ZALEN, June 09, 2026: Set hnih an lak zawn hnuah Chhinga Veng Spikers tla hniam mah se an kir leh a, Thawhtanni zan hmeichhe league kharnaah set thum set khata ITI Veng GSA an hneh rualin Mizoram Rural Bank Pro Volleyball League final an lut.

Team pahnihin final luh an inchuh a, set hmasa pahnihah point 20 chiah hloh mah se Chhinga Veng hnungtawlhin set thumna an hloh va; mahse, talbuai rei lovin set lina an awpbet a, Anusree Poyili, Elisian Medai leh Evelyn Malsawmtluangi chuan team pum pui point hmuh hmun thuma thena hmun hnih an hlawh chhuak.

Kerala atanga an lak luh, India captain ni tawh, Anusree-i’n a hma leh hnung atangin vawi 34 a vaw tla a, point li chiah a hloh va. Spikers tan tum hnih a khelhah chakpui ve vein Kuriz Player of the Match-a thlan a ni zawn a, a kawppui, Elisian-i’n point 10 a hmuh chanve a paih ve thung a. ITI tan Jashan Preet Kaur-i’n point 26 hmuin 15 a hloh va, Lalthazampuii’n tum 10 hlap tlain point sarih a hloh a ni.

Lehlam vuak dang tura zuang hnem tak, Evelyn-i’n an chak theih nan point ruk hmuin tum khat chiah a tisual a. ITI tan Punjabi tleirawl, Jashan leh Zami bak point hmu thei an awm lo va, player leh team khaikhinin Chhinga Veng an chungnung a, vawi thum an khelhah tum hnih chakin league-ah pahnihna ni chungin tlang a. Zirtawpni zan final-ah tun season-a an ngam loh leh vawi hnih an inkhelh tawha an hneh loh zawn mek, Tuichangral lakah fiahna an hmachhawn leh a ngai dawn.

League bul an tannaah ITI-in set thum faia Eric Pautu Academy an hneh hnuah tum hnih an tlawm zawn a, pathumna ni chungin an tla a. Mizo player-ten kum 18 mi, Jashan an thlawp zo lo va, Chhinga Veng lakah bet nghalin Anusree chuan nuam ti takina vaw tla ve thung a. 13-6-a Spikers an san hnuah Evelyn-i’n tha takin a service a, lehlam tibuaiin point 11 an hmu zawn a, 24-8 a nih laiin Elisian-i’n hlap tlain set an la.

Set hnihnaah thil awm dan a danglam tam lo va, 22-12 atangin Chhinga Vengin point thum hmu zawnin Elisian chuan set an lakna point a thawk chhuak leh.

Chiang taka set hnih an hloh zawn hnuah ITI tantute an beidawng chuang lo va, chawlh lovin team an au phur reng a, set thumna an tan rualin Jashan thlawp theiin Zami’n hma a sawn a, Chhinga Vengin a hma angin an vaw tla mai thei lo ve thung.

Zami’n a ball hmuh vawi thum a vuak tlak zawn hnuah Jashan-i’n chiang takin a hlap tla bawk a, 13-7-in ITI an sang a. Phur tharin an khel zui a, Spikers talbuaiin an inthlauhna an tizim thei lo va, Zami leh Jashan-i langsarin point an hmuh zawn kar lakah Elisian-i’n a tisual a, 23-14-in ITI-in an kalsan a, harsa lovin set an la.

Chhinga Veng insiam thar lehin Anusree-i’n team a fuih phur a, set lina an tan atangin Spikers point hmuh hmasak panga thawk chhuakin lehlam rinrawl Jashan-i’n a chhang let hneh lo va. Set thumna angin Zami’n point a hmu thei tawh lo a, chutih laiin Chhinga Veng tan Elisian-i’n a vuak tlak hnuah Anusree-i’n a hnung atangin a hlap tla ve leh a, 19-11-in hma an hruai a. ITI tan pawh tlak rual a ni tawh lo va, point sawma inthlau chungin Spikers an tlang.

MIZORAM RURAL BANK PRO VOLLEYBALL LEAGUE 2026

May 11 - June 13, 2026 @ LPS Arena, Falkland, Aizawl

RESULT

Round 3 : June 08, 2026 (Thawhtanni)

Chhinga Veng Spikers def ITI Veng GSA (hmeichhia)

25-8, 25-12, 17-25, 25-15 (3-1)

Kuriz Player of the Match - Anusree Poyili (Chhinga Veng Spikers)

Cheetak Fan of the Night - Lalrinengi (Chhinga Veng)

MVA Lucky Fan - Lalruatfeli (ITI Veng), Remsiampuii (ITI Veng)

STATS:

CHHINGA VENG SPIKERS

Anusree Poyili: Point Hmuh - 34, Point Hloh - 4

Elisian Medai: Point Hmuh - 10, Point Hloh - 5

Evelyn Malsawmtluangi: Point Hmuh - 6, Point Hloh - 1

Lalbiakngheti: Point Hmuh - 3, Point Hloh - 1

Chinglunkimi: Point Hmuh - 2, Point Hloh - 2

ITI VENG GSA

Jashan Preet Kaur: Point Hmuh - 26, Point Hloh - 15

Lalthazampuii: Point Hmuh - 10, Point Hloh - 7

Lalrinzuali: Point Hmuh - 1, Point Hloh - 1

Lalrammawii: Point Hmuh - 1, Point Hloh - 3

Lalrempuii (setter): Point Hmuh - 0, Point Hloh - 2

POINT TABLE

TUICHANGRAL: Play 3, Won 3, Loss 0 (set lak 9, set hloh 0) : Point 9

CHHINGA VENG: Play 3, Won 2, Loss 1 (set lak 6, set hloh 4) : Point 6

ITI VENG GSA: Play 3, Won 1, Loss 2 (set lak 4, set hloh 6) : Point 3

ERIC PAUTU ACADEMY: Play 3, Won 0, Loss 3 (set lak 0, set hloh 9) : Point 0

FIXTURE:

SEMIFINAL - MIPA

June 09, 2026 (Thawhlehni)

8:00 PM : Hunthar v Chhinga Veng Spikers

June 10, 2026 (Nilaini)

8:00 PM : Khawbel v Anastasia Electric Veng

FINAL - HMEICHHIA

June 12, 2026 (Zirtawpni)

Tuichangral v Chhinga Veng Spikers