ZALEN, June 10, 2026: Huntharin set thum set khatin Chhinga Veng Spikers an hneh nawn a, Thawhlehni zanah Mizoram Rural Bank Pro Volleyball League semifinal pal tlangin final an lut.

Inrinni khan league kharna inkhelah Huntharin set hmasa ber an hloh va, set hnihna tawp dawnah nawr letin tha takin an kir leh a, set thum la zawnin Chhinga Veng an hneh.

Ni thum hnuah intawng leh nghalin set khatna an lak hnuah tla fual deuh mah se an kir leh a, a vawi nga nan Mizoram volleyball inelna sang berah final an lut.

An inkhelh hmasak aiin Hunthar rinrawl, Suryansh Tomar a che tha a, vawi 37 hlap tlain a hma aiin point 11-in a hmu tam a, 13 hlohin a hma aiin point liin tam mah se team chakna hnar ber a ni a, a vawi li nan Kuriz Player of the Match-a thlan a ni.

Fabian Lallunghnema’n point 13 hmuin tum ruk a tisual a, Lalbiakmuana'n point hnih paihin point ruk a hlawh chhuak a, Spikers nen an inkhelh hmasak aiin hnuhma an nei tha ve ve.

Lehlam vuak dan kawngah Hunthar an chungnung zawk a, team pahnih inkara danglamna siamtu pawimawh tak a ni a. Wilson Lalremruata’n a hma a phak loh laiin khel tam lo tak, Samuel Lalmuanpuia’n a thlak a, set thumna atangin Chhinga Veng dangtu pawimawh tak a ni a, a khelh chhungin hloh nei lovin point nga a hmu a, heng zinga pali hi lehlam hlap a dan tlak a ni a. Amah ang bawka a lai atanga lehlam vuak dangtu, Lalbiakmawia Khiangte chuan tihsual nei lovin point li a hmu bawk.

Chhinga Vengin set an hloh hmasak hnuah bei let tha hle mah se chak tur khawpin an daih rei lo va. Set hnihna an lak hnuah ball vuak tlak an harsat a, awmze neiin an insiam tha thei tawh lo va. Chutih laiin Morales Ponce De Leon chuan an inkhelh hmasak aiin hnuhma a nei tha a, point 29 hmuin 12 a hloh. Mizo player-te an tla hniam vek a, Vanlaltanpuia’n tum 10 vaw tlain vawi thum a tisual a, set thumna atangin captain Lalchungnunga leh amah thlaktu, Lalnunzira an talbuai nasa zual a, team an pawt hniam.

Champion hnem ber leh vawi thum champion tawh, Huntharin nomawi lak belh turin khelh khat chak chiah an mamawh tawh a, Inrinni zan final-ah Khawbel leh Anastasia Electric Veng chak zawk an hmachhawn dawn a. Hunthar hian khelh li hnehna an chang zawn mek a, kum 2023 leh 2024 ang bawkin kum li chhunga a vawi thum nan semifinal-ah Chhinga Veng an hneh a, an champion hmasak ber, kum 2017 khan final-ah an hneh bawk.

Kum 2019 khan semifinal-ah set thum set hniha Hunthar hnehin Chhinga Veng an champion zui a, hemi hnu hian Pro Volleyball knockout round-ah an hneh zui tawh lo va. Nikum khan hremna avangin an tel thei lo va, kuminah kir lehin league-ah palina an nih avangin hmahruaitu leh an hneh loh zawh chiah, Hunthar an sut a ngai a, anmahni tihsual avangin lehlam tan kawng an hawnsak bakah a tira lut mi paruk bak an khelh dan siam thara tidanglam turin player duhthlan tur dang an tlachham.

Huntharin champion team-a tel tawh tawn hriat nei tha player kawl khawm ve thungin, inkhel an tan hnu lawkah Chhinga Veng tan Cuban spiker Morales leh Chungnunga ten an vaw sual zawn a, Hunthar lamah Fabian-a, Wilson-a leh Suryansh chuan hlap tlain 13-8-in an sang a. Spikers-in um zui zel mah se hnaih chilh zo lovin set hmasa ber an hmang zo.

Set an hloh hmasak hnuah beiseiawm takin Chhinga Vengin an nawr let a, set hnihna tirah Huntharin an insawrbingna hlohin an tuar zui a. Morales chuan vawi thum a vuak tlak chhungin lehlam tan Wilson-a'n a vaw kai lo va, Spikers-in Biakmuana hlap dahsak bawkin set hmasa nen thil awm dan a inthlak.

Vuak tlak an harsat avangin Hunthar an buai a, Chhinga Veng player-ten an ball hmu point-ah an chantir thei zel a, Hunthar captain Remsangzuala'n a service kai loh hnuah 16-9-in Spikers an fal.

