ZALEN, Apr. 09, 2026: Nomawi humhim thei turin Anastasia Electric Vengin season an tan tha a, a vawi thum nan Pro Volleyball League nomawi an la a nih chuan champion hnem ber an tluk dawn.

Season liam ta khan Pro Division-ah Anastasia an awm pha lo va; mahse, Pro Volleyball tournament tan dawnah playoff kaltlangin Hunthar Veng nen an tling a. League round-ah an derthawng hman a, Karthik Madhu-a chaw lutin boruak thar an hip a, a tum hnih nan Mizoram volleyball inelna sang berah an champion zui.

Electric Veng club hian tun season-ah team tha zawk neih tumin Mizo player langsar an la luh a, TNT rinrawl ni ngar ngar leh best blocker vawi li ni zawn lai, Zosangzuala bakah Tuichangral atangin spiker Zomuansanga an seng lut.

Nikum champion team captain Lalruatsanga leh player dang - Laldinsanga, Helly Vanlalliana leh setter Ramdintluanga an kawl chhunzawm a, veteran Laldensanga erawh Pro Volleyball-ah an chhawr thei dawn lo ve thung.

Mizo coach hriat hlawh, Pro Volleyball-a vawi hnih Hunthar champion-pui tawh leh nikuma semifinal lut, Khawbel enkawltu, Vanlalmawia an la lut bawk a. A hovin September khan season tanna tournament-ah champion nghalin final-ah 3-1-in a club hlui, Khawbel lakah Anastasia a chakpui a ni.

Tun season-ah Pro Division inelna vawi khat chiah a la awm a, Anastasia an champion bakah Pro Volleyball lo awm turah champion lai an nih bawk avangin rin an hlawh a. Chutih laiin Mawia chuan tournament dang nena khaikhin chi a ni lo va, Pro Volleyball champion ni turin vanneih tel a ngai hle tih a sawi.

Mizo player tha tak tak an neih avangin team tha tak an nei a, chuti chungin inelna a hausak tawh tih sawiin, team li vel el tham tak an awm dawn a, “Hnam dang player neih thatin awmzia a nei thui hle dawn a ni,” a ti.

India-in Asian Championship a thlen dawn avangin inbuatsaihna an bei ngawrh a, player tha 40 rual vel an koh avangin tun dinhmunah state dang atangin dang player tha lak luh mai tur hriatthiam a har hle tih Mawia chuan a sawi a, he harsatna hi an elpui team dang pawhin an tawk ve tho bawk.

Kum 2016-ah Pro Volleyball tan a ni a, Anastasia hi champion hmasa berin champion hnuhnung ber an ni leh mek a. Final-ah tum hnih inlan tawhin TNT an hneh ve ve a, May 11 atanga khelh tan tur Pro Volleyball-ah nomawi an humhim a nih chuan champion hnem ber, Huntharin an lak zat vawi thum an nih rual dawn a ni.