LPS Arena, Falkland-ah Elisian Medai leh R Laltleipuii'n rin hlawh lo zawk Serkawn chawi kangin el tham hmel thar an puttir a, 15-10, 15-13, 11-15, 16-14, 12-15-in an chak.

Elisian chuan vawi 23 vaw tlain point riat hloh mah se Kuriz Player of the Match-a thlan a ni a, Tleipuii'n point 15 hmuin tum nga a tisual ve thung a; Luangmual tana thawh hlawk ber Lalramliani'n point 14 hlawh chhuakin point ruk a paih a ni.

Kai thar Serkawnin league kal meka tum thum an khelh tawhah a vawi hnih nan hnehna an chang a, May 15 zanah Bungkawn nen inkhelin league an khar ang. Hetih lai hian knockout round lut pha lovin table-a hniam ber Durtlang an tla ve nghal a ni.

Luangmualin hriat reng tlak loh sulhnu an hnutchhiah ve thung a, Pro Volleyball-a an tel tirh 2023 atangin khelh 10 an chak zawn hnuah a vawi khat nan an tlawm. League khel zovin tum thum an chak a, set 14 lain point 14 an hmu a, um phak theih lohin an sang ber tho a ni.

Mizoram volleyball inelnaa an inlan hmasak berah Serkawnin boruak an ngam tawk lo va, Diakkawn lakah set la lovin an tlawm. An khelh vawi hnihnaah set nga la fai vekin Durtlang an hneh ve thung a, insawhnghet zui zelin title thlir ngamin Luangmual hmaah an inlan.

Luangmual ball vuak dangin an la thei tel a, 2022 best spiker Elisian-i'n a hma aia hriamin a khel a, a vuak tlak hmangin 12-10-in set khatnaah hma an hruai a; captain Tleipuiin point hnih hmu zuiin Elisian-i'n set an lak nan a hlap tla leh a ni.

Lunglei team-in mipui an barakhaih nghal a, set hnihnaah pawh Luangmual an kir zo lo. 12-12 a nih hnuah Aizawl team-in point khat hmuh belhin ho takin an hloh tel a, Eliasian'n point hnih thawk chhuakin Serkawnin set an la zawn.

Set thumnaah Rami'n Luangmual fuih phur ve thungin 11-7-a an san hnuah Remlalnghaki vuak tlak hmangin 13-9-in hma an hruai leh a, Serkawnin point hnih chiah an hmuh belh tihin Rami hui tlak hmangin Aizawl team an tlang.

Set linaah inelna a sangin inkhel boruak a sosang leh zual a, 7-7 a nih hnuah Serkawn an sang zawk zel a, Eliasian-i'n a hlap tlak rualin point khat hmuh belha tlang thei turin 14-12-in hma an hruai.

Rami'n chhang letin a vuak tlak hnuah Elisian-i'n a hlap sual a, 14-14 a ni zui leh. Mahse, Serkawn spiker-in a tihsual siam tha zui nghalin tum hnih vaw tla zawnin a team-te hnehna hlu tak a chanpui a ni.

Set li la thei turin Serkawnin set nganaah 9-3-in hma an hruai fal a, mahse, a hnunga Elisian-i a awm laiin an talbuai bakah, Luangmualin paukhauh takin a tawp thlengin inthlahdah lovin an bei let a, an pawtthla.

12-11-a hniam zawk an nih atangin set hmasa palia che hlei thei lo Lalbiakngheti a inlar a, dan theih lohin vawi li a vaw tla zawn a, Luangmual tan inkhel tha ni lo mah se tawp an khar danah an nihna an la hloh vek lo tih an lantir. 

Biaki leh Remi'n vawi riat ve ve vaw tlain point nga an hloh ve ve a, B Tlangmawii Varte chuan point ruk a hmuh chanve a paih a; semifinal-ah Luangmualin league-a palina nen an hmachhawn ang.

STATS

SERKAWN

Elisian Medai : point hmuh 23, point hloh 8

R Laltleipuii : point hmuh 15, point hloh 5

Evelyn Malsawmtluangi : point hmuh 2, point hloh 2

Elina B Lalenkawli : point hmuh 1, point hloh 3

Vanlalremruati : point hmuh 0, point hloh 3

LUANGMUAL

Lalramliani : point hmuh 14, point hloh 6

Lalbiakngheti : point hmuh 8, point hloh 5

Remlalnghaki : point hmuh 8, point hloh 5

B Tlangmawii : point hmuh 6, point hloh 3

Lalnunpuii : point hmuh 3, point hloh 2

Lalhriatpuii : point hmuh 1, point hloh 0

F Lallianchhungi (setter) : point hmuh 2, point hloh 3

Laltluangzeli Colney : point hmuh 0, point hloh 2

POINT TABLE

LUANGMUAL : Play 4, Won 3, Loss 1, Point 14

BUNGKAWN : Play 3, Won 2, Loss 1, Point 8

SERKAWN : Play 3, Won 2, Loss 1, Point 8

DIAKKAWN : Play 3, Won 1, Loss 2, Point 8

DURTLANG : Play 3, Won 0, Loss 3, Point 2

May 11, inrinni 8:00pm :

DURTLANG NORTH V TUICHANGRAL (mipa)

May 13, thawhtanni 8:00pm :

DIAKKAWN V DURTLANG (hmeichhia)

May 14, thawhlehni 8:00pm :

TUICHANGRAL V HLIMEN (mipa)

May 15, nilaini 8:00pm :

BUNGKAWN V SERKAWN (hmeichhia)