Semifinal-ah mipui beisei angin Tuichangral an inlan a, championship kal meka an khelh that ber niin 25-23, 25-13, 25-18-in champion lai TNT an awpbet.

May 12, 2022 khan league-ah set thum set khatin Tuichangralin TNT an hneh a, hemi hnu hian inelna hrang hrangah Muanna Veng team ngam lovin tum ruk an tlawm zawn a, Pro Volleyball bikah vawi thum an chak lo zawn a ni.

LPS Arena, Falkland-ah mipui an khat hneh hle a, set khatnaah Tuichangralin boruak sang pal tlangin nuam ti takin an khel tluan a; Zomuansanga'n tum 17 vaw tlain point ruk a hloh a, Kuriz Player of the Match lawmman a dawng.

Sonu chuan vawi 12 hlap tlain tum thum a tisual a, TNT an hneh hnuhnun bera Tuichangral tana khel Saidingpuia Sailo chuan point hnih paihin tum 11 a vuak tlak bakah, Vanlaltanpuia'n point khat paihin point 10 a hlawh a ni.

Set hmasa ber an lak theihna kawnga thawh hlawk ber Lalbiakmuana'n set hnihna tir lamah a kutzungtang a tihnat avangin a khel zawm thei lo a, vawi kua vaw tla hmanin tum khat chiah a tisual.

Biakmuana tel lova an khelh hnuah an intel ruh zawk emaw tih tur khawpin a khawng a, a hmun ruak luahtu Lalhmunmawia'n point ruk hmuin point hnih a hloh.

Setter C Zonunmawia'n hmun pawimawh luahin point li a thawh chhuah bakah tha takin ball a sem. Sawiselna an tawrh thin hnuchhawnin player tinin team an chawi kang a, zirtawpni zan final-ah fiahna hnuhnung hmachhawnin Hunthar nen an inkhel ang.

Nikumah hnehna chang fai vekin TNT-in hnuhma chhinchhiahtlak an hnutchhiah a, Mizo hlanga mipa title la hmasa ber an ni. Tun tumah player danglam awm lovin champion team-in beisei pha lovin championship an thlah liam.

Vanlaltanchhana'n point 20 hmuin point sarih a hloh a, mi mala thawh hlawk ber ni mah se hun pawimawhah 23-24-a hniam zawk an nih laiin a service sual a, set khatna an hloh phah hnuah Tuichangral el pha lovin an zuih ral.

Valbuanga thlawp thei ber Zosangzuala'n vawi khat tisualin point sarih a hlawh chhuak a, player dang hnuhmain awmzia a nei pha lo a, vuak tlak an harsat bakah lehlam ball hlap lak an harsatna tel bawk.

Player an neih dan atanga an teh tlin loh fo Tuichangralin TNT laka khelh sarih tlawm zawn pumpelh turin boruak hrang hrang an vai kian a tul a, Saitea'n a vuak tlak rualin set khatnaah 16-12-in hma an hruai.

Mahse, lehlamin nawr letin an inum tawk zui hle a, 22-22 thlengin an intluk. Hun pawimawhah TNT-in insawrbingna an tlachham a, setter F Lalhriatpuia'n a nam sual avangin 24-22-in Tuichangral an sang.

Valbuanga'n a hui tlak hnuah Muanna Veng team tan beiseina siamsak mah se amah vekin tihsual hun lova a service dik lo a, set an lak hnuah Tuichangralin inkhel thunun zui nghalin set hnihnaah Sony chuan hui tlain 5-1-in an sang.

Lehlam vuak dan tumin ban pharin Biakmuana a zuang a, a kut ding lam zungtang tinain lak chhuah a ngai. Khaw chhak team-in an hnual phah lo va, Saitea leh Sonu chuan invuak tlak chhawkin 17-8-in hma an hruai.

Zomuana'n rin tlakin a theihna a lantir zui a, lehlamin point 13 chiah an hmu ve tihin an tlang. Set thumnaah thil awm dan a danglam chuang lo va, TNT player-ten inrintawkna tlachhamin, Laldinchhunga vuak an dan hnuah 10-4-in Tuichangral an sang fal.

C Tea'n ball pek sual nei lovin Tuichangral player-ten point-ah an chantir thei zel a, TNT lamah Valbuanga bak point hmu mai thei an awm lo. Dina'n a vuak sual hnuah Valbuanga hlap an dansak a, 23-16-in team pahnih an inthlau.

Zomuana'n a vuak tlak hnuah chak turin point khat chiah an mamawh a, lehlamin 18 an hmu ve hman tihin C Tea'n a hui tla. TNT laka an harsatna su kiangin chiang takin an chak a, rilru lama harh tharna chang chungin a vawi hnih nan Tuichangralin final an lut.

STATS

TUICHANGRAL

Zomuansanga : point hmuh 17, point hloh 6

Sonu : point hmuh 12, point hloh 3

Saidingpuia Sailo : point hmuh 11, point hloh 2

Vanlalṭanpuia : point hmuh 10, point hloh 1

Lalhmunmawia : point hmuh 6, point hloh 2

C Zonunmawia (setter) : point hmuh 4, point hloh 0

Lalbiakmuana : point hmuh 9, point hloh 1

TNT

Vanlalṭanchhana : point hmuh 20, point hloh 7

Zosangzuala : point hmuh 7, point hloh 1

Sadrak Fanai : point hmuh 3, point hloh 0

Vanlalchhantluanga Sailo : point hmuh 3, point hloh 3

Laldinchhunga : point hmuh 5, point hloh 6

K Zodingliana : point hmuh 0, point hloh 1

F Lalhriatpuia (setter) : point hmuh 1, point hloh 0

FIXTURE - FINAL

May 30, ningani 8:00pm :

LUANGMUAL V DIAKKAWN (hmeichhia)

May 31, zirtawpni 8:00pm :

HUNTHAR V TUICHANGRAL (mipa)