ZALEN, June 07, 2026: Hmahruaitu, Huntharin chungnung takin Inrinni zanah league an khar a, set an hloh hmasak hnuah Chhinga Veng Spikers hnehin Mizoram Rural Bank Pro Volleyball League semifinal-ah an intawng zui leh nghal dawn.

Set hmasa pahnih hloh zawn ngei tura ngaih tawh Huntharin inkhel an tidanglam a. Set hnihnaah 24-21-a hniam zawk an nih hnuah Chhinga Veng nawr betin an insiam thar leh a, hawi kir tawh lovin an awpbet tluan.

Championship kal meka vawi thum chak zawn hmasa ber an nih bakah league khelh rukah tum nga chakin an elpuite lakah an sang fal.

Set hnihna tawp dawnah harh tharna changin Suryansh Tomar chuan vawi 26 vaw tlain point kua a hloh a, a vawi thum nan Kuriz Player of the Match-a thlan a ni a. Wilson Lalremruata’n tum hnih chiah tisualin point kua a hmu a, set thumna atangin Fabian Lallunghnema ball vuakin awmzia a nei a, lehlam hlap dang telin point 11 a thawk chhuak a, point ruk a hloh.

Chak lo pawh ni se league-a sang ber ni chungin Hunthar an tlang dawn tho va; mahse, an chet that kal tluang chhawm nungin rin hlawh an nih tawhna an tinghet.

Pahnihna, Khawbel aiin point ngain an sang a, point aiin chak a pawimawh zawk avangin pathumna, Anastasia Electric Veng nen an inkarah point li a awm a, vawi hnihin an chak hnem zawk a ni.

Anastasia leh Tuichangral an hneh zawn hnuah Chhinga Vengin pahnihna nih tumin league inkhel hnuhnung ber an hmachhawn a, phur taka bul an tan rualin set hmasa ber an thunun hneh hle a. Set hnihna laihawl thlengin point rukin Hunthar an kalsan a, fimkhurna leh insawrbingna hloh hret hretin lehlamin an inkar an tizim tial tial a, chuti chungin point khat hmuh belha set la zawn thei turin hun tha vawi li an nei a, an puitlin thei lo.

Set an hloh hnuah pherh zuiin a hma lawka team hriam tha tak kha rei lo te chhungin an nihna chiang takin an hloh a, tho leh tawh lovin an bet tluan a. Set thumna atangin ball vuak tlak an harsat a, point an hloh hnem a, a tir lama rin tlak em em, Morales Ponce De Leon chuan point 14 paihin vawi 21 a vaw tla a. Captain Lalchungnunga’n tum kua hlap tla hman mah se point li a hloh a, lak chhuah ngai khawpin set hnuhnung pahnihah chet a harsat.

Spikers tan Vanlaltanpuia’n point 13 hmuin tum hnih chiah tisual mah se team a tinung zo lo va, a tir lama vaw tla thei tak, H Malsawmsanga’n tum 11 hlap tlain point sarih a hloh bawk a. An chak loh rualin semifinal lut a sang pali zingah Chhinga Veng an hniam ber a, ni thum hnuah point sariha an phak loh, Hunthar nen final luh inchuhin an insut nawn leh a ngai dawn a ni.

Inkhel an tan rualin Chhinga Vengin khuangpui vaw chunga anmahni au phurtute tha takin an chhang let a, player-ten an ball hmuh point-ah chantir zelin nuam ti takin an khel a, 20-10-in an sang hman a. Hunthar tan Suryansh-a bak rin ngam khawpa vaw tla thei an awm lo va, service an tisual nasain an la sual hnem hle bawk.

Hunthar an talbuai nasa a, setter Remsangzuala la chhuakin David Lalnuntluanga dah lut mah se thil thlen dan a danglam phah lo va, point 16 chiah an hmu ve hman tihin Spikers-in set an la.

Set hnihna an tan rualin Cuban spiker Morales chuan a ball hmuh hmasak a vaw zawn a, setter C Zonunmawia’n service atangin point a hmu zawn bawk. Chungnunga’n a hlap tlak ve leh rualin 17-11-in Hunthar an kalsan.

