ZALEN, June 14, 2026: Dinhmun derthawng atangin Chhinga Veng Spikers-in tha takin an nawr let a, Zirtawpni zan hmeichhe final-ah set thum set hniha Tuichangral hnehin Mizoram Rural Bank Pro Volleyball League-ah an champion.

Rin hlawh lo zawk ni mah se Elisian Medai chuan Chhinga Veng a fuih phur a, set hnih set khata hniam zawk an nih hnuah point hnih hloha tlawm hmabakin 23-20-in a hniam zui leh a. Damkawr chunga inkhel, Anusree Poyili nen hnehna kawngah Spikers hruai kirin Tuichangral laka an tlawm nawn tawhna an chhang let.

League-a a khelh dan nena khaikhin rual lovin inkhel pawimawh leh inelna sangah kum 2022-a Bethlehem Vengthlang champion-pui tawh, Elisian a che tha a, point 35 hmuin tum ruk a tisual a, championship chhunga a vawi khat nan Kuriz Player of the Match-a thlan a ni.

Thawhtanni khan league-a an elpui, ITI Veng GSA hnehin Chhinga Vengin final an lut a, hemi hnu hian Kerala atanga an lak luh, Anusree-i a damlo zui a. Team inbuatsaihna zawm thei lovin Zirtawpni tlai thlengin hun hmang mah se set nga a khel tluan a, vawi 34 vaw tlain point li a hloh a, an champion theih nan Elisian-i nen point 69 an hlawh chhuak.

Pro Volleyball League-a la tel ngai lo hmeichhe team pali an inel a, league round hmasa berah Tuichangralin set hloh lovin Chhinga Veng an hneh a, Pro Division season hawnna, September khan final-ah set thum set khatin an hneh tawh bawk a. Tun season-a an intawn vawi thumna leh pawimawh ber, hnam dang player an lak luh hnua an insut hmasa ber ni nghalah Tuichangral tan Shaalini Saravanan-i’n point 50 hmuin tum sarih chauh tisual mah se team a chakpui zo lo.

Remlalnghaki’n tha takin championship bul tan mah se an khelh hnuhnunah hniam lam a pan a, India international Shaalini thlawp thei ber a ni na a, point 14 hlawh chhuakin point riat a hloh va. Elisian el zo lovin vuak tlak a harsat a, set lina atangin rim leh zualin Shaalini-i an chhawr a, set hnih an lak zawn hnuah a tawp thleng pha lo chiahin lehlam tan kawng an hawnsak a ni.

Tuichangral mipa team-in final vawi hnih lut tawhin an hlawhtling lo ve ve a, hmeichhe team-in rin hlawh ni chungin an puitlin zo lo ve leh a. Hetih lai hian kum 2019 mipa champion Chhinga Vengin LPS Arena chhunga inkhel entu bialtu MLA u B Lalchhanzova leh bialtu Corporator B Lalawmpuii te hmuh laiin rahbi thar an tuk a, Pro Volleyball League chanchina mipa leh hmeichhe inelnaa champion kawp hmasa ber an ni.

Chhinga Veng coach Jesse Lalpianpuia’n kum 2024 khan Luangmual kaihruaiin a champion-pui tawh a, hmeichhe team hrang pahnih a champion-puina niin 2022-a best coach chawimawina sem chhuah a nih atangin vawi hnih a dawng tawh a, mipa leh hmeichhe team coach zingah vawi khat aia tam dawng hmasa ber a ni.

Hmeichhe final hi Aizawl Municipal Corporator Mayor H Lalremtluanga’n hmanpuiin inkhel tan a nih hmain volleyball chu Mizoram puma infiamna lar tak a ni a, player-te pawhin mipui hriat an hlawh tih a sawi a, “AMC Mayor Cup awm leh hmasa berah volleyball hmanga inelna buatsaih a ni ang,” a ti.

Inkhel an tan rualin Tuichangral nen vawi hnih an inkhelh tawha tlawm zawn mek, Chhinga Vengin chak ngei tumin bul an tan tha a, Anusree leh Elisian bakah Chinglunkimi (Kimtei), setter Lalkhumtiri Renthlei leh Lalbiakngheti ten point hmuin 11-5-in an sang nghal a. A hnuah Elisian chuan vawi li vaw tla zawnin 17-8-in an kalsan a, set hloh lova vawi thum chak zawn lai, Tuichangral lakah harsa lovin set an la.

Damkawr Anusree-i’n chet vel a harsat avangin Spikers tan Elisian a langsar a, a vuak tlak zawn kar lakah Evelyn Malsawmtluangi’n a service atangin point a hmu bawk a, set hnihnaah 11-6-in hma an hruai zui a. Mahse, Remremi’n hlap tla zawnin Tuichangral a fuih phur a, Shaalini-i’n hloh nei mang lovin a ball hmuh awmze neia a chhuah bakah B Tlangmawii Varte hovin Spikers ball vuak an laksak fo avangin inkhel an tidanglam.

