Pro Volleyball : Final-ah champion lai Luangmual

Luangmualin trophy humhim turin rahbi pawimawh an tuk a, ningani zan Ather Pro Volleyball League semifinal-ah set thum set hnihin Bungkawn an hneh.

LPS Arena, Falkland-ah set hnih set khata hniam zawk an nih hnuah Lalhriatpuii, Lalramliani leh Lalbiakngheti'n hnehna kawngah Luangmual an hruai kir a, 25-21, 15-25, 19-25, 25-15, 15-9-in an chak.

Hun pawimawhah veikhawr Hriati'n tha takin a khel a, vawi 14 vaw tlain tum li chiah a tisual a, a vawi khat nan Kuriz Player of the Match-a thlan a ni. Rami leh Biaki'n point 15 ve ve hmuin point ruk ve ve an hloh a, an intluktlang takin team boruak an chawi kang.

April 26 khan league-ah point 15 game hmangin set nga an inkhel tawh a, set li set khatin Luangmual an chak. Hemi hnu hian Bungkawnin hma an sawn a, an tlawmna chhang let thei turin chungnung takin set thumna leh linaah an inlan.

Mahse, set thumna atangin Bungkawn an zuai a, thahrui hman nasat zual a ngaih avangin an tlo zo lo. Player khaikhinin an hniam hret bawk a, F Lalparmawii'n vawi 17 hlap tlain point 10 a paih a, Lalpekhlui leh Chinlunkimi'n point 10 ve ve hlawhin tum nga leh vawi sarih an tisual a ni.

2023 khan Mizoram inelna sang berah Luangmual an tel tan a, state dang atangin player tha an la lut a, hnehna chang fai vekin chiang takin an champion. Tun tumah Mizo hlangin chona thar awlsam lo tak an hmachhawn a, Pro Volleyball hmeichhe title humhim hmasa ber ni turin khelh khat chak chiah an bak tawh.

Bungkawn lakah rin hlawh zawk ni mah se set khatna atangin Luangmualin chet an harsat a, B Tlangmawii Varte leh Rami'n point an hloh zawn hnuah 19-13-in an hniam. Semifinal atangin senior setter FVL Hmuchhuaki an chhawr thei a, F Lallianchhungi la chhuakin an luhtir.

Thil awm dan tidanglamin Remlalnghaki'n a service atanga point a hmuh zawn hnuah point 10 an hmu zawn a, 23-19-in hma an hruai let. Bungkawn talbuaiin an tisual nasa a, 24-21-a Luangmualin hma an hruai leh hnuah VL-i'n set an lak nan a nam tla a ni.

Inkhel boruak a inthlak thut thut a, set hnihnaah F-i leh Kimi'n Bungkawn fuih phur ve thungin 22-14-in an sang fal ve leh thung. Luangmualin tan hmun a phet a, Biaki vuak an dansak hnuah F-i'n point hmu zawnin a hma lawka seta latuin point 15 chiah hmuin set hnihna an hmang zo.

Bungkawnin set thumnaah thunun zui zelin Rody Lalzuiliani'n a vuak tlak ruakin 9-1-in an sang. An chet that vanglai hmangin F-i hovin Peki leh Kimi'n inringtawk leh nuam ti takin an khel a, Luangmualin bei letin setter VL-i la chhuakin Chhungi an dah lut leh a, Biaki hlap tlak hmangin 20-19-in an hnaih hman.

Peki'n vaw tlain lehlam tan Chhungi'n a nam kai lo ve thung a, F-i'n a hlap tlak leh hnuah Bungkawnin point thum hmu zawnin 23-19-in an sang a, point khat hloh ve leh mah se harsa lovin set an la zawn.

A vawi thum nan final lut thei turin Bungkawnin kawng an sial a, Luangmual tan chet sual a thiang tawh lo. Insiam remin setter tawn hriat nei zawk VL-i hmangin set linaah ropui takin kir leh a, Hriati'n vawi thum vaw tla zawnin 8-0-in an sang a, engkim a awlsam zui.

Inrintawkna thar nen Hriati'n Rami leh Biaki bakah team pum pui fuih phur telin hriam takin an theihna an lantir a, taksa leh rilru lamah Bungkawn beng hniamin inkhing tawk lo takin an inkhel zui a, point 10-a inthlau chungin set an la.

A chak tur chin felna hnuhnung set nganaah Rami'n tum hnih a hlap tlak hnuah Hriati'n a vaw ve leh a, awlsam taka chak tlang thei mai turin 7-0 a nih hnuah 10-1-in an sang leh. Kimi leh Peki'n Bungkawn nawr kalin 12-9-in an inkar an tizim leh na a, an tlai hman tawh.

Biaki'n hlap tlain Peki'n chhang let thei lovin a vaw sual ve thung a, point khat hmuh belha chak thei turin 14-9-In Luangmual an sang. Hriati'n team pahnih daidanna point thawk chhuakin May 30, ningani zan final-ah Diakkawn leh Serkawn inkhel chak zawn nen an inhmachhawn ang.

STATS

LUANGMUAL

Lalhriatpuii : point hmuh 14, point hloh 3

Lalramliani : point hmuh 15, point hloh 6

Lalbiakngheti : point hmuh 15, point hloh 6

Remlalnghaki : point hmuh 7, point hloh 7

B Tlangmawii : point hmuh 8, point hloh 9

BUNGKAWN

F Lalparmawii : point hmuh 17, point hloh 10

Lalpekhlui : point hmuh 10, point hloh 5

Chinlunkimi : point hmuh 10, point hloh 7

Rody Lalzuiliani : point hmuh 5, point hloh 6