeiseiin 22-21-in an lehpel a. Boruak sangah Remremi’n vawi thum a hlap tlak kar lakah lehlam tan Kimkimi’n a vaw kai lo ve thung a, Tuichangralin point li hmu zawnin tlo takin an khel tluan a ni.

Team pahnihin India player tha la lut turin an dawr fel ve ve a, an khelh hmasak berah an chhawr hman loh avangin Mizo hlangin an inhmachhawn a. Zirtawpni zana ITI Veng nen an inkhelh hunah Tuichangral-in Tamil Nadu player Shaalini Saravanan chhawr theih tawh an inbeisei a, Nilaini zanah Chhinga Vengin India captain ni tawh, Anusree Kambrath Poyili khelhtir ngei an tum a, Eric Pautu Academy nen an inhmachhawn ang.

MIZORAM RURAL BANK PRO VOLLEYBALL LEAGUE 2026

May 11 - June 13, 2026 @ LPS Arena, Falkland, Aizawl

RESULT

Round 6 : June 01, 2026 (Thawhtanni)

Tuichangral def Chhinga Veng Spikers (hmeichhia)

25-21, 26-24, 25-22 (3-0)

Kuriz Player of the Match - Remlalnghaki (Tuichangral)

Cheetak Fan of the Night - Lalremtluangi (Chhinga Veng)

MVA Lucky Fan - Lalsawimawii (Chhinga Veng), Rinsangzuali (Chhinga Veng)

STATS :

TUICHANGRAL

Remlalnghaki: Point Hmuh - 27, Point Hloh - 8

Lalramliani: Point Hmuh - 16, Point Hloh - 1

VL Hmangaihzuali: Point Hmuh - 5, Point Hloh - 6

B Tlangmawii Varte: Point Hmuh - 2, Point Hloh - 7

Lalchhandami: Point Hmuh - 1, Point Hloh - 2

Melody Lallawmkimi (setter): Point Hmuh - 1, Point Hloh - 1

CHHINGA VENG SPIKERS

Elisian Medai: Point Hmuh - 14, Point Hloh - 5

Zonunpuii: Point Hmuh - 9, Point Hloh - 3

Lalbiakngheti: Point Hmuh - 4, Point Hloh - 4

Evelyn Malsawmtluangi: Point Hmuh - 3, Point Hloh - 1

N Lawmkimi: Point Hmuh - 3, Point Hloh - 2

Chinglunkimi: Point Hmuh - 2, Point Hloh - 4

F Lallianchhungi (setter): Point Hmuh - 2, Point Hloh - 0

POINT TABLE

ITI VENG GSA: Play 1, Won 1, Loss 0 (set lak 3, set hloh 0) : Point 3

TUICHANGRAL: Play 1, Won 1, Loss 0 (set lak 3, set hloh 0) : Point 3

CHHINGA VENG: Play 1, Won 0, Loss 1 (set lak 0, set hloh 3) : Point 0

ERIC PAUTU ACADEMY: Play 1, Won 0, Loss 1 (set lak 0, set hloh 3) : Point 0

FIXTURE

MIPA - Round 7

June, 02, 2026 (Thawhlehni)

8:00 PM : Thutak Nunpuitu Team v Khawbel

HMEICHHIA - ROUND 2

June 03, 2026 (Nilaini)

8:00 PM : Eric Pautu Academy v Chhinga Veng Spikers

MIPA - Round 7

June 04, 2026 (Ningani)

8:00 PM : Tuichangral v Sihphir

HMEICHHIA - ROUND 2

June 05, 2026 (Zirtawpni)

8:00 PM : ITI Veng GSA v Tuichangral

MIPA - Round 7

June 06, 2026 (Inrinni)

8:00 PM : Chhinga Veng Spikers v Hunthar