ZALEN, May 03, 2026: Khawbelin awlsam lo takin Thutak Nunpuitu Team lakah league an khar a, chak nan set nga an mamawh hnuah Thawhlehni zan khan Mizoram Rural Bank Pro Volleyball League semifinal an lut.

Mizoram volleyball hranghluite puala hun hmanna inkhelah an dinhmun tichiang turin Khawbelin chak an mamawh a, a mawnga awm leh tla chiang sa tawh, TNT hmaah rin hlawh zawk ni mah se inkhel an thunun thei bik lo va. Tamil Nadu atang an lak luh, Angamuthu Ramaswamy chuan vawi 45 vaw tlain point 15 a hloh a, filawr taka a khelh avangin an chakpui a, Kuriz Player of the Match-a thlan a ni.

Vawi ruk an khelhah a tum li nan Khawbel chakin point 10 an hmu a, pathumnaah insawn chhovin Ningani zana league khar tur pangana, Tuichangral aiin point liin an sang z. Palina chin an luah dawn tih a chiang a, nikum atangin Pro Volleyball-ah telin kum zawnin semifinal an inhlangkai.

TNT-in beisei tur an nei tawh loh avangin boruak rit tel lovin zangkhai takin an inlan thei a, inthlahdah lovin chak ngei tumin an bei tluan a. Feet 6 leh inchi 9-a sang, Angamuthu an dan hneh loh avangin chak chunga championship thlah liam an tumna an tihlawhtling zo lo va, chuti chungin nep lo taka set hnih an lak avangin point khat an neih belh.

Vawi ruk an khelhah tum nga an tlawm a, chutih rualin an chak awm chhunah table-a sang ber leh rin hlawh, Hunthar an hneh a. Khawbel hmaah TNT player-ten an theihna tha takin an lantir a, mipui tan inkhel hmuhnawm an hlui bakah inkhel a zawh hnuah rimawi kal remin TNT naupang rual pipe band-ten team thlah nan ropui takin hun an hmang ni.

Mipa team pasarih inel zinga Mizo hlang awm chhun, TNT-in an player langsarte an kawl zui theih loh avangin hriat la hlawh tawk lo player an chhawp chhuak a, C Lalhriatpuia’n innghahna thamin a khel a, point 20 hmuin tum ruk a tisual a. An khelh hnuhnun berah Lalsaitluanga, Laldinchhunga leh Rohluzuala ten point 10 an hmu tling vek bawk.

Khawbelin league an zawh nan khelh hnih an la nei tihin Delhi spiker Anurag Rawat kawl reng chungin Angamuthu an lak belh a, an tifuh viau a. Set thum set khata Sihphir an hneh tumin point 47 hmuin a chakpui tawh a, TNT hmaah amah thlawptu ber, Johan Vanneihsanga’n tum dang aiin vuak tlak a harsat a, point 16 a hmuh laiin 11 a paih a. A hahchawlh chhunga khel, Anurag-a’n chuan vawi riat hlap tlain tum nga a tisual bawk a, amahah an innghat thuk hle a ni.

A tir atangin inum tawk hle mah se TNT-in Angamuthu an dan hneh loh bakah point a san hnuah an paukhauh tawk lo deuh va. Set hmasa berah Rohlua’n vaw sualin Dinchhunga hlap an dansak zui leh nghal bakah Angamuthu-a service an la thei lo bawk a, 24-20-in Khawbel an sang.

Hriatpuia’n a vuak tlak zawn hnuah Johan-a hlap an dansak a, 23-24-in hnaih leh hman mah se Angamuthu-a’n dan theih lovin a vaw tla a, Khawbel an tlang.

TNT-in khelmual kotlang atanga au phurtu an nei tha a, set hnihna an tan rualin a hma aia hriam zawkin an inlan a. Tum dang zawng aiin Saia hovin net chungah lehlam vuak an dang tha a, Angamuthu chuan vaw tla thei zui viau mah se a zuan hnem avangin a tla hniam tih a lang a. Khawbel captain Johan-a’n hlap tlak a harsat a, Muanna Veng team tan Hriatpuia’n mittlung taka a vuak mai bakah a tanpuiten an ball hmuh point-ah an chantir thei bawk a, 20-14-a an san hnuah harsa lovin set an la.

Set thumnaah Khawbelin nawr letin 14-11-a sang zawk an nih laiin Angamuthu la chhuakin tha thar, Anurag a lut a, a service kai lo nghal a. TNT-in Anurag-a vuak tum hnih dang tlain 18-19-in an inkar an tizim a, Khawbel coach Eric Lalsangliana Pautu chuan an dinhmun siam tha leh turin Angamuthu a luhtir leh a. A vuak hmasak ber Saia’n dansak mah se Tamil Nadu player hian a hnuah tum thum hlap tlain TNT an hnungtawlh a, 21-23-a hniam zawk an nih hnuah Hriatpuia’n point hnih a hloh zawn.

