LPS Arena, Falkland-ah Lalmuanpuii leh Vardingliani'n team fuih phurin awmze neiin ball an vua a, 25-21, 17-25, 25-21, 25-23-in Diakkawn an chakpui.

Muani'n semifinal thlenga mi mala che tha Serkawn innghahna Elisian Medai bitumin a ball vuak a dang fo a, Kolasib team tan point hmutu ber ni bawkin 21 a hlawh chhuah laiin point riat a hloh a, Kuriz Player of the Match lawmman a dawng.

Diakkawn player-ten tawn hriat an nei hnem a, nau pawm lai Dingi'n chiang leh na taka vuak tlak a harsat tawh tih inhriaiin hmun awlah fing takin a hlap tla thin a, point 15 hmuin tum li chiah a tisual. VL Hmangaihzuali'n tum kua vaw tlaa point sarih a hloh laiin Hmingṭhazuali'n point sarih hmuin point li a paih a ni.

Team pahnih hi Mizoram volleyball inelna sang berah an vawi khat telna ve ve a ni a; April 24 khan league-ah intawng tawhin an inlan hmasak ber a ni ve ve a, Diakkawnin tlangnel taka an khel laiin kum lama naupang leh tawn hriat nei tlem zawk Serkawn erawh an ngampa zo lo va, set nga faiin Kolasib team an chak.

Hemi hnu hian Serkawnin hma an sawn a, Pro Volleyball-a khelh 10 chak zawn lai Luangmual bakah Bungkawn leh Durtlang hnehin an tlang a, an lakah beiseina pawh a sang zui hle.

Mahse, inelna sangah an tlakchham a lang thar leh a, Elisian-i'n tum 23 vaw tlain point 11 a hloh a, captain R Laltleipuii (Tetei)'n point 24 hmuin 13 a paih ve thung a, an player pawimawh pahnih che chhe lo hle chungin rilru lama fiahna an pal tlang zo lo.

Set khatnaah an ngaihsan thin player-te telna team lakah Serkawn an bet a, Muani'n point a hmuh zawn hnuah Dingi'n vaw tla ve lehin 22-16-in Diakkawn an sang. Tetei'n Lunglei team nawr kal ve leh mah se point 21 chiah an hmu ve hman tihin lehlam an tlang.

Serkawnin theihna an nei a, set khatnaa langsar lo tak Elisian-i'n tha tak takin a vaw tla a, hneh takin set hnihnaah an nawr let. 9-9 atangin Diakkawn an kalsan a, Tetei'n a hlap tlak rualin 22-15-in hma an hruai a, Kolasib team an talbuai a, 24-17-a sang zawk Lunglei team spiker Elisian-i vuak an la thei lo.

Set thumnaah Serkawnin tha takin an khel zui zel a, an player pawimawh pahnih Tetei leh Elisian-i'n point an hmuh zawn hnuah 17-13-in an sang. Ball vuakah Diakkawnin an el zo meuh lo a, chutih laiin awmze takin an bei let.

Dingi'n hui tlain Muani'n net chhung atangin Elisian-i vuak a dansak a, Serkawn che buaiin ho taka point hloh an nei zui fo bawk. Diakkawnin hun pawimawhah point nga hmu zawnin 22-19-in an lehpel a, a hnuah point thuma an inthlauhnaa humhim chungin set an laksan.

Set linaah pawh beiseiawm takin Serkawnin 17-12 leh 20-16-in hma an hruai leh. Diakkawnin nasa zawkin lehlam player pawimawh an veng a, R Malsawmtluangi'n Elisiani vuak a dan hnuah Dingi'n a awlah dahin point thum a hmu zawn a, 22-22-in an um pha.

Elisian-i'n a vuak tlak theih mai loh avangin harsatna a tawk a, a hlap kai loh hnuah Kolasib team-in an kalsan. Tetei'n vaw tlain nih rual leh mah se 23-23 a nih hnuah Muani leh Dingi'n point hmu zawnin Diakkawnin hlim takin hnehna an lawm zui a ni.

Serkawn an hneh nawn leh rualin Diakkawnin league-a an hneh loh team pahnih zinga mi an hmachhawn a ngai dawn a; May 30, ningani zan final-ah an chak a nih chuan 2023 champion Luangmual hnung zuiin Pro Volleyball-a an tel vawi khatnaah an champion nghal dawn a ni.

STATS

DIAKKAWN

Lalmuanpuii : point hmuh 21, point hloh 8

Vardingliani : point hmuh 15, point hloh 4

VL Hmangaihzuali : point hmuh 9, point hloh 7

Hmingṭhazuali : point hmuh 7, point hloh 4

R Malsawmtluangi : point hmuh 6, point hloh 6

SERKAWN

Elisian Medai : point hmuh 23, point hloh 11

R Laltleipuii : point hmuh 24, point hloh 13

Elina B Lalenkawli : point hmuh 4, point hloh 0

Evelyn Malsawmtluangi : point hmuh 3, point hloh 1

Vanlalremruati : point hmuh 2, point hloh 2

Lalkhumtiri Renthlei (setter) : point hmuh 2, point hloh 3

FIXTURE - SEMIFINAL

May 27, thawhtanni 8:00pm :

HUNTHAR V CHHINGA VENG SPIKER (mipa)

May 28, thawhlehni 8:00pm :

TUICHANGRAL V THUTAK NUNPUITU TEAM (mipa)