LPS Arena, Falkland-ah Lalbiakmuana leh Saidingpuia Sailo chuan khaw chhak team tan hriam takin an khel a, 25-20, 25-15, 25-17-a an chak rualin table chung berah an insawn chho a, an rualin Huntharin knockout round an lut.

Tuichangral tan veikhawr Biakmuana'n tum 14 vaw tlain point nga a hloh a, a vawi khat nan Kuriz Player of the Match-a thlan a ni a, league kal mekah Khawhai tlangval Saitea chet that ber ni ve thungin set hnihna thlenga khel Sonu nen point 12 hmuin tum li ve ve an tisual a ni.

Pro Volleyball-a an tel hmasak berah Mizo hlangin Hlimenin fiahna an hmachhawn a, Mizo player langsar sa lak luh an nei lo bawk a, harsatna an tawk. Zolungmuana'n vawi riat hlap tlain point thum a hloh a, kai thar tan mi mala che tha ber a nih laiin lehlam player nena khaikhinin an el pha lo.

Set khatnaah Biakmuana'n a vuak tlak rualin Tuichangralin 21-18-in hma an hruai a, Hlimen spiker PC Lalnuntluanga vuak an dansak leh hnuah 24-20-in an sang zui leh a, net chung atang bawkin Vanlalhnehpuia hlap an dang tla leh a ni.

Set hnihna atangin Tuichangralin an thunun hneh leh zual a, state pawn atanga an lak luh Sonu chuan a vaw tla hnem hle. Hlimen innghahna pawimawh Nuntluanga'n a hlap kai loh hnuah 24-15-in an sang a, Sonu chuan tha zetin a service a, an la thei lo.

Set thumna tan dawnah set hnihnaa awl Zomuansanga'n Sonu a thlak a, tihsual nei lovin tum li a vaw tla. Saitea'n a hlap tlak rualin 19-12-in Tuichangral an sang a, player thlak kualin hmun chang tam lote tan hun tha an siamsak.

Hlimenin theihtawpin bei let mah se inelna sangah danglamna siam thei player an tlachham a, hlap tlak leh lehlam vuak dansak kawngah Tuichangral leh an khelhpui tawhte an pha lo zel a; point 17 chiah an hmu ve hman tihin lehlam an tlang.

Durtlang North an hneh lo tumin Hlimenin set khat an la ve a, Hunthar hmaah tun ang bawk hian set hnaih zo lovin an tlawm a, Nuntluanga'n point riat a hmuh zat a hloh a, Joseph Lalbiaksanga'n tum khat chiah tisualin vawi ruk hlap tla mah se awmzia a nei tham lo a ni.

Nuam ti takin Tuichangralin an khel ve thung a, Zomuana'n point riat hmuin tum hnih a tisual a, Vanlaltanpuia'n point khat hlohin vawi sarih a hlap tla bawk a; khelh liah vawi thum an chakna niin point khatin anni aia vawi khata khel tlem Hunthar an lehpel.

May 18 zanah Tuichangralin league khar nan Hunthar an hmachhawn dawn a, table-a sang ber chin felna a ni nghal ang. A mawngah Hlimen awm mah se an la tla lo va, May 17 zanah Thutak Nunpuitu Team nen an inkhel ang a, May 20 zanah league zawh nan Chhinga Veng Spikers nen an intawng dawn a ni.

STATS

TUICHANGRAL

Lalbiakmuana : point hmuh 14, point hloh 5

Saidingpuia Sailo : point hmuh 12, point hloh 4

Sonu : point hmuh 12, point hloh 4

Zomuansanga : point hmuh 8, point hloh 2

Vanlalṭanpuia : point hmuh 7, point hloh 1

Lalhmunmawia : point hmuh 2, point hloh 1

HLIMEN

Zolungmuana : point hmuh 8, point hloh 3

PC Lalnuntluanga : point hmuh 8, point hloh 8

Joseph Lalbiaksanga : point hmuh 6, point hloh 1

Vanlalhnehpuia : point hmuh 5, point hloh 3

H Lalchhuanawma : point hmuh 3, point hloh 2

Rozuala Hnamte : point hmuh 2, point hloh 1

Vanlalthlamuanpuia : point hmuh 2, point hloh 2

Vanlalnunzira (setter) : point hmuh 4, point hloh 5

POINT TABLE

TUICHANGRAL : Play 4, Won 3, Loss 1, Point 10

HUNTHAR : Play 3, Won 3, Loss 0, Point 9

THUTAK NUNPUITU TEAM : Play 4, Won 2, Loss 2, Point 6

DURTLANG NORTH : Play 3, Won 1, Loss 2, Point 3

CHHINGA VENG SPIKERS : Play 3, Won 1, Loss 2, Point 2

HLIMEN : Play 3, Won 0, Loss 3, Point 0

FIXTURE

May 15, nilaini 8:00pm :

BUNGKAWN V SERKAWN (hmeichhia)

May 16, ningani 8:00pm :

CHHINGA VENG SPIKERS V DURTLAWNG NORTH (mipa)

May 17, zirtawpni 8:00pm :

THUTAK NUNPUITU TEAM V HLIMEN (mipa)

May 18, inrinni 8:00pm :

HUNTHAR V TUICHANGRAL (mipa)