Set hnih an lak hnuah Anurag lutin Khawbelin Angamuthu an hahchawlhtir a, TNT-in nawr tawmin Johan-a leh Anurag-a ten an vuak sual zawn hnuah Joseph Zoramhmangaiha hlap an dansak a, 5-1-in set lina tirah an sang nghal.

An inthlauhna chhawm nungin nuam ti takin Muanna Veng team-in an khel a, Anurag-a’n a hlap tlak theih loh hnuah Hriatpuia’n a vaw tla a, 20-14-in an kalsan a. Khawbelin Angamuthu luhtir leh mah se lehlam kal tluang an pawt ding thei lo a, point 18 chiah an hmu ve hman tihin TNT-in a vawi hnih nan set an la.

Set hnuhnung berah tha tharin Angamuthu a kir leh a, team pahnih inkarah danglamna a siam a. Tamil Nadu spiker hian set ngana bikah point 13 hmuin tum thum a tisual a, Johan-a’n vawi khat hlap tla ve bawkin 14-11-in Khawbel an sang a, chak nan point khat an la mamawh tihin TNT universal player Dinchhunga'n a vaw kai lo.

MIZORAM RURAL BANK PRO VOLLEYBALL LEAGUE 2026

May 11 - June 13, 2026 @ LPS Arena, Falkland, Aizawl

RESULT

Round 7 : June 02, 2026 (Thawhlehni)

Khawbel def Thutak Nunpuitu Team (mipa)

25-23, 20-25, 25-21, 18-25, 15-11 (3-2)

Kuriz Player of the Match - Angamuthu Ramaswamy (Khawbel)

Cheetak Fan of the Night - Lalawmpuii (TNT)

MVA Lucky Fan - Vanlalrintluangi (TNT), Lallawmsanga (Khawbel)

STATS:

KHAWBEL

Angamuthu Ramaswamy: Point Hmuh - 45, Point Hloh - 15

Johan Vanneihsanga: Point Hmuh - 16, Point Hloh - 11

Anurag Rawat: Point Hmuh - 8, Point Hloh - 5

Lalremfela: Point Hmuh - 6, Point Hloh - 2

Innocent Malsawmzuala: Point Hmuh - 4, Point Hloh - 1

Joseph Zoramhmangaiha: Point Hmuh - 4, Point Hloh - 3

David Lalramhmachhuana (setter): Point Hmuh - 1, Point Hloh - 1

THUTAK NUNPUITU TEAM

C Lalhriatpuia: Point Hmuh - 20, Point Hloh - 6

Lalsaitluanga: Point Hmuh - 14, Point Hloh - 4

Laldinchhunga: Point Hmuh - 12, Point Hloh - 5

Rohluzuala: Point Hmuh - 10, Point Hloh - 3

R Lalhruaitluanga: Point Hmuh - 5, Point Hloh - 1

Vanlalchhantluanga Sailo (setter): Point Hmuh - 2, Point Hloh - 1

POINT TABLE

HUNTHAR: Play 5, Won 4, Loss 1 (set lak 14, set hloh 5) : Point 13

ANASTASIA: Play 6, Won 3, Loss 3 (set lak 13, set hloh 11) : Point 11

KHAWBEL: Play 6, Won 4, Loss 2 (set lak 13, set hloh 12) : Point 10

CHHINGA VENG: Play 5, Won 3, Loss 2 (set lak 12, set hloh 9) : Point 9

TUICHANGRAL: Play 5, Won 2, Loss 3 (set lak 9, set hloh 11) : Point 6

SIHPHIR: Play 5, Won 2, Loss 3 (set lak 8, set hloh 11) : Point 5

TNT: Play 6, Won 1, Loss 5 (set lak 7, set hloh 17) : Point 3

FIXTURE

HMEICHHIA - ROUND 2

June 03, 2026 (Nilaini)

8:00 PM : Eric Pautu Academy v Chhinga Veng Spikers

MIPA - Round 7

June 04, 2026 (Ningani)

8:00 PM : Tuichangral v Sihphir

HMEICHHIA - ROUND 2

June 05, 2026 (Zirtawpni)

8:00 PM : ITI Veng GSA v Tuichangral

MIPA - Round 7

June 06, 2026 (Inrinni)

8:00 PM : Chhinga Veng Spikers v Hunthar