ZALEN, June 09: Tuichangralin an chet that chhunzawmin Thawhtanni tlai khan set thum faia Eric Pautu Academy hnehin league an khar a, set hloh miah lovin Mizoram Rural Bank Pro Volleyball League hmeichhe final an lut.

Tlang chiang sa chungin, final inbuatsaih nan an hmang nghal a, tla chiang sa tawh, Eric Pautu Academy chu a tir atanga a tawp thleng inkhel awp betin Shaalani Saravanan-i’n vawi 26 vaw tlain point riat a hloh a, vawi hnih a khelh tawhah Kuriz Player of the Match a ni ve ve.

El thamin Eric Pautu Academy an inlan zo lo va, set thum an inkhelh chhunga mi mala thawh hlawk, Lalruatmawii’n point li hmuin vawi khat a tisual a, Zoramsangi’n point khat hlohin tum thum a vaw tla a, Anges Lalthlamuanpuii’n point li a hmuh zat a hloh bawk.

Tuichangralin Tamil Nadu atanga an lak luh, India player Shaalani a filawr hle a, amah thlawp thei ber, Lalramliani’n tum sarih hlap tlain point khat a hloh a, an chet dan inthlau hle mah se Eric Pautu Academy player zingah Rami hnuhma khing zo an awm chuang lo.

Chutih laiin Tuichangralin Shaalani an lak luh hmaa che tha, Remlalnghaki a tla hniam a, tum li chiah hlap tlain point thum a hloh a, set hnihna a zawh rualin an thlak.

Chhinga Veng Spikers leh ITI Veng GSA lakah set thum fai thovin Tuichangral an chak tawh a, Eric Pautu Academy hmaah awlsam leh zuala an chak rualin an elpui team pathum an hneh vek a, a tha thei ang berin final an lut.

Pro Division season hawnna, September khan final-ah set thum set khatin Chhinga Veng an hneh a, tun season-a a vawi thum nan Zirtawpni zan Pro Volleyball final-ah an intawng ang.

Eric Pautu Academy-in set khat mah la lovin an elpui team pathum an hneh lo vek ve thung a; chutih rualin inzir mekte awm khawmna a ni a, an player tam zawkin Mizoram inelna sang berah tawn hriat an neih phah a. An theihna leh thiamnain tlin lo deuh mah se an an tlangnelin an ngampa tial tial tih a lang.

Lehlam ball vuak dan tumin Agnes-i leh setter Jacinta-i zuang taima hle mah se Shaalani an dang hneh lo va. An chet vel dan leh ball khawihah tawn hriat nei hnem tawhte awm khawmna, Tuichangral an chungnung tel bawk a, set hmasa berah Eric Pautu Academy-in point 15 an hmu ve hman tihin an tlang.

Set hnihnaah hneh leh zualin Tuichangralin an thunun a, set khatna tawp dawna thil thlen dan ang chiahin Shaalani-i’n a hlap tlak hnuah lehlam tan Esther Lalringzeli’n a vaw kai lo va, point 11-ah Eric Pautu Academy an tawp.

Tuichangral coach David Aizampuia Fanai chuan mi mala chet harsat, Remremi la chhuakin set thumna an tan rualin Zuali a dah lut a, set khat a khelh chhungin vawi li vaw tlain tum khat chiah a tisual a. Rami’n set hmasa pahnih aiin point a hmu hlawk bawk a, Eric Pautu Academy-in nawr let tumin infuih phur viau mah se 6-6 atangin Tuichangralin an kalsan a, Shaalani chuan vaw tlain 25-16-in set tumna an la a ni.

MIZORAM RURAL BANK PRO VOLLEYBALL LEAGUE 2026

May 11 - June 13, 2026 @ LPS Arena, Falkland, Aizawl

RESULT

Round 3 : June 08, 2026 (Thawhtanni)

Tuichangral def Eric Pautu Academy (hmeichhia)

25-15, 25-11, 25-16 (3-0)

Kuriz Player of the Match - Shaalani Saravanan (Tuichangral)

Cheetak Fan of the Night - Joshua Lalnunsanga (Tuichangral)

MVA Lucky Fan - Lily (Eric Pautu Academy), F Lalhruaizeli (Eric Pautu Academy)

STATS:

TUICHANGRAL

Shaalani Saravanan: Point Hmuh - 26, Point Hloh - 8

Lalramliani: Point Hmuh - 7, Point Hloh - 1

VL Hmangaihzuali: Point Hmuh - 4, Point Hloh - 1

Remlalnghaki: Point Hmuh - 4, Point Hloh - 3

B Tlangmawii Varte: Point Hmuh - 3, Point Hloh - 3

Lalchhandami: Point Hmuh - 2, Point Hloh - 4

Melody Lallawmkimi (setter): Point Hmuh - 1, Point Hloh - 0

ERIC PAUTU ACADEMY

Lalruatmawii: Point Hmuh - 4, Point Hloh - 1

Zoramsangi: Point Hmuh - 3, Point Hloh - 1

Lalchhanmawii: Point Hmuh - 2, Point Hloh - 1

Anges Lalthlamuanpuii: Point Hmuh - 4, Point Hloh - 4

Esther Lalringzeli: Point Hmuh - 2, Point Hloh - 3

Sarah Lalsuiengi: Point Hmuh - 2, Point Hloh - 4

Jacinta Rohlupuii (setter): Point Hmuh - 2, Point Hloh - 3

POINT TABLE:

TUICHANGRAL: Play 3, Won 3, Loss 0 (set lak 9, set hloh 0) : Point 9

CHHINGA VENG: Play 3, Won 2, Loss 1 (set lak 6, set hloh 4) : Point 6

ITI VENG GSA: Play 3, Won 1, Loss 2 (set lak 4, set hloh 6) : Point 3

ERIC PAUTU ACADEMY: Play 3, Won 0, Loss 3 (set lak 0, set hloh 9) : Point 0

FIXTURE:

SEMIFINAL - MIPA

June 09, 2026 (Thawhlehni)

8:00 PM : Hunthar v Chhinga Veng Spikers

June 10, 2026 (Nilaini)

8:00 PM : Khawbel v Anastasia Electric Veng

FINAL - HMEICHHIA

June 12, 2026 (Zirtawpni)

Tuichangral v Chhinga Veng Spikers