Tuichangralin 19-18-a an lehpelh atangin Chhing Veng an dang bet a, set an lak thlengin point ruk hmu zawnin Remremi’n vawi thum a vaw tla a. Hetih lai hian Tuichangral setter rinrawl, Melody Lallawmkimi’n Thawhlehni khan a nu a sun a, mi mala harsatna a neih avangin a khel tluan lo va, VL Hmangaihzuali’n a thlak.

Set thumnaah an inum tawk chho hle a, 21-21 a nih laiin Remremi’n a hlap tla a, Spikers-in an chhan let theih loh avangin Shaalini-i’m point thum a hmu zawn leh a, set hnih an la zawn a. Set linaah set thum la zawn thei turin 18-18 a nih hnuah Tamil Nadu spiker-in vaw tla zawnin Tuichangralin an kalsan. 

Mabiaki’n a service dik loh hnuah chak tlang thei mai turin 23-20-in an sang a, dinhmun derthawnga an awm laiin Elisian chuan Chhinga Veng tan beiseina thar a siamsak a. A vuak tlak hnuah a service atangin point hnih a hmu zawn a, 23-23 a nih hnuah Anusree-i’n hlap tla nghal mai lo mah se vawi thum a vuak zawnnaah Tuichangralin an la thei lo va. Elisian-i service tha tak chhawrin Kerala spiker hian a hlap tla zui leh a, rilru lama fiahna pawimawh an pal tlang.

Phurna leh inrintawkna nen Chhinga Vengin set ngana an khelh zui a, tangkai takin set lina thlenga awm hmun sawn tam lo tak Anusree-i an hmang thei a. A elpui Shaalini erawh a zuang tam a, set lina laihawl atangin a hma leh hnung atangin a vua a, tla fual mah se amah bak Tuichangralin rin ngam dang an nei tawh lo. 

Set hnuhnung bera an tan atangin Anusree chuan vawi kua a vuak tlak rualin 10-7-in Chhinga Vengin hma an hruai a, a hnuah Elisian chuan tum thum a hlap tlak kar lakah Shaalini chuan vawi khat a chhang let a. Tuichangralin vuak la thei viau mah se an la seng lo va, 14-9-a Chhinga Veng an san laiin Elisian chuan dan theih lovin a hlap a, beidawng lek leka an awm hnuah hlim em emin hnehna an lawm zui a ni.

MIZORAM RURAL BANK PRO VOLLEYBALL LEAGUE 2026

May 11 - June 13, 2026 @ LPS Arena, Falkland, Aizawl

RESULT

FINAL: June 12, 2026 (Zirtawpni)

Chhinga Veng Spikers def Tuichangral (hmeichhia)

25-19, 18-25, 21-25, 25-23, 15-9 (3-2)

Kuriz Player of the Match - Elisian Medai (Chhinga Veng Spikers)

Cheetak Fan of the Night - Jerome Vanlalmalsawma (Home Mission School)

MVA Lucky Fan - J Zothankima (St Joseph School), Mimi Lalfakzuali (Chhinga Veng)

STATS:

CHHINGA VENG SPIKERS

Elisian Medai: Point Hmuh - 35, Point Hloh - 6

Anusree Poyili: Point Hmuh - 34, Point Hloh - 4

Lalbiakngheti: Point Hmuh - 2, Point Hloh - 4

Evelyn Malsawmtluangi: Point Hmuh - 5, Point Hloh - 5

Chinglunkimi: Point Hmuh - 1, Point Hloh - 2

Lalkhumtiri Renthlei (setter): Point Hmuh - 2, Point Hloh - 0

TUICHANGRAL

Shaalini Saravanan: Point Hmuh - 50, Point Hloh - 7

Remlalnghaki: Point Hmuh - 14, Point Hloh - 8

Lalramliani: Point Hmuh - 3, Point Hloh - 1

B Tlangmawii Varte: Point Hmuh - 3, Point Hloh - 3

Lalchhandami: Point Hmuh - 1, Point Hloh - 3

MI MAL CHAWIMAWINA:

Haier Best Spiker: Shaalini Saravanan (Tuichangral)

Haier Best Setter: Lalkhumtiri Renthlei (Chhinga Veng Spikers)

Haier Best Receiver: B Tlangmawii Varte (Tuichangral)

Haier Best Coach: Jesse Lalpianpuia (Chhinga Veng Spikers)

PRO VOLLEYBALL LEAGUE CHAMPION TAWHTE:

HMEICHHIA

2017 - Power Department Sporting Club

2019 - Durtlang

2022 - Bethlehem Vengthlang

2023 - Luangmual

2024 - Luangmual

2025 - Luangmual

2026 - Chhinga Veng Spikers