ZALEN, June 11, 2026: Set hmasa ber an hloh hnuah Khawbelin inkhel an thunun tluan a, Nilaini zan Mizoram Rural Bank Pro Volleyball League semifinal-ah champion lai, Anastasia Electric Veng hnehin a vawi khat nan Mizoram inelna sang berah final an lut.

LPS Arena, Falkland-ah Khawbelin hun chhinchhiahtlak an hmang a, set hnihna atangin Anastasia dang betin chungnung takin set thum an la zawn a. Tamil Nadu atanga an lak luh, Angamuthu Ramaswamy chuan hmun pawimawh luah lehin vawi 43 a vaw tla a, point 10 chiah hlohin a khelh tawh vawi thumah Kuriz Player of the Match a ni vek.

League-ah set la hmasa zawk an nih hnuah Khawbel talbuaiin Anastasia lakah an tlawm a, nikum khan kai thar ni chungin semifinal lut mah se set khat mah la lovin Electric Veng club lakah an tla tawh bawk a. Feet 6 leh inchi 9-a sang, Angamuthu an neih hnuah an danglam a, a tel lova Anastasia laka an tlawm tawhna chhang letin a hova vawi thum an khelh tawhah Khawbel an chak vek.

Anastasia-in Karthik Madhu ko kirin set khatna an khelh chhungin nomawi humhim thei turin beiseina nei a; mahse, mi mala langsar tak ni hlawm chungin an inzawmna a nghet lo va. Angamuthu an dan hneh loh avangin ball vuak tlakah an inthlau a, team fuih phur thar leh turin rin tlaka danglamna siam thei an an awm lo bawk.

Setter Ramdintluanga tih loh - Karthik, Ngursangzuala, Laldinsanga, Zomuansanga leh Zosangzuala (Mama) point hmuh belh khawmin 40 a ni a, player panga hian Angamuthu-a point hmuh an tluk lo va. Khawbel captain Johan Vanneihsanga'n tum 15 hlap tlain point ruk a paih a, Electric Veng team tana hnuhma nei tha ber, Karthik aiin point khatin a hmu tam a, an hloh zat a inang.

Mi mal chet dan inthlau tak hian team pum puiah nghawng a nei lian a, set hnihna atangin Anastasia-in an khing hneh lo hle.

Khawbel coach Eric Pautu chuan khelmual kotlangah team a kaihruai hman lo va, a nau Samson Pautu chuan inkhel pawimawh a hmachhawnpui a. Ke hliam vanga an khelh hnuhnun bera tel thei lo, Lalhunthara’n a tir atangin a khel leh thei a, team thawm phuiin Lalremfela nen lehlam vuak an do dai thei a; Hunthara’n point nga, Afela’n point thum hmuin vawi khat ve ve an tisual.

A lai atanga lehlam hlap dangtute pahnih hi an elpui team dangte ngaihtuahin an sang tawk lo ve ve a; mahse, Anastasia-in an hlawkpui thei lo.

An duhthusam tihlawhtling turin Khawbel an insengso a, Delhi player Anurag Rawat kawl chungin state pawn atangin player an lak belh a, season liam ta aia hmasawn an tumna an tihlawhtling tawh a. An duhthusam tipuitling turin khelh khat an la hmabak a, Inrinni zanah khelh li chak zawn mek, Hunthar nen champion inchuhin an intawng dawn a, league-ah Angamuthu an neih hmain set thum faiin an hneh lo tawh a ni.

Anastasia-in nikuma champion-puitu, Karthik-a hovin championship bul an tan a, league vawi thum an khelh hnuah hun a neih zui loh avangin a hawsan a, a hmun ruak luah turah an lak, Kush Singh an chet thatpui lo va. An khelh hnuhnun vawi hnihah tlawm zawnin an talbuai a, league-ah pathumna luahin Khawbel hnuaia awm chungin an tlang a, semifinal atan inbuatsaihna hun awl ni 12 an nei.

