Chhinga Veng Spikers-in mipui rin dan thlak thlengin an mamawh hnehna an chang a, ningani zan Ather Pro Volleyball League-ah set thum set hnihin Thutak Nunpuitu Team an hneh.

LPS Arena, Falkland-ah Yougank Baliyan leh Lalramhluna'n Chhinga Veng tan point 51 an thawk chhuak a, set khatna an hloh hnuah 21-25, 25-21, 25-21, 18-25, 15-10-in an chak.

League kal mekah vawi thum tlawm zawn pumpelhin a tum khat nan Chhinga Veng an chak a, khelh hnih an la neihah semifinal lut thei turin beiseina an insiam a; hmasawnna awmze nei lantirin player tinin inringtawk leh hlawk zawkin an khel.

Set la lovin Tuichangral leh Hunthar lakah an tlawm tawh a, boruak rit takin a delh beh chhungin Spikers-in an khel a, an tlawm leh a nih chuan an hmabak a thim hle dawn tih hre chhungin Yougank chuan vawi 34 hlap tlain point 12 a hloh.

Ramhluna'n point 17 leh Lalchungnunga'n point 11 hmuin tum nga ve ve an tisual a, Lalneihpuia Hrahsel chuan tum 12 vaw tlain point sarih a hloh zat Thangzika Pautu chuan hlawh chhuak ve thungin point hnih chiah a paih a ni.

Tuichangral leh Durtlang North laka an chak zawn hnuah TNT-in harsatna an tawk thar leh a, Zosangzuala (Lalmama) chuan tum hnih tisualin point 25 a thawk chhuak a, a vawi hnih nan Kuriz Player of the Match ni mah se Vanlalṭanchhana (Valbuanga) chuan Pro Volleyball a khelh tawhah hnuhma chhe tak a hnutchhiah a, point 13 a hmuh aiin tam 17 a hloh a ni.

Table-a pahnihna leh rin hlawh zawk TNT tan Lalmama'n vaw tlain Valbuanga'n a hui tlak ve leh hnuah 19-15-in set khatnaah hma an hruai a, bul an tan tha. Rang taka K Zodingliana'n a hui tlak hnuah 24-21-in an sang leh a, Yougank-a hlap dansak zuiin set an la.

League kal mekah Chhinga Vengin lak nei lova set sarih an hloh zawnna a ni a, an boruak hniam laiin nungchang ropui lantirin tha takin an bei let. Infuih phurin 17-17 a nih laiin Valbuanga'n a vuak suak bakah ho takin TNT-in point an hloh bawk.

Ramhluna'n a theihna lantirin a vuak tlak hnuah 23-21-in Spikers an sang a, tha taka a service hmangin point a hmu zawn zui a, Chhinga Vengin boruak thar hipin league kal meka a vawi khat nan set an la.

TNT insiksawiin Valbuanga la chhuakin Sadrak Fanai luhtir mah se Chhinga Vengin inkhel an thunun zui zel. Yougank chuan hlap tla zawnin net chung atangin Laldinchhunga vuak a dang tla bawk a, 19-13-in hma an hruai a, a hma ang bawkin lehlamin point 21 an hmu ve tihin an tlang.

Mahse, Spikers-in hnehna chang tlang turin an insawrbingna an hloh a, TNT-in Valbuanga luhtir lehin set linaah boruak an tidanglam a, 20-10-a hma an hruai fal hnuah net chunga lehlam vuak dang hnem tak Lalmama'n chiang takin a hlap tla a, Spikers nih rualin awlsam takin set hnih an la ve leh.

Rilru lama fiahna pawimawhah 2019 champion Chhinga Veng inthuai tharin 7-7 a nih hnuah Yougank chuan hlap tlain Zika'n Valbuanga vuak a dansak bawk a, 10-7-in TNT lakah an sang. 13-10-a an kalsan hnuah Yougank chuan hlap tlain Ramhluna'n an chakna point a thawk chhuak a ni.

Chhinga Vengin set hnih an hloh avangin league point thum hlawh chhuak zo lo mah se nihna thar neiin an khel zui thei dawn a, May 16-ah Durtlang North nen an inhmachhawn ang.

Set hnih an lak avangin TNT-in point khat an hmuh belh a, Dina'n tum 18 vaw tlain vawi nga a tisual a, Zodinga'n point khat hlohin 14 hmu bawk mah se hnehna an chanpui zo lo. Beisei an pha lo thar leh a, insiam tha leh turin May 17-ah league kharin Hlimen an intawng dawn a ni.

STATS

CHHINGA VENG SPIKERS

Yougank Baliyan : point hmuh 34, point hloh 12

Lalramhluna : point hmuh 17, point hloh 5

Lalchungnunga : point hmuh 11, point hloh 5

Thangzika Pautu : point hmuh 7, point hloh 2

Lalneihpuia Hrahsel : point hmuh 12, point hloh 7

Lalnunpuia : point hmuh 3, point hloh 2

David Lalramhmachhuana (setter) : point hmuh 2, point hloh 0

Lalfakawma : point hmuh 1, point hloh 2

TNT

Zosangzuala : point hmuh 25, point hloh 2

Laldinchhunga : point hmuh 18, point hloh 5

K Zodingliana : point hmuh 14, point hloh 1

Vanlalṭanchhana : point hmuh 13, point hloh 17

Vanlalchhantluanga Sailo : point hmuh 6, point hloh 2

Sadrak Fanai : point hmuh 5, point hloh 3

F Lalhriatpuia (setter) : point hmuh 5, point hloh 1

Lalliankima (setter) : point hmuh 0, point hloh 4

POINT TABLE

HUNTHAR : Play 3, Won 3, Loss 0, Point 9

THUTAK NUNPUITU TEAM : Play 4, Won 2, Loss 2, Point 6

TUICHANGRAL : Play 2, Won 1, Loss 1, Point 4

DURTLANG NORTH : Play 2, Won 1, Loss 1, Point 3

CHHINGA VENG SPIKERS : Play 3, Won 1, Loss 2, Point 2

HLIMEN : Play 2, Won 0, Loss 2, Point 0

FIXTURE

May 10, zirtawpni 8:00pm :

SERKAWN V LUANGMUAL (hmeichhia)

May 11, inrinni 8:00pm :

DURTLANG NORTH V TUICHANGRAL (mipa)

May 13, thawhtanni 8:00pm :

DIAKKAWN V DURTLANG (hmeichhia)

May 14, thawhlehni 8:00pm :

TUICHANGRAL V HLIMEN (mipa)