Chhinga Vengin set hnihna thunun viau mah se set thumnaah Huntharin ho deuha point hloh pumpelhin a tir atangin hriam zawkin hma lam an pan a. Suryansh chuan vaw tla zawnin Morales-a’n chhang let thei lo ve vein a hlap sual zawn a, Sawmsanga’n a vaw dik lo bawk.

Championship kal meka vuak tlak harsat tak, Biakmuana’n a hlap tlak rualin Hunthar an insawhnghet a, 8-3-a hmahruai chungin time-out hmasa ber an hmang.

Chhinga Vengin setter C Zonunmawia la chhuakin H Lalruatsanga an dah lut a, Chungnunga vuak an dan hneh avangin Zira lut bawk mah se thil awm dan a danglam tam lo. Spikers-in vuak vak aiin point an zawng nasa a, Morales-a’n a nam tlak hnuah 19-17-in an hnaih hman na a, Suryansh an dang thei lo va, point ngaa inthlau chungin Huntharin a vawi hnih nan set an la.

Set linaah kir leh thei turin Chhinga Vengin tha takin bul an tan a, Suryansh-a’n a vuak sual hnuah 7-1-in an sang a. Ni thum kal ta khan set hmasa pahnih la zawn thei turin Hunthar lakah 17-11-a an sang hnuah point khat hmuh belha set la thei turin 24-21-in Spikers-in hma an hruai leh. Mahse, Huntharin pawttlain inkhel an awpbet zui tluan tawh a, tun tumah pawh rei lo te chhungin an lehpel a, hawi kir tawh lovin chawl lova a kotlang atanga anmahni au phurtute nen hlim takin hnehna an lawm zui.

Morales-a vuak an dan hnuah 10-10-in an nih rual a, Zira’n line pawnah vaw chhuakin Suryansh-a’n a hlap tla ve thung a, an lehpelh hnuah point hnihin Hunthar an sang a. An vuak tlak mai theih loh avangin Chhinga Veng an talbuai a, an innghahna ber, Morales-a’n an mamawh laiin vuak sual a ching a, Hunthar angin kawng dika kir leh turin insiam tha mai thei lo a, chu chuan team pahnih inkarah danglamna a siam. 

Spikers captain Chungnunga hlap an dansak hnuah Hunthar tan Biakmuana’n a vaw tla a, Morales-a’n vaw kai lo zuiin 23-15-in Chhinga Veng an hniam a. Point li hmuh belh leh mah se awmzia a nei thui lo va, ding lam sir (universal) atanga hlap tla hnem tak, Suryansh chuan Hunthar chakna point hnuhnung pahnih a thawk chhuak a ni.

MIZORAM RURAL BANK PRO VOLLEYBALL LEAGUE 2026

May 11 - June 13, 2026 @ LPS Arena, Falkland, Aizawl

RESULT

SEMIFINAL : June 09, 2026 (Thawhlehni)

Hunthar def Chhinga Veng Spikers (mipa)

25-20, 19-25, 25-20, 25-19 (3-1)

Kuriz Player of the Match - Suryansh Tomar (Hunthar)

Cheetak Fan of the Night - Lalnunhlima (Chhinga Veng)

MVA Lucky Fan - Lalruatfeli (Hunthar Veng), Teresa Vanengmawii (Chawnpui)

STATS:

HUNTHAR

Suryansh Tomar: Point Hmuh - 37, Point Hloh - 13

Fabian Lallunghnema: Point Hmuh - 13, Point Hloh - 6

Lalbiakmuana: Point Hmuh - 6, Point Hloh - 2

Samuel Lalmuanpuia: Point Hmuh - 5, Point Hloh - 0

Lalbiakmawia Khiangte: Point Hmuh - 4, Point Hloh - 0

Wilson Lalremruata: Point Hmuh - 4, Point Hloh - 2

Remsangzuala (setter): Point Hmuh - 3, Point Hloh - 2

CHHINGA VENG SPIKERS

Morales Ponce De Leon: Point Hmuh - 29, Point Hloh - 12

Vanlaltanpuia: Point Hmuh - 10, Point Hloh - 3

H Malsawmsanga: Point Hmuh - 8, Point Hloh - 5

R Vanlalmawia: Point Hmuh - 6, Point Hloh - 2

Lalchungnunga: Point Hmuh - 3, Point Hloh - 5

C Zonunmawia (setter): Point Hmuh - 2, Point Hloh - 0

FIXTURE:

SEMIFINAL - MIPA

June 10, 2026 (Nilaini)

8:00 PM : Khawbel v Anastasia Electric Veng

FINAL - HMEICHHIA

June 12, 2026 (Zirtawpni)

Tuichangral v Chhinga Veng Spikers