Diakkawnin tha takin league an khar a, thawhtanni zan Ather Pro Volleyball League-ah beisei nei tawh lo Durtlang lakah set nga la vekin an chak.

LPS Arena, Falkland-ah captain Lalmuanpuii'n Kolasib team fuih phurin 15-5, 15-7, 15-8, 15-12, 15-10-in inkhel an thunun tluan a, khelh liah league point 13 hmuin pahnihna an luah lailawk a ni.

Beisei pha lo taka Bungkawn an hneh loh hnuah Diakkawnin khelh that an mamawh a, Muani'n point 17 hmuin tum li a tisual a, a vawi hnih nan Kuriz Player of the Match lawmman a dawng.

Tum dang angin Vardingliani a che tha tawk lo ve thung a, point hnih hlepin 10-8 ni mah se setter Lalrinzuali'n (7-2), VL Hmangaihzuali'n (6-2) leh Hmingthazuali (4-2) ten awmze neiin an khel a, team pum puiin hma lam an pan.

Player naupang rual awm khawmna Durtlangin knockout round an lut pha tawh lo tih hre chungin an khel a, phurna leh chak duhna tak tak an lantir zo lo. Bungkawn lakah set hnih laa beiseiawm taka an inlan ang kha an pha lo hle a, an player zingah hnuhma chhuan tlak nei an awm lo.

An inlan hnuhnun bera Kuriz Player of the Match-a thlan Sarah Lalsuiengi leh senior awm chhun Lalramengi Ralte chuan team boruak an chawi kang zo lo a, point sarih hlohin tum li chiah an tidik ve ve a, Rebek Remtluangpuii'n vawi thum vaw tla mah se point li a hloh bawk.

Tawn hriat nei player rualten a tir atangin zangkhai takin Diakkawn tan an khel a, set khatnaa che tha Dingi'n vaw tlain 11-4-in an sang a, 14-4 a nih leh hnua a hlap tla zui leh.

Diakkawnin inkhel awpbet zui zelin set hnihnaah 12-7 a nih atangin Durtlangin point an hmuh belh lo a; set thumnaah Muani'n vaw tla zawnin 12-8-in hma an hruai a, lehlam dang betin awlsam takin an tlang leh.

Set linaah Durtlangin hma an sawn hret a, 10-10 a nih hnuah Diakkawn an chungnung leh tho a, Muani vuak an dan theih loh bakah anmahni'n an tisual nasa a, 14-12-a Kolasib team an san laiin Lalrampani'n a service kai lo a ni.

Tum danga an innghahna Sarah-i a chet theih loh avangin Durtlang an zuih tluan a, set hnuhnung berah Dingi'n hlap tlain 11-4-in Diakkawn an sang. Nawr letin point 10 thleng hmu ve hman mah se dan zawh lohin Kolasib team an tlang.

2019 khan Muani'n Durtlang tanpuiin an champion a, chhuahsan zuiin hemi hnu atang hian Pro Volleyball-ah harsatna an tawk nasa. Tun hi vawi 12 an khelhna niin an tlawm vek a, team panga inel zingah semifinal lut pha lo awm chhun niin an tla.

Muani'n a club hlui lakah a awmna veng Diakkawn a chakpui ve thung a, champion lai leh hmahruaitu Luangmual aiin point khatin an hniam. Nilaini zanah hmeichhe league zawh fel a ni dawn a, point riat ve ve kawl mek Bungkawn leh Serkawn inhmachhawnin an dinhmun tur tihchian a ni ang.

STATS

DIAKKAWN

Lalmuanpuii : point hmuh 17, point hloh 4

Vardingliani : point hmuh 10, point hloh 8

Lalrinzuali (setter) : point hmuh 7, point hloh 2

VL Hmangaihzuali : point hmuh 6, point hloh 2

Hmingṭhazuali : point hmuh 4, point hloh 2

R Lalrammawii : point hmuh 1, point hloh 1

DURTLANG

Sarah Lalsuiengi : point hmuh 4, point hloh 7

Rebek Remtluangpuii : point hmuh 3, point hloh 4

Lalramengi Ralte : point hmuh 4, point hloh 7

Lallawmawmi : point hmuh 3, point hloh 6

Emily Lalramsangi : point hmuh 0, point hloh 4

Lalrampani : point hmuh 2, point hloh 3

POINT TABLE

LUANGMUAL : Play 4, Won 3, Loss 1, Point 14

DIAKKAWN : Play 4, Won 2, Loss 2, Point 13

BUNGKAWN : Play 3, Won 2, Loss 1, Point 8

SERKAWN : Play 3, Won 2, Loss 1, Point 8

DURTLANG : Play 4, Won 0, Loss 4, Point 2

FIXTURE

May 14, thawhlehni 8:00pm :

TUICHANGRAL V HLIMEN (mipa)

May 15, nilaini 8:00pm :

BUNGKAWN V SERKAWN (hmeichhia)

May 16, ningani 8:00pm :

CHHINGA VENG SPIKERS V DURTLAWNG NORTH (mipa)

May 17, zirtawpni 8:00pm :

THUTAK NUNPUITU TEAM V HLIMEN (mipa)