Khelmuala a kir leh hnuah Hunthar setter rinrawl, Lalmama ball vawrhin hma a sawn hret hret a, Suryansh, Wilson leh Lalbiakmuana ten point an hmuh chhoh hnuah beiseina an insiam a, an inkar an tizim a. Mahse, Sangsanga’n a vuak tlak rualin 24-21-in Chhinga Veng an sang a, point khat hmuh belha set la zawn thei turin hun tha vawi thum an nei a, rin loh takin an bawhpelh vek.

Fabian-a’n a hlap tlak hnuah Morales-a’n point hnih a hloh zawn a, Huntharin 24-24-in an nih rual a ni.

Hniam tak atanga an um phak rualin Huntharin inrintawkna nen an nawr zui a, Spikers erawh hlauhthawnnain an tibuai tel tih a lang a, Tpa’n vaw tlain 25-24-in sang leh mah se an tlang zo chuang lo va. 26-26 a nih hnuah Suryansh-a’n lehlam ban pharna chung atangin a hlap tla a, Spikers innghahna Morales-a’n chhang let thei lovin a ball vuak an dansak ve thung a, Huntharin harsa taka set an lak rualin Chhinga Veng tan engkim a tawp a, el thamin an inlan zui tawh lo.

Set thumna atangin awiawm loh khawpin an inkhing tawk lo a, a tir lama Hunthar buai dan ang chiahin Chhinga Vengin vuak tlak an harsat a, player inthlak kual mah se awmzia a nei thei lo va. Set thumnaah point 16 chiah an hmu ve hman a, set linaah che chhe leh zualin point 12-a inthlau chungin Hunthar an tlang.

MIZORAM RURAL BANK PRO VOLLEYBALL LEAGUE 2026

May 11 - June 13, 2026 @ LPS Arena, Falkland, Aizawl

RESULT

Round 7 : June 06, 2026 (Inrinni)

Hunthar def Chhinga Veng Spikers (mipa)

16-25, 28-26, 25-16, 25-13 (3-1)

Kuriz Player of the Match - Suryansh Tomar (Hunthar)

Cheetak Fan of the Night - B Vanlalmawia (Chhinga Veng)

MVA Lucky Fan - Lalbiaksiami (Chhinga Veng), Lalthakimi (Hunthar)

STATS:

HUNTHAR

Suryansh Tomar: Point Hmuh - 26, Point Hloh - 9

Fabian Lallunghnema: Point Hmuh - 11, Point Hloh - 6

Wilson Lalremruata: Point Hmuh - 9, Point Hloh - 2

Lalbiakmuana: Point Hmuh - 5, Point Hloh - 3

Lalbiakmawia Khiangte: Point Hmuh - 2, Point Hloh - 0

Remsangzuala (setter): Point Hmuh - 2, Point Hloh - 1

CHHINGA VENG SPIKERS

Morales Ponce De Leon: Point Hmuh - 21, Point Hloh - 14

Vanlaltanpuia: Point Hmuh - 13, Point Hloh - 2

Lalchungnunga: Point Hmuh - 9, Point Hloh - 4

H Malsawmsanga:Point Hmuh - 11, Point Hloh - 7

R Vanlalmawia: Point Hmuh - 7, Point Hloh - 3

C Zonunmawia (setter): Point Hmuh - 3, Point Hloh - 3

POINT TABLE

HUNTHAR: Play 6, Won 5, Loss 1 (set lak 17, set hloh 6) : Point 16

KHAWBEL: Play 6, Won 4, Loss 2 (set lak 13, set hloh 12) : Point 10

ANASTASIA: Play 6, Won 3, Loss 3 (set lak 13, set hloh 11) : Point 11

CHHINGA VENG: Play 6, Won 3, Loss 3 (set lak 13, set hloh 12) : Point 9

SIHPHIR: Play 6, Won 3, Loss 3 (set lak 11, set hloh 13) : Point 7

TUICHANGRAL: Play 6, Won 2, Loss 4 (set lak 11, set hloh 13) : Point 7

TNT: Play 6, Won 1, Loss 5 (set lak 7, set hloh 17) : Point 3

FIXTURE

HMEICHHIA - ROUND 3

June 08, 2026 (Thawhtanni)

4:00 PM : Tuichangral v Eric Pautu Academy

8:00 PM : Chhinga Veng Spikers v ITI Veng GSA

MIPA - SEMIFINAL

June 09, 2026 (Thawhlehni)

8:00 PM : Hunthar (1) v Chhinga Veng Spikers (4)

June 10, 2026 (Nilaini)

8:00 PM : Khawbel (2) v Anastasia Electric Veng (3)