ZALEN, June 14, 2026: Huntharin Khawbel duhthusam tihtawpsakin Inrinni zan Mizoram Rural Bank Pro Volleyball League final-ah set thum set khatin an hneh a, a vawi li nan Mizoram inelna sang berah an champion.

Huntharin filawr taka vawi thum khel zawn hman, Khawbel innghahna, Angamuthu Ramaswamy an dan theih laiin lehlamin Suryansh Tomar an dal hneh lo va, point kua hloh chungin vawi 35 a vaw tla.

Final-a vawi nga an inlannaah boruak zo takin Huntharin a tir atangin an khel a, set hnihnaah tla hniam hret mah se kir leh nghalin thawh hona leh inpumkhatna tha tak nen boruak sang leh inelna nasaah player tinin an theihna an lantir thei.

Uttar Pradesh atanga an lak luh, Suryansh-a chuan hmun pawimawh luah tluanin a vawi nga nan Kuriz Player of the Match lawmman a dawng a, tournament chhunga vawi riat a khelhah point 233 hmuin 88 a hloh va, Haier Best Spiker-a thlan a ni tel.

Fabian Lallunghnema’n vawi 13 vaw tlain tum thum a tisual a, Lalbiakmuana’n point kua hlawh chhuakin tum dang zawng aiin a khel tha a, lehlam vuak dangtu Lalbiakmawia Khiangte chuan point riat hmu bawkin Biakmuana nen point hnih hnih ve ve chiah an paih.

Pro Volleyball League team hlawhtlin ber an nih tawhna Huntharin an tinghet a, trophy an lak hmasak ber, kum 2017 atanga tum li an champion thlenga an player pawimawh ni ziah, captain Remsangzuala (Lalmama) chuan kum dang zawng aiin ball a vawrh that bakah mittlung leh zualin team a khai khawm a, Haier Best Setter chawimawina dawngin rahbi thar a tuk tel a, setter zinga Mizo Best Player ni hmasa ber a ni a, hlawhtling takin championship a khar.

Inhnehtawk tak chungin Hunthar an chungnung a, league-ah set thum faiin hneh tawh mah se Khawbelin an khelh hnuhnunah hma an sawn zel avangin a awlsam dawn tawh lo tih an hria a. Chutihrualin Khawbel chakna hnar an hre chiang a, ven hneh tuma an beihna a hlawhtling bakah insawrbingna leh inthununna tha tak nen ho taka point hloh pumpelhin team pum puiin tihsual an nei tlem a, chu chuan danglamna a thlen tel.

Kum thum chhunga a vawi hnih nan an champion a, kum 2024-a trophy lakpuitu, VL Malsawma Renthlei chuan kum hnih kal ta khan inthununna kawngah harsatna a tawh avangin coach tha ber chawimawina a dawng lo va, tun tumah erawh phu takin Haier Best Coach-a thlan a ni.

Pro Volleyball League-a an tel vawi hnihnaah a tum khat nan Khawbelin final an lut a, an player tam zawkin an la tawn ngai loh inkhel pawimawh hmachhawnin captain Johan Vanneihsanga’n point 24 hmuin tum ruk chiah tisual mah se team a chawi kang zo lo va. Johana hian tournament chhungin point 150 hmuin 66 a hloh a, amah hnaih bertu, Hunthar spiker Fabian-a’n point 110 hmuin 40 a hloh.

Khawbelin league-a an tlawm tawhna chhang leta an duhthusam tihlawhtling turin Angamuthu an hmachhuan hle laiin Tamil Nadu atanga an lak luh hian final-ah beisei a pha lo tluan zak a. Final hmain vawi thum a khelhah point 40 chuang hmu ziahin a filawr hle mah se Hunthar a hmachhawn hmasak berah a talbuai.

Khawbel coach Samson Pautu chuan Huntharin an hriat chian leh season hnih an chhawr tawh, Anurag Rawat-a nen rin zawk tur hre lovin a inluh chhawktir a, team nghet nei lovin an khel tluan a, nghet taka khelh an harsat a. A rin ber, feet 6 leh inchi 9-a sang, Angamuthu-a’n tum 15 chiah hlap tlain point 11 a hloh a, awmzia a nei pha lo.

Khawbelin Tamil Nadu player an lak luh hnuah a tir atanga an kawl, kum 2024-a Hunthar champion-pui tawh, Anurag-a’n hmun a chang ve mang lo va. Final-ah Delhi spiker hian tum 13 hlap tlain point li a hloh a, rin hlawh zawk, Angamuthu thlakin set hnihna a lakpui a, hmun chang nghet zuiin Johan-a nen inthlawp tluan se thil awm dan a danglam mai thei.

LPS Arena, Falkland-ah mipui an pung khawm hnem a, a chhungah inekbeng mah se leng ve lo thahnem tak an awm a, au thawm a chawl lo va. 10-10 a nih laiin Huntharin Angumuthu-a vuak chiang takin an dang tla a, a hnuah point hloh zawn leh a, a vaw sual bakah Biakmawia’n a dangsak bawk a. Suryansh chuan vaw tla zui ve thungin 17-11-in Huntharin an kalsan a, Khawbelin Angumuthu la chhuakin Anurag-a dah lut mah se harsa lovin lehlamin set khatna an la.

Set hnihna an tan rualin Angumuthu a lut leh a, tum hnih a vuak sual zawn hnuah Anurag-a’n thlakin an insiam rem chho va, hnam dang player pahnih an inthlak tawn reng avangin Khawbel tan Johana a pawimawh phah leh zual a, a hma leh hnung atangin tha takin a vua a, team boruak a siam tha.

Khawbel captain hian point hmu zawnin 19-18-in Hunthar an lehpel a, hawi kir tawh lovin Anurag-a’n a hlap tlak zawn hnuah 24-21-in an sang a, Suryansh chuan setter David Lalramhmachhuana service a la sual zui a ni.

Set thumna an tan rualin Huntharin tha takin an nawr let a, Lalmama ball vawrh tha tak avangin ball vuak tlakah lehlamin an el zo lo va. Suryansh-a’n hlap tlain Anurag-a vuak an dansak a, Biakmuana’n point hmu zawnin 6-2-in an sang.

Anurag-a’n a service kai loh hnuah Angamuthu-a’n a thlak a, an player langsar an inthlak tawn sek laiin Khawbel an chiai a. Fabian-a’n a hlap tlak hnuah 18-12-in Huntharin hma an hruai a, pawtthlak rual an ni tawh lo.

Set lina tirah Anurag lut lehin thil awm dan a danglam chuang lo va, Huntharin inrintawkna nei sang tial tialin tlo takin hma lam an pan zel a. Thiam takin Suryansh an hmang a, a vuak tlak hnuah 14-10-in an sang a. Khawbelin Anurag la chhuakin Angamuthu an luhtir a, Hunthar tantute au thawm ring tak karah Tamil Nadu player hian a theihna a lantir thei lo.

Rin tlakin Johan-a’n a khel ve thung a, a hui tlak hnuah a kawppui, Angamuthu-a’n hlap tla ve lehin Hunthar hmahruaina a tla hniam a. Khawbel captain hian a hnung atanga a vuak tlak zawn leh hnuah 20-20-in an nih rual a, ‘Bel Rawh Kawn’ tiin eng emaw chen zuai tawh Khawbal tantute an rawn au chhuak thar leh.

Mahse, boruak sangah Hunthar an hriam a, Suryansh chuan vaw tlain Angamuthu-a’n a chhang let thei lo va, chiang takin line pawnah a vaw chhuak a, an beiseina a chuai zui a. Khawbelin point khat chiah hmuh belhin Suryansh-a’n Hunthar champion-na point hnuhnung pathum a hlawh chhuak a ni.

MIZORAM RURAL BANK PRO VOLLEYBALL LEAGUE 2026

May 11 - June 13, 2026 @ LPS Arena, Falkland, Aizawl

RESULT

FINAL : June 13, 2026 (Inrinni)

Hunthar def Khawbel (mipa)

25-18, 21-25, 25-21, 25-21 (3-1)

Kuriz Player of the Match - Suryansh Tomar (Hunthar)

Cheetak Fan of the Night - Lalawmpuia (Hunthar)

Lucky Fan of the Night - CT Malsawmsangi (Bungkawn Vengthar) & Lalnunmawii (Hlimen)

STATS:

HUNTHAR

Suryansh Tomar: Point Hmuh - 35, Point Hloh - 9

Fabian Lallunghnema: Point Hmuh - 12, Point Hloh - 3

Lalbiakmuana: Point Hmuh - 9, Point Hloh - 2

Lalbiakmawia Khiangte: Point Hmuh - 8, Point Hloh - 2

Wilson Lalremruata: Point Hmuh - 6, Point Hloh - 4

Remsangzuala (setter): Point Hmuh - 3, Point Hloh - 2

KHAWBEL

Johan Vanneihsanga: Point Hmuh - 24, Point Hloh - 6

Anurag Rawat: Point Hmuh - 13, Point Hloh - 4

Angamuthu Ramaswamy: Point Hmuh - 15, Point Hloh - 11

Lalhunthara: Point Hmuh - 7, Point Hloh - 2

Joseph Zoramhmangaiha: Point Hmuh - 4, Point Hloh - 1

Lalremfela: Point Hmuh - 2, Point Hloh - 2

David Lalramhmachhuana (setter): Point Hmuh - 2, Point Hloh - 1

MI MAL CHAWIMAWINA:

Haier Mizo Best Player: Remsangzuala (Hunthar)

Haier Best Spiker: Suryansh Tomar (Hunthar)

Haier Best Blocker: Zosangzuala (Anastasia Electric Veng)

Haier Best Setter: Remsangzuala (Hunthar)

Haier Best Receiver: Lalnunthara (Hunthar)

Haier Best Coach: VL Malsawma Renthlei (Hunthar)

PRO VOLLEYBALL LEAGUE CHAMPION TAWHTE :

MIPA

2016 - Anastasia Electric Veng

2017 - Hunthar

2018 - Hunthar

2019 - Chhinga Veng Spikers

2022 - Durtlang North

2023 - Thutak Nunpuitu Team

2024 - Hunthar

2025 - Anastasia Electric Veng

2026 - Hunthar