Karthik-a hovin a tir lamah an khel fuh viau a, Ngura’n hui tlain lehlam tan Angamuthu-a’n a vaw kai lo ve thung . A hnuah Mama’n Angamuthu-a hlap dang thlain 16-13-in Anastasia an sang a, hma an hruaina humhim tluanin Khawbelin 23-22-in hnaih hman mah se Hunthara’n a tihsual hnuah Karthik-a’n a vaw tla a, Electric Veng club-in set khatna an la a ni.

Khawbel rinrawl, Angamuthu-a’n tihsual a neih fo avangin set hnihna an tan hnu lawkah Anurag-a’n a thlak a. Delhi spiker hian a vuak tlak hnuah point hnih a hloh zawn a, 12-11-a Anastasia an san laiin Tamil Nadu player-in thlak leh nghalin team a fuih phur zui a, a hnung atanga a vuak tlak hnuah Johan-a’n hlap tla ve lehin 17-12-in an sang. 

Lei rem rap leh turin Anastasia tan danglamna siam thei an awm lo va, set hnihnaah point 16 chiah hmuin set thumnaah point 18 an hmu ve hman tihin Khawbelin set an la zawn a. Angamuthu-a’n ball a hmu hnem a, a hlap tlak zel laiin Electric Veng team tan chhang let thei an awm lo va, an talbuaina a thuk tial tial a, lehlamin inrintawkna nen nuam ti takin an khel ve thung.

Set lina an tan hnuah 8-4-in Khawbel an sang mek tihin an innghahna Angamuthu chuan a vaw kai lo a, a kaw tawpa awm tawh Anastasia tan nawr let theihna remchang a nih laiin Helly Vanlalliana’n ho takin a service dik lo a, hlauhthawnnain player tibuaiin an ball khawih a nep a, chak duhna tak tak an lantir zawh loh avangin a kotlang atanga anmahni au phurtute an zuai.

Khawbelin hneh takin inkhel an awpbet a, harsa tura ngaih pawh Angamuthu-a chuan ball kang a vaw zel a, Johan-a’n tim lovin a ball hmuh a hlap bawk a. Team pahnih boruak hap a inchen lo va, Johan-a’n a vuak tlak hnuah 24-16-in an sang a, Karthik-a’n vawi khat dang thei mah se Helly-a’n a service sual a, ring taka khuang vaw chung leh hlim taka au chungin Khawbelin hnehna an lawm zui. 

MIZORAM RURAL BANK PRO VOLLEYBALL LEAGUE 2026

May 11 - June 13, 2026 @ LPS Arena, Falkland, Aizawl

RESULT

SEMIFINAL : June 10, 2026 (Nilaini)

Khawbel def Anastasia Electric Veng (mipa)

22-25, 25-16, 25-18, 25-17 (3-1)

Kuriz Player of the Match - Angamuthu Ramaswamy (Khawbel)

Cheetak Fan of the Night - Lawmsangzuala (Khawbel)

MVA Lucky Fan - Ramnunsiami (Khatla East), Laldingliani (Kanan Veng)

STATS:

KHAWBEL

Angamuthu Ramaswamy: Point Hmuh - 43, Point Hloh - 10

Johan Vanneihsanga: Point Hmuh - 15, Point Hloh - 6

Lalhunthara: Point Hmuh - 5, Point Hloh - 1

Lalremfela: Point Hmuh - 3, Point Hloh - 1

Joseph Zoramhmangaiha: Point Hmuh - 1, Point Hloh - 1

Anurag Rawat: Point Hmuh - 1, Point Hloh - 2

David Lalramhmachhuana (setter): Point Hmuh - 1, Point Hloh - 2

ANASTASIA ELECTRIC VENG

Karthik Madhu: Point Hmuh - 14, Point Hloh - 6

Ngursangzuala: Point Hmuh - 11, Point Hloh - 2

Laldinsanga: Point Hmuh - 7, Point Hloh - 4

Zomuansanga: Point Hmuh - 4, Point Hloh - 3

Zosangzuala: Point Hmuh - 4, Point Hloh - 7

Ramdintluanga (setter): Point Hmuh - 0, Point Hloh - 1

FIXTURE:

FINAL - HMEICHHIA

June 12, 2026 (Zirtawpni)

Tuichangral v Chhinga Veng Spikers

FINAL - MIPA

June 13, 2026 (Inrinni)

Hunthar v